Strateji tərəfdaşlıq güclənir

Bakı:

25 °C

58 %

6 m/s

Əlaqə

AZ RU EN

Ana səhifə / Arxiv / Strateji tərəfdaşlıq güclənir

Strateji tərəfdaşlıq güclənir

05.05.2026 [13:42]

Azərbaycan Respublikasının Prezidenti cənab İlham Əliyev və İtaliya Respublikası Nazirlər Şurasının sədri Ciorcia Meloni mətbuata bəyanatlarla çıxış ediblər. Cənab Prezident İlham Əliyevin səsləndirdiyi fikirlər Azərbaycan ilə İtaliya arasında münasibətlərin yeni siyasi mərhələyə qədəm qoyduğunu aydın şəkildə nümayiş etdirir. Bu bəyanat təkcə ikitərəfli əlaqələrin cari vəziyyətini deyil, həm də gələcək istiqamətlərini müəyyən edən strateji baxışın ifadəsi kimi çıxış edir. Ciorcia Meloninin Bakıya səfəri isə bu baxışın praktik müstəvidə reallaşmasının növbəti addımıdır. Regionda baş verən proseslər fonunda bu səfər xüsusi siyasi çalar qazanır. İtaliya Baş nazirinin Cənubi Qafqazda apardığı diplomatik təmasların məntiqi davamı kimi Azərbaycana gəlməsi rəsmi Bakının artan siyasi çəkisinin göstəricisi kimi təqdim olunur. Bu, həm də Azərbaycanın regional balansın formalaşmasında mühüm aktor olduğunu təsdiqləyən amildir.

Azərbaycan ilə İtaliya arasında dialoq yüksək səviyyədə və davamlı xarakter daşıyır. İllər ərzində formalaşmış hüquqi baza bu münasibətləri sabit və proqnozlaşdırılan edir. Cənab Prezidentin vurğuladığı məqam ondan ibarətdir ki, tərəfdaşlıq artıq formal çərçivədən çıxaraq real siyasi koordinasiyaya çevrilib. Bu koordinasiya beynəlxalq məsələlərdə də özünü göstərir və tərəflərin bir-birinə etibarlı tərəfdaş kimi yanaşdığını ortaya qoyur. İkitərəfli münasibətlərdə enerji faktoru əsas aparıcı qüvvə olaraq qalır. Azərbaycan Avropanın enerji təhlükəsizliyində mühüm rol oynayır və İtaliya bu əməkdaşlığın əsas benefisiarlarından biridir. Qaz və neft sahəsində mövcud əlaqələr qarşılıqlı maraqlara əsaslanan uzunmüddətli tərəfdaşlıq modelini formalaşdırır. Bu çərçivədə Trans Adriatic Pipeline layihəsinin genişləndirilməsi məsələsi xüsusi əhəmiyyət kəsb edir. Bu addım yalnız iqtisadi deyil, həm də siyasi baxımdan Avropa ilə Azərbaycan arasında bağları daha da möhkəmləndirir. İtaliya ilə Azərbaycan arasında iqtisadi münasibətlər yüksək dinamika ilə inkişaf edir. Ticarət dövriyyəsinin böyük həcmi və qarşılıqlı investisiyalar bu əlaqələrin dayanıqlı olduğunu göstərir. Azərbaycanın İtaliya iqtisadiyyatına yatırdığı vəsaitlər tərəfdaşlığın qarşılıqlı fayda prinsipi üzərində qurulduğunu nümayiş etdirir. Bu proses gələcəkdə daha genişmiqyaslı iqtisadi inteqrasiyanın mümkünlüyünü göstərir və tərəflər arasında əməkdaşlığın yeni mərhələyə keçəcəyindən xəbər verir.

Münasibətlərin inkişafında diqqət çəkən istiqamətlərdən biri də hərbi-texniki əməkdaşlıqdır. Bu sahədə xnologiya mübadiləsi Azərbaycanın sənaye və müdafiə imkanlarının gücləndirilməsinə xidmət edir. Bu, eyni zamanda, tərəflərin qarşılıqlı maraqlara əsaslanan yeni əməkdaşlıq modelini formalaşdırdığını göstərir. İtaliya şirkətlərinin azad edilmiş ərazilərdə fəaliyyəti xüsusi siyasi və iqtisadi məna daşıyır. Bu iştirak Azərbaycanın bərpa strategiyasının beynəlxalq dəstək qazandığını göstərir. Həyata keçirilən layihələr regionun iqtisadi dirçəlişinə təkan verir və xarici tərəfdaşların bu prosesə marağını artırır. Bu kontekstdə İtaliya Azərbaycanın əsas tərəfdaşlarından biri kimi önə çıxır. Humanitar sahədə əməkdaşlıq uzunmüddətli münasibətlərin təminatçısı kimi çıxış edir. Bakıda yaradılmış İtaliya-Azərbaycan Universiteti iki ölkə arasında intellektual əlaqələrin inkişafına xidmət edir. Burada yetişən kadrlar gələcəkdə əməkdaşlığın davamlılığını təmin edən əsas resursa çevriləcək. Bu yanaşma münasibətlərin yalnız bu günə deyil, gələcəyə hesablandığını göstərir.

Cənab Prezident İlham Əliyevin bəyanatı onu göstərir ki, Azərbaycan ilə İtaliya arasında münasibətlər artıq çoxşaxəli və strateji səviyyədə formalaşıb. Siyasi dialoq, enerji əməkdaşlığı, iqtisadi əlaqələr və humanitar təşəbbüslər bu tərəfdaşlığın əsas sütunlarını təşkil edir. Ümumilikdə, ortaya çıxan mənzərə iki ölkə arasında münasibətlərin daha da möhkəmlənəcəyini və bu əməkdaşlığın regional və beynəlxalq siyasətdə mühüm rol oynamağa davam edəcəyini deməyə əsas verir.

David İbramxəlilov,
YAP Qusar rayon təşkilatının sədri

Paylaş:

Baxılıb: 371 dəfə