Gələn ilin dövlət büdcəsi plenar iclasa tövsiyə edildi

Bakı:

23 °C

60 %

4 m/s

Əlaqə

AZ RU EN

Ana səhifə / Xəbər lenti / Gələn ilin dövlət büdcəsi plenar iclasa tövsiyə edildi

Gələn ilin dövlət büdcəsi plenar iclasa tövsiyə edildi

02.12.2023 [10:40]

Milli Məclisin xərcləri artırılır

Günel ABBASOVA

Dekabrın 1-də Milli Məclisin İqtisadi siyasət, sənaye və sahibkarlıq komitəsinin növbəti iclası keçirilib. Gündəliyə 15 məsələ daxil edilib.

Əvvəlcə “2024-cü il dövlət büdcəsi haqqında” qanun layihəsi bu gün Milli Məclisin İqtisadi siyasət, sənaye və sahibkarlıq komitəsinin iclasında üçüncü oxunuşda müzakirəyə çıxarılıb.

Qanun layihəsinə edilmiş əlavə və dəyişiklikləri maliyyə naziri Samir Şərifov təqdim edib.

Samir Şərifov çıxış edərək bildirib ki, 2024-cü ilin dövlət və icmal büdcələrinin layihələrinin olduğu kimi saxlanılması vacib hesab edilir.

Xatırladaq ki, gələn il dövlət büdcəsinin gəlirləri 34 173 000 min manat, xərcləri 36 763 000 min manat (o cümlədən, mərkəzləşdirilmiş gəlirləri 33 399 895 min manat, yerli gəlirləri 773 105,0 min manat, mərkəzləşdirilmiş xərcləri 35 980 547 min manat, yerli xərcləri 782 453,0 min manat), icmal büdcənin isə gəlirləri 38 998 000 min manat, xərcləri 42 376 000 min manat proqnozlaşdırılır.

Nazir qeyd edib ki, Azərbaycanda yeni yaradılan rayonla əlaqədar 2024-cü ilin dövlət büdcəsinin layihəsində bəzi korrektələrə ehtiyac yaranıb.

“İlk növbədə Ağdərə rayonunun yaradılması ilə əlaqədar onun adı büdcə layihəsinin 5-ci maddəsinə əlavə ediləcək”, - deyə o qeyd edib.

“Bundan başqa, meliorasiyaya ayrılan vəsait 7,3 milyon manat azaldılacaq, müvafiq olaraq həmin vəsait elm xərcləri bölməsinə əlavə ediləcək. Bununla yanaşı cari ildə qəbul edilmiş minimum əməkhaqqı üzrə qərarların icrası ilə əlaqədar Bakı şəhərinin yerli xərclərində, eyni zamanda Laçın rayonunun yerli xərclərində bəzi düzəlişlərin edilməsinə ehtiyac var. Bakının yerli xərclərinin 2,3 milyon, Laçının yerli xərclərinin isə 100 min manat artırlması nəzərə alınacaq”, - deyə nazir əlavə edib.

Bununla yanaşı, onun sözlərinə görə, büdcədə parlamentin və onun aparatının saxlanılması üçün ayrılan vəsait artırılıb: “Milli Məclisə ayrılan vəsaitin 252.5 min manat artırılması nəzərdən keçirilib və həllini tapıb”.

Qeyd edək ki, büdcədə Milli Məclisin və onun aparatının saxlanılması üçün 50,919 milyon manat vəsait nəzərdə tutulmuşdu. Xərclər smetasının ümumi dəyərinin 75,1 %-ni əməkhaqqı fondu və əməkhaqqı ilə əlaqədar ayırmalar təşkil edir.

Dövlət büdcəsinin əsas prioritet xərcləri...

Samir Şərifov qeyd edib ki, “2024-cü il dövlət büdcəsi haqqında” qanun layihəsində bəzi daxili dəyişikliklər edilib: "Sənəddə mənzil və kommunal təsərrüfat bölməsi üzrə 364 milyon 783 min 119 manat rəqəmi, 367 milyon 83 min 119 manat rəqəmi ilə, kənd təsərrüfatı bölməsi üzrə 1 milyard 109 milyon 893 min 587 manat rəqəmi, 1 milyard 102 milyon 593 min 587 manat rəqəmi ilə, ətraf mühitin mühafizəsi bölməsi üzrə 376 milyon 822 min 901 manat rəqəmi, 376 milyon 872 min 901 manat rəqəmi ilə, əsas bölməyə aid edilməyən xərclər bölməsi üzrə 1 milyard 392 milyon 674 min 201 manat rəqəmi, 1 milyard 390 milyon 324 min 201 manat rəqəmi ilə əvəz ediləcək", - deyə o qeyd edib.

Müzakirələrdən sonra qanun layihəsi parlamentin plenar iclasına tövsiyə edilib.

Sonra "Dövlət ehtiyatları haqqında" qanun layihəsi (ikinci oxunuş), "Antiinhisar fəaliyyəti haqqında", "İstehlakçıların hüquqlarının müdafiəsi haqqında", "Mülki müdafiə haqqında", "Taxıl haqqında", "Milli təhlükəsizlik haqqında", "Dövlət sirri haqqında", "Azərbaycan Respublikasında səfərbərlik hazırlığı və səfərbərlik haqqında" və "Qiymətli metallar və qiymətli daşlar haqqında" qanunlarda dəyişiklik edilməsi barədə qanun layihəsi (ikinci oxunuş), "Qiymətləndirmə fəaliyyəti haqqında" qanun layihəsi (üçüncü oxunuş), "Rəqabət Məcəlləsinin təsdiq edilməsi haqqında" qanun layihəsi (üçüncü oxunuş), "Dövlət sosial müdafiə fondunun 2024-cü il büdcəsi haqqında" qanun layihəsi (üçüncü oxunuş), "İşsizlikdən sığorta fondunun 2024-cü il büdcəsi haqqında" qanun layihəsi (üçüncü oxunuş), "2024-cü il üçün yaşayış minimumu haqqında" qanun layihəsi (üçüncü oxunuş), "2024-cü il üçün ehtiyac meyarının həddi haqqında" qanun layihəsi (üçüncü oxunuş), "Vergi Məcəlləsində dəyişiklik edilməsi haqqında" qanun layihəsi (üçüncü oxunuş), "Mülki Məcəlləndə dəyişiklik edilməsi haqqında" qanun layihəsi (üçüncü oxunuş), "Nağdsız hesablaşmalar haqqında" qanunda dəyişiklik edilməsi barədə" qanun layihəsi (üçüncü oxunuş), "Sığorta fəaliyyəti haqqında" qanunda dəyişiklik edilməsi barədə" qanun layihəsi (üçüncü oxunuş), "Banklar haqqında" qanunda dəyişiklik edilməsi barədə" qanun layihəsi (üçüncü oxunuş), "Gömrük tarifi haqqında" qanunda dəyişiklik edilməsi barədə" qanun layihəsi (üçüncü oxunuş) müzakirələrin ardından plenar iclasa tövsiyə olunub.

Paylaş:

Baxılıb: 659 dəfə