“Zərifə Əliyeva-Elmə ,şəfqətə və insanlığa həsr olunmuş ömür” mövzusunda elmi-praktiki konfrans keçirilib

Bakı:

14 °C

88 %

5 m/s

AZ RU EN

Ana səhifə / Arxiv / “Zərifə Əliyeva-Elmə ,şəfqətə və insanlığa həsr olunmuş ömür” mövzusunda elmi-praktiki konfrans keçirilib

“Zərifə Əliyeva-Elmə ,şəfqətə və insanlığa həsr olunmuş ömür” mövzusunda elmi-praktiki konfrans keçirilib

28.04.2026 [17:40]

28.04.2026-cı il tarixdə Qubadlı Rayon Mərkəzi Xəstəxanasının və Yeni Azərbaycan Partiyası Qubadlı Rayon Təşkilatının birgə təşkilatçılığı ilə görkəmli oftalmoloq-alim, akademik Zərifə xanım Əliyevanın anadan olmasının 103 illiyinə həsr olunmuş “Zərifə Əliyeva-Elmə, şəfqətə və insanlığa həsr olunmuş ömür” mövzusunda elmi-praktiki konfrans keçirilmişdir.

Konfransda YAP Qubadlı Rayon Təşkilatının sədri Təhmasib Rüstəmov, Qubadlı RMX-nın direktoru Yaşar Həsənov, RMX-nın şöbə müdirləri və məsul şəxsləri, RMX-ya tabeli tibb müəsssisələrinin rəhbərləri, YAP Qubadlı rayon təşkilatının nümayəndəsi, Qubadlı Gigiyena və Epidemiologiya Mərkəzinin rəhbəri və nümayəndəsi iştirak ediblər.

Tədbir Ulu Öndər Heydər Əliyevin, akademik Zərifə Əliyevanın və torpaqlarımızın bütövlüyü uğrunda şəhid olmuş qəhrəmanların xatirəsinin bir dəqiqəlik sükutla anılması ilə başlayıb.

Daha sonra Zərifə Əliyeva haqqında videoçarx nümayiş olunub.

Tədbiri giriş sözü ilə açan direktor Yaşar Həsənov qeyd edib ki, Zərifə xanımın həyat yolu Azərbaycan qadını üçün örnək məktəbdir. O, təkcə tibb sahəsində deyil, eyni zamanda insanlara olan münasibəti, yüksək mənəviyyatı və nümunəvi ailə dəyərləri ilə də hər zaman seçilib. Onun peşəkar həkimlik fəaliyyəti və təklif etdiyi yeni müalicə üsulları sayəsində on minlərlə insanın görmə qabiliyyəti bərpa olunub, minlərlə insan qlaukoma xəstəliyindən xilas edilib. Zərifə Əliyevanın çoxcəhətli elmi və tibbi fəaliyyəti təkcə öz dövrü üçün deyil, bu gün üçün də mühüm əhəmiyyət kəsb edir. Bu məktəbin yetirmələri Azərbaycanda oftalmologiya elminin inkişafına əhəmiyyətli töhfələr verirlər.

Yeni Azərbaycan Partiyası Qubadlı Rayon Təşkilatının sədri Təhmasib Rüstəmov isə çıxışında vurğulayıb ki, Tibb elmində silinməz izlər qoymuş, səhiyyəmizə böyük töhfələr vermiş akademik Zərifə xanım Əliyevanı xatırlayanda göz önündə mənəvi kamilliyinin ən uca zirvəsində dayanan görkəmli elm fədaisinin işıqlı çöhrəsi canlanır. Onun simasında nəcib Azərbaycan qadını, vəfalı ömür-gün yoldaşı, fədakar ana obrazı görürük. Dərin bilik, insanpərvərlik, Vətənə məhəbbət və xeyirxahlıq kimi keyfiyyətlər Zərifə xanımın portretini tamamlayan əsas cizgilərdir. Zərifə xanım Ümummilli Liderlə çiyin-çiyinə addımlayır, qayğısına qalır, çətin günlərdə ona arxa-dayaq olurdu. Övladlarını vətənin layiqli övladları kimi, öz nəslinin yüksək mənəvi dəyərlərinin varisi kimi yetişdirirdi. Öz peşəsini sevərək yüksəlmiş Zərifə xanım oftalmologiya elminin inkişafına dəyərli töhfələr verib, bu sahə üzrə yüksək ixtisaslı kadrlar yetişdirilməsinə böyük əmək sərf edib.

Digər çıxış edənlər də bildiriblər ki, Azərbaycan xalqına xas nəcib keyfiyyətlər, ali dəyərlər Zərifə Əliyevanın şəxsiyyətində cəmləşmişdi. İnsanlara nur bəxş edən, qayğıkeşliyi, nəcibliyi ilə xatirələrdə əbədi yaşayan Zərifə Əliyeva nümunəvi həyat yolu keçib.

Sonda yeni qəbul olunmuş partiya üzvlərinə YAP Qubadlı Rayon Təşkilatı tərəfindən yeni üzvlük vəsiqələri təqdim edilmişdir.

Paylaş:

Baxılıb: 335 dəfə