Tarixi Zəfərin yaratdığı yeni reallıqlar regiona sülh və sabitlik vəd edir

Bakı:

15 °C

94 %

1 m/s

Əlaqə

AZ RU EN

Ana səhifə / Arxiv / Tarixi Zəfərin yaratdığı yeni reallıqlar regiona sülh və sabitlik vəd edir

Tarixi Zəfərin yaratdığı yeni reallıqlar regiona sülh və sabitlik vəd edir

04.11.2025 [11:58]

“5 il əvvəl Azərbaycan Respublikasının Prezidenti, Ali Baş Komandan İlham Əliyevin rəhbərliyi altında Azərbaycan Ordusu elə bir uğur əldə etdi ki, nəinki Cənubi Qafqazda, ümumən regionda yeni reallıqların və əməkdaşlıq mühitinin formalaşmasına təkan verdi”.

Bu sözləri Yeni Azərbaycan Partiyasının (YAP) Göygöl rayon təşkilatının sədr müavini Zamir Hüseynov deyib. Onun sözlərinə görə, 2020-ci il sentyabrın 27-də Ermənistan Silahlı Qüvvələrinin növbəti təxribatlarına cavab olaraq Milli Ordumuz doğma torpaqlarımızın düşməndən azad olunması naminə genişmiqyaslı hərbi əməliyyata başladı və 8 noyabr 2020-ci il tarixində xalqın həsrətlə gözlədiyi bir bəyanat səsləndirildi: “Ölkəmizin milli və dövlətçilik maraqlarını daim üstün tutan Prezident, Müzəffər Ali Baş Komandan İlham Əliyev Şuşa şəhərinin azad olunması münasibətilə xalqa müraciət etdi. Bildirdi ki, 28 il yarım işğal altında olan Şuşa azad edildi! Şuşa indi azaddır! Biz Şuşaya qayıtmışıq!”.

Z.Hüseynov onu da vurğulayıb ki, Tarixi Zəfəri tamamlayan mühüm hadisə 2023-cü il sentyabrın 20-də Azərbaycan Ordusunun həyata keçirdiyi lokal xarakterli antiterror tədbirlərinin uğurla başa çatması oldu: “Azərbaycan Respublikası bununla özünün bütün ərazisində suveren hüquqlarını təmin etdi. Son 200 ildə ilk dəfə öz torpaqlarını böyük imperiyaların caynaqlarından xilas edərək parlaq uğur qazanan Müzəffər Prezidentimiz, Ali Baş Komandan İlham Əliyevin liderliyilə rəşadətli Milli Ordumuz çağdaş dünya tarixinə əbədi iz qoyan Zəfər tarixi yazdı. Bu, milli qeyrət və şərəf savaşı idi. Azərbaycan igid, qeyrətli əsgər və zabitləri bu ölüm-dirim, şərəf davasından qalib çıxdılar”.

“Noyabrın 8-də 5 illiyini qeyd edəcəyimiz Tarixi Qələbə Azərbaycan xalqının və Ordusunun birliyini, əzmini göstərdi. Xalqın Orduya göstərdiyi dəstək hər bir vətəndaşın bu müharibədə özünü iştirakçı kimi hiss etməsinə səbəb oldu”, – deyə bildirən Z.Hüseynovun sözlərinə görə, Azərbaycan xalqının vətənpərvərlik ruhu müharibə dövründə daha da gücləndi, xalqın milli kimliyə olan bağlılığı və torpaqların azad edilməsi uğrunda göstərdiyi qətiyyət ordunun mübarizəsinə böyük dəstək olaraq, Azərbaycan xalqının və Silahlı Qüvvələrimizin vahid məqsəd uğrunda necə birləşə bildiyini nümayiş etdirdi.

Z.Hüseynov onu da xatırladıb ki, Azərbaycan Prezidentinin 2020-ci il dekabrın 3-də imzaladığı Sərəncama əsasən, noyabrın 8-i bayram günləri sırasına daxil edildi və hər il Azərbaycanda Zəfər Günü kimi böyük coşqu ilə qeyd edilir.

“44 günlük Vətən müharibəsində Azərbaycan Silahlı Qüvvələrinin tətbiq etdiyi hərbi strategiya, müasir döyüş texnikası və taktikası ilə apardığı döyüş əməliyyatları, qısa müddətdə Qələbə qazanması yeni kimi bir çox ölkənin hərbi araşdırma mərkəzlərində təhlil olunur”, – deyən YAP Göygöl təşkilatının sədr müavini bildirib ki, Azərbaycan iqtisadi sabitliyi və resursların düzgün yönləndirilməsini təmin edərək müharibə aparmaq üçün vacib olan dəstəyi əldə etmiş, 44 günlük müharibə dövründə Prezident İlham Əliyevin beynəlxalq arenada aktiv diplomatik fəaliyyəti müharibənin gedişində və nəticəsində böyük rol oynamışdır.

Zamir Hüseynov sonda bəyan edib ki, indi dünyanın müxtəlif regionlarında iqtisadi çətinliklər, böhranlar olsa da, Azərbaycan dövləti iqtisadiyyatı dayanıqlı olduğu üçün ölkə azad edilmiş torpaqlarda genişmiqyaslı quruculuq işləri həyata keçirir: “44 günlük Vətən müharibəsinin nəticəsini, eyni zamanda regionda uzunmüddətli geosiyasi, iqtisadi və regional təsirlər yaradan strateji nailiyyət hesab etmək olar. Çünki həmin Tarixi Zəfərlə Cənubi Qafqazda təhlükəsizlik, sülh və sabitliyin əsası qoyuldu, torpaqlarımızın azad edilməsi ilə Azərbaycan Respublikası yeni iqtisadi və nəqliyyat layihələri həyata keçirmək imkanı qazandı. 8 Noyabr - Zəfər Günü Azərbaycanın siyasi rəhbərliyi, xalq və ordu birliyinin, qətiyyətinin və vətənpərvərlik ruhunun rəmzidir. Azərbaycan bu Qələbəsi ilə tarixi ədaləti bərpa etdi, eyni zamanda Tarixi Zəfərin yaratdığı yeni reallıqlar regiona sülh və sabitlik vəd edir”.

Paylaş:

Baxılıb: 575 dəfə