Ukrayna böyük təhlükə qarşısında...

Bakı:

21 °C

88 %

1 m/s

Əlaqə

AZ RU EN

Ana səhifə / Analitik / Ukrayna böyük təhlükə qarşısında...

Ukrayna böyük təhlükə qarşısında...

23.05.2023 [11:05]

Qərb Baxmutun işğalından sonra Kiyevə dəstəyini daha da gücləndirir

Şahanə XANKİŞİYEVA

Baxmut uğrundakı döyüşlər Rusiya-Ukrayna müharibəsinin gedişatına yeni istiqamət verməkdədir. Bu amil həm də Qərbin prosesə diqqətini yenidən cəlb edir. Xatırladaq ki, Rusiya Müdafiə Nazirliyi Baxmut istiqamətində Vaqner dəstələrinin hücum hərəkətləri ilə bağlı məlumat yayıb. Məlumatda bildirilir ki, “Cənub” qüvvələr qrupunun artilleriya və aviasiyasının dəstəyi ilə Baxmut şəhəri alınıb. Yeri gəlmişkən, Ukrayna prezidenti Zelenski də faktı təsdiqlib. O, ABŞ prezidenti Co Baydenlə görüşündə ukraynalı əsgərlərin Baxmut şəhəri üzərində nəzarəti itirdiyini deyib.

Təbii ki, proses artıq daha ciddi hal alır - Qərb Rusiyaya qarşı Ukraynanı yenidən silahlandırmaq istiqamətində ciddi addımlar atır. Belə ki, ABŞ Müdafiə Nazirliyi Ukraynaya hərbi ehtiyaclarını ödəmək üçün dəyəri 375 milyon dollara qədər yardım etdiyini bildirib: “Birləşmiş Ştatlar Ukraynanın döyüş meydanındakı təcili ehtiyaclarını və uzunmüddətli təhlükəsizlik yardımı ödəmək üçün müttəfiqləri və tərəfdaşları ilə işləməyə davam edəcək”.

Qərb problemin həlli ilə bağlı sülh danışıqlarını da istisna etmir. Məsələn, Yeddilik Qrupunun (G7) Xirosimada keçirilən sammitindən sonra keçirilən mətbuat konfransında danışan ABŞ prezidenti Co Bayden iddia edib ki, Vaşinqton Ukrayna ətrafındakı böhranı siyasi və diplomatik yollarla həll etməyə çalışır: “Tərəfdaş ölkələrlə birlikdə biz bir daha bəyan etdik ki, Ukraynanın suverenliyinə və ərazi bütövlüyünə hörmət edən ədalətli dünyaya - BMT Nizamnaməsinin əsas prinsiplərinə ehtiyac var”.

Qərbin Ukrayna ilə bağlı mövqeyinin paralel inkişafı gələcək perspektiv üçün nələr vəd edir? Bununla bağlı qəzetimizə açıqlamasında politoloq İlyas Hüseynov deyib ki, Rusiyanın Baxmutu ələ keçirməsi yeni müzakirələrə yol açıb. Çünki “Vaqner” qrupunun rəhbəri Priqojin Rusiya Müdafiə Nazirliyinin onlara lazımi silahların verilməməsini sərt tənqid ritorikası ilə bildirmişdi: “Lakin gözlənilmədən Baxmut şəhərinin tamamilə Rusiyanın nəzarətinə keçməsi xəbəri yayıldı. Bu məsələnin özü manipulyasiya informasiyası adlandırıla bilər. Ukrayna tərəfi müdafiə olundu, amma şəhəri əlində saxlaya bilmədi. Baxmut çox əhəmiyyətli və geostrateji mövqeyə sahib şəhərdir. Çünki bu şəhərin alınması qarşıdakı müddətdə bir sıra əhəmiyyətli yolların da nəzarətə götürülməsinə yol aça bilər. Ukrayna məhz bu səbəbdən Baxmutu çox ciddi şəkildə qoruyurdu. Amma Ukrayna silahlı qüvvələrinin bu şəhəri qətiyyətlə qorumasına baxmayaraq, şəhər əldə saxlanılmadı. Zelenskinin G7 zirvəsinə qatıldığı, burada NATO alyansına daxil olan dövlətlərlə müzakirələr apardığı bir dönəmdə hərbi sahədə itki yaşanır və Ukraynanın əks hücuma keçməsi ilə bağlı ehtimalların güclü olduğu bir zamanda belə bir hadisə baş verir”.

Politoloqun fikrincə, Qərbin Ukraynaya güclü dəstəyinə ehtiyac var. Onun sözlərinə görə, hətta Ukraynada gələcəkdə insan resursu ilə bağlı təhlükəli hallar belə yaşana bilər. “Görünür, Rusiya öz hədəflərinə çatmaqda israrlıdır. Rusiyanın əsas istəyi ələ keçirdiyi ərazilərin qorunması, Ukraynanın əks hücumunun qarşısının alınmasıdır. Ukrayna da qarşısına böyük hədəflər qoyub. Hətta Krımın azad olunması haqqında da Zelenski dəfələrlə bildirib. Lakin Baxmutda baş verənlər onu göstərir ki, Krımın azad olunması barədə danışmaq hələ tezdir. Baş verənlər Ukrayna ərazisində gedən müharibənin uzun müddət davam edəcəyini deməyə əsas verir”, - deyə İ.Hüseynov əlavə edib.

Paylaş:

Baxılıb: 1344 dəfə