Azərbaycanda dilindən, dinindən, etnik mənsubiyyətindən asılı olmayaraq hər bir vətəndaş üçün demokratik-hüquqi və mədəni-mənəvi şərait yaradılıb

Bakı:

17°C

77%

5m/s

AZ RU EN

Ana səhifə / Daxili siyasət / Azərbaycanda dilindən, dinindən, etnik mənsubiyyətindən asılı olmayaraq hər bir vətəndaş üçün demokratik-hüquqi və mədəni-mənəvi şərait yaradılıb

Azərbaycanda dilindən, dinindən, etnik mənsubiyyətindən asılı olmayaraq hər bir vətəndaş üçün demokratik-hüquqi və mədəni-mənəvi şərait yaradılıb

24.06.2014 [09:47]

Azərbaycan Respublikasının millətlərarası, multikulturalizm və dini məsələlər üzrə Dövlət müşaviri Kamal Abdullayev Bərdə şəhərində ziyalılar, din xadimləri və ağsaqqallarla görüş keçirib.
AzərTAc xəbər verir ki, görüş iştirakçıları əvvəlcə ölkəmizdə dövlət-din münasibətlərinin tənzimlənməsində müstəsna xidmətlər göstərmiş Ulu öndərin abidəsi önünə çiçək dəstələri düzərək xatirəsinə ehtiramlarını bildirib, Heydər Əliyev Mərkəzində dahi rəhbərin həyat və fəaliyyətini əks etdirən ekspozisiyalarla tanış olublar.
Heydər Əliyev Mərkəzində keçirilən görüşdə Azərbaycanda etnik-dini durum barədə ətraflı fikir mübadiləsi aparılıb, ölkəmizdə tarixən müxtəlif millətlər arasında dostluq münasibətlərinin, sivilizasiyalararası və mədəniyyətlərarası dialoqun, çoxəsrlik ənənələrə malik tolerantlıq mühitinin, ayrı-ayrı dinlər və etiqadlar arasında qarşılıqlı hörmət və etimada əsaslanan əməkdaşlıq münasibətlərinin hökm sürdüyü vurğulanıb. Qeyd olunub ki, Azərbaycanın tarixi inkişaf xüsusiyyətləri, əlverişli coğrafi mövqeyi, əhalisinin etnik tərkibi və digər amillər burada bir sıra dinlərin mövcudluğuna şərait yaradıb. Tarixin müəyyən dövrlərində ölkəmizdə bütpərəstlik, zərdüştlük, iudizm, xristianlıq, islam və s. din və cərəyanlar yayılmış və bir-birinə qarşılıqlı təsir göstərib.
Dövlət müşaviri Kamal Abdullayev xalqımızın Ümummilli lideri Heydər Əliyev tərəfindən əsası qoyulmuş dövlət-din münasibətlərindən, tolerantlıq sahəsində ölkəmizdə həyata keçirilən fəaliyyət və layihələrdən, multikulturalizm ənənələrinin qorunub saxlanması və inkişaf etdirilməsi istiqamətində həyata keçirilən dövlət siyasətindən danışıb.
Bərdə Cümə məscidinin axundu Hacı Ramazan Hüseynov, ağsaqqallar adından Adil Hüseynov və başqaları çıxış edərək bildiriblər ki, ölkəmizdə milli-mənəvi dəyərlərə, tarixi-dini abidələrə, eləcə də dini icmaların və din xadimlərinin fəaliyyətinə yüksək qayğı göstərilir. Dilindən, dinindən, etnik mənsubiyyətindən asılı olmayaraq hər bir vətəndaş üçün demokratik-hüquqi və mədəni-mənəvi şərait yaradılıb. Qeyd olunub ki, bu şəraitdən sui-istifadə edən bəzi radikal dini cərəyan və təriqətlər gənclərin mənəvi duyğularını istismar etməklə onlardan müxtəlif məqsədlərlə istifadə olunmasına çalışırlar. Bunun qarşısının alınması üçün hamılıqla mübarizə aparmalıdır. Hər şeydən əvvəl cəmiyyətdə dini maarifləndirmə işi gücləndirilməlidir. Bu işdə ağsaqqalların, dindarların və ziyalıların üzərinə mühüm vəzifələr düşür.
Səmimi dialoq şəraitində keçən görüşdə rayon ziyalıları müxtəlif təkliflər irəli sürüblər.
Sonra dövlət müşaviri Bərdə şəhər məscidində və İmamzadə ziyarətgahında olub, din xadimləri ilə söhbətlər aparıb.

Paylaş:

Baxılıb: 1180 dəfə