Cəbrayıla 16-cı köç...

Bakı:

26 °C

52 %

3 m/s

Əlaqə

AZ RU EN

Ana səhifə / Analitik / Cəbrayıla 16-cı köç...

Cəbrayıla 16-cı köç...

31.07.2025 [11:04]

166 nəfər doğma torpağına qovuşub

İşğaldan azad edilmiş ərazilərimizdə sözlə ifadə edilməyəcək tərzdə genişmiqyaslı bərpa və yenidənqurma işləri görülməkdədir. Sosial texniki infrastruktur yaradılır. Əhalinin dayanıqlı yerləşdirilməsi üçün tədbirlər görülür. Hazırda Qarabağda və Şərqi Zəngəzurda, oraya köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan insanların, ümumilikdə, sayı 50 mindən çoxdur.
Bu gün ordumuz tərəfindən azad edilən, yeni dövrünü yaşayan şəhərlərimizdən biri Cəbrayıldır. Dağıdılmış əraziləri yenidən qurmaq böyük güc, potensial və zaman tələb edir. Ölkəmizdə yenidənqurma, abadlıq və quruculuq işlərinin aparılması məqsədi ilə bütün güclər səfərbər olunub. Cəbrayılda çoxsaylı bərpa və quruculuq işləri görülüb və bu işlər yenə də sürətlə davam etməkdədir.

Cəbrayıla qayıdışın tarixləri...

Xatırladaq ki, Cəbrayıl şəhərinə ilk köç prosesi 26 sentyabr 2024-cü il tarixində gerçəkləşmişdi. Bu mərhələdə 36 ailə olmaqla, 117 nəfər doğma torpağına qovuşdu. Cəbrayıla 2-ci köç sentyabrın 28-i (41 ailə, 124 nəfər), 3-cü köç sentyabrın 30-u (40 ailə, 123 nəfər), 4-cü köç noyabrın 7-i (30 ailə, 150 nəfər), 5-ci köç noyabrın 29-u (40 ailə, 200 nəfər), 6-cı köç dekabrın 2-si (34 ailə, 129 nəfər), 7-ci köç 25 dekabr 2024-cü il (49 ailə 253 nəfər), 8-ci köç 13 yanvar 2025-ci il (39 ailə, 165 nəfər), 9-cu köç 16 yanvar 2025-ci il (32 ailə, 153 nəfər), 10-cu köç 18 yanvar 2025-ci il (42 ailə, 206 nəfər), 11-ci köç 17 fevral 2025-ci il (42 ailə, 205 nəfər), 12-ci köç 19 fevral 2025-ci il (37 ailə, 212 nəfər), 13-cü köç 21 fevral 2025-ci il (33 ailə 183 nəfər), 14-cü köç 22 iyul 2025-ci il (53 ailə, 198 nəfər), 15-ci köç isə 25 iyul 2025-ci il (50 ailə, 199 nəfər) tarixlərində baş tutub.

Daha 44 ailə

Dünən “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”na əsasən Cəbrayıl şəhərinə növbəti - 16-cı köç prosesi gerçəkləşib. İyulun 30-da səhər saatlarında yola salınan ailələr doğma yurdlarına qovuşub.
Bu mərhələdə Cəbrayıl şəhərinə 44 ailə - 166 nəfər köçürülüb. Şəhərə qədəm qoyan ailələr sevinc göz yaşları ilə öz doğma yurduna qovuşub və Cəbrayıl şəhərində yaradılan gözəlliyi seyr ediblər. Qayıdan ailələr respublikanın müxtəlif ərazilərində yataqxana, sanatoriya və inzibati binalarda müvəqqəti məskunlaşmış ailələrdən ibarət olub.
Bu gün Cəbrayıl şəhəri yeni dövrünü yaşıyır. Ermənilər tərəfindən dağıdılmış əraziləri yenidən qurmaq böyük güc, potensial və zaman tələb edir. Bu işlərə dövlət başçımızın şəxsən nəzarət etməsi, onu deməyə əsas verir ki, tezliklə işğaldan azad edilən bütün ərazilərimiz cənnətə çevriləcək...

Yeganə BAYRAMOVA

Paylaş:

Baxılıb: 359 dəfə