Masallıda “Heydər Əliyev. Şəxsiyyət və zaman” çoxcildliyinin beşinci cildinin təqdimatı olub

Bakı:

16°C

82%

2m/s

AZ RU EN

Ana səhifə / Daxili siyasət / Masallıda “Heydər Əliyev. Şəxsiyyət və zaman” çoxcildliyinin beşinci cildinin təqdimatı olub

Masallıda “Heydər Əliyev. Şəxsiyyət və zaman” çoxcildliyinin beşinci cildinin təqdimatı olub

21.11.2013 [09:36]

Noyabrın 20-də Masallı şəhərindəki Heydər Əliyev Mərkəzində tanınmış yazıçı-publisist, Milli Məclisin deputatı Elmira Axundovanın “Heydər Əliyev. Şəxsiyyət və zaman” çoxcildlik roman-tədqiqatının 5-ci cildinin təqdimatı olub.
AzərTAc xəbər verir ki, tədbir iştirakçıları əvvəlcə Ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad edib, sonra AzTV-nin istehsalı olan “Elmira” sənədli filminə tamaşa ediblər.
Mərasimdə çıxış edən Yeni Azərbaycan Partiyası Masallı rayon təşkilatının sədri Seyfəddin Əliyev Elmira Axundovanın “Heydər Əliyev. Şəxsiyyət və zaman” kitabının Ulu öndər Heydər Əliyevin 90 illik yubileyinə layiqli töhfə olduğunu vurğulayaraq çoxcildlik roman-tədqiqatın 1-4-cü cildlərinin də təqdimatının Masallıda keçirildiyini diqqətə çatdırıb.
S.Əliyev Masallı rayonunun çoxsaylı oxucuları adından Elmira Axundovanı əlamətdar hadisə münasibətilə təbrik edib.
Masallı rayon Mahmudavar kənd tam orta məktəbinin tarix müəllimi Musarza Mirzəyev “Heydər Əliyev. Şəxsiyyət və zaman” çoxcildlik roman-tədqiqatın 2013-cü ildə çapdan çıxmış 5-ci cildi haqqında məruzə edib.
Qeyd olunub ki, Heydər Əliyevin mənalı və zəngin ömür yolu böyük məktəbdir. 726 səhifədən ibarət olan kitabın 5-ci cildi Ulu öndərin 1990-1993-cü illərdə Naxçıvan Muxtar Respublikasındakı fəaliyyətini əks etdirir. Kitabda Ulu öndərin həyat və fəaliyyəti ilə bağlı maraqlı epizodlar verilib, blokadaya alınmış Naxçıvandakı vəziyyət real hadisələr fonunda oxuculara çatdırılıb.
Bildirilib ki, Elmira Axundovanın gərgin əməyi nəticəsində ərsəyə gələn bu əsərdə Ümummilli lider Heydər Əliyevin zəngin həyatı və fəaliyyəti ilə bağlı olduqca maraqlı məlumatlar yer alıb.
Diqqətə çatdırılıb ki, yeni cilddə Masallı rayonunun tanınmış ziyalısı Şirvan Əbilovun Heydər Əliyevlə görüşü barədə də məlumat verilib.
Toplantıda çıxış edən Prezident təqaüdçüsü Şirvan Əbilov Elmira Axundovanın bu əsərinin həm indiki, həm də gələcək nəsillərin ömrünü öz xalqının tərəqqisi və inkişafına həsr etmiş, yorulmadan Azərbaycanın xoş gələcəyi naminə çalışmış Ulu öndər Heydər Əliyevin həyatını və dövlətçilik fəaliyyətini yaxından öyrənmələri baxımından zəngin mənbə olduğunu vurğulayaraq Ulu öndərlə bağlı xatirələrindən, Onunla keçirdiyi görüşlərdən danışıb.
Masallı rayonunun Təzə Alvadı uşaq bağçası və körpələr evinin müdiri Göyçək Ələsgərova, şəhər 3 nömrəli tam orta məktəbinin müəllimi Sədəf Aqilzadə, ziyalı Ələşrəf Niftiyev kitabın bədii məziyyətlərindən danışıb, Elmira Axundovaya rayon əhalisinin ən xoş arzularını çatdırıblar.
Milli Məclisin deputatı Nəriman Əliyev çıxışında bu ilin aprel ayında Bakı şəhərində kitabın 5-ci cildinin təqdimatı barədə ətraflı məlumat verərək 10 illik gərgin əməyin bəhrəsi olan roman-tədqiqatın müəllifi Elmara Axundovanın yaradıcılıq əzmkarlığını yüksək qiymətləndirib.
Tədbirdə çıxış edən Masallı rayon İcra Hakimiyyətinin başçısı Rafil Hüseynov Elmira Axundovanı rayon əhalisi adından 60 illik yubileyi və roman-tədqiqatın 5-ci cildinin çapdan çıxması münasibətilə təbrik edərək kitabı tarixi əsər adlandırıb.
Heydər Əliyev irsinin tükənməz bir xəzinə olduğunu vurğulayan Rafil Hüseynov bu xəzinədən hamının bəhrələnə bildiyini diqqətə çatdırıb.
“Heydər Əliyev. Şəxsiyyət və zaman” çoxcildliyinin müəllifi Elmira Axundova əsərin ərsəyə gəlməsində ona dəstək olanlara təşəkkürünü bildirərək qeyd edib ki, 10 ilə yaxındır ki, roman üzərində çalışır. Romanın rus dilində artıq 7 cildi çapdan çıxıb.
Kitabın 5-ci cildi çox qısa bir vaxt kəsiyini əhatə etsə də (1990-1993-cü illəri) məzmun və həcmcə çox böyük bir kitabdır.
Bu illər Heydər Əliyevin həyatının dramatik, ən çətin bir dövri idi. Eyni zamanda Azərbaycanın və Naxçıvanın ən çətin bir dövrü idi. Bu dövrdə həm Azərbaycanda, həm SSR-i məkanında çox böyük hadisələr baş verirdi.
Müəllif deyib: “Kitabda xeyli eksklüziv material var. Burada 100-ə yaxın insan danışır. Mən onlarla şəxsən özüm görüşmüşəm. Heydər Əliyevlə işləmiş, Ona sadiq olan, o vaxt birgə mübarizə aparan insanlarla. Bu il Yeni Azərbaycan Partiyanın yaranmasının 21-ci ildönümünü qeyd edirik. Kitabda partiyanın tarixi ilə bağlı maraqlı məqamlar da əksini tapıb. Artıq kitabın 7-ci cildinin də Azərbaycan dilinə tərcüməsi hazırdır. Romanın beynəlxalq aləmdə yayılması prosesi başlayıb. Əsər rus dilində 7 cilddir, Azərbaycan dilində də 7 cild olacaq. Hazırda başqa bir 3 cildlik üzərində işləyirəm. Bu 3 cild bütün dünyada yayılacaq. Gələcəkdə “Heydər Əliyev və onun yaxın əhatəsi” və “Heydər Əliyev kadr arxasında” kitablarını yazmağı planlaşdırmışam”.
Tədbirin təşkilatçılarına və iştirakçılarına minnətdarlığını bildirən Elmira Axundova yaradıcılığının sonrakı illərini də Ümummilli lider Heydər Əliyevin mənalı ömür yoluna həsr edəcəyini bildirib.
Sonra rayonun musiqiçiləri Ulu öndər Heydər Əliyevin sevdiyi və Ona həsr olunmuş mahnıları ifa ediblər.