Numan Kurtulmuş: “Çanaqqala savaşında çiyin-çiyinə döyüşənlərin nəvələriyik”

Bakı:

16 °C

36 %

13 m/s

Əlaqə

AZ RU EN

Ana səhifə / Dünya / Numan Kurtulmuş: “Çanaqqala savaşında çiyin-çiyinə döyüşənlərin nəvələriyik”

Numan Kurtulmuş: “Çanaqqala savaşında çiyin-çiyinə döyüşənlərin nəvələriyik”

05.08.2025 [17:04]

Türkiyə Böyük Millət Məclisində (TBMM) “Terrorsuz Türkiyə” hədəfi ilə yaradılan xüsusi komissiya bu gün ilk iclasını keçirib. Açılış nitqi ilə çıxış edən TBMM sədri Numan Kurtulmuş, Türkiyənin yarım əsrdən artıq davam edən terrorla mübarizəsində yeni bir mərhələyə qədəm qoyulduğunu bəyan edib.

Kurtulmuş çıxışında komissiyanın əsas missiyasının Türkiyəni terror bəlasından tamamilə xilas etmək və ictimai barışı gücləndirmək olduğunu bildirib. “Silahların tam susması və təşkilatın özünü buraxması heç bir fərdin, qurumun və ya siyasi quruluşun deyil, birbaşa əziz millətimizin iradəsinin nəticəsidir”, – deyə TBMM sədri vurğulayıb.

O, həmçinin qeyd edib ki, terror yalnız insan itkisinə deyil, eyni zamanda böyük iqtisadi və sosial itkilərə səbəb olub: “Əgər illərlə büdcəmizi terrorla mübarizəyə deyil, inkişafa yönəldə bilsəydik, bu gün daha çox məktəb, universitet və xəstəxana tikilmiş olardı. Ən ağır bədəli isə canla ödədik. Şəhidlərimiz və qazilərimiz bu prosesin mənəvi memarlarıdır.”

Numan Kurtulmuşun çıxışında ən diqqətçəkən məqamlardan biri Türk və Kürd xalqları arasındakı qardaşlıq mesajı olub. “Çanaqqala savaşında çiyin-çiyinə döyüşənlərin nəvələriyik. Qardaşlıq yalnız müharibə meydanlarında yox, acıda, ümiddə və alın təərindədir”, – deyə o qeyd edib. O, həmçinin Səlahəddin Eyyubi, Nurəddin Zəngi, Alp Arslan və Kılıcarslan kimi tarixi şəxsiyyətləri xatırladaraq, birgəyaşayış iradəsinin dərin tarixi köklərə dayandığını bildirib.

Kurtulmuş, Ahməd-i Xanəyi, Mehmet Akif Ərsoy və Nazim Hikmətin şeirlərinə istinad edərək, ictimai barış və qardaşlığın mədəni-sivil təməllərinə diqqət çəkib: “Xalqların qəlbi ədalətlə birgə döyünərsə, millət olar. Dil dəyişə bilər, coğrafiya dəyişə bilər, lakin ortaq hisslər qalıcıdır.”

TBMM sədri komissiyanın fəaliyyətinin üç əsas prinsip üzərində qurulacağını açıqlayıb: şəffaflıq, açıqlıq və çoğulçuluq.

“Bu proses həm türkün, həm də kürdün ortaq gələcəyini maraqlandıran bir məsələsidir. Burada aparılan işlər xalqın gözü önündə həyata keçiriləcək. Şəffaflıq – çünki millətimizin hər addımı bilməyə haqqı var. Açıqlıq – çünki gizli gündəmlər ictimai barışa xidmət etmir. Çoğulçuluq – çünki hər kəsin fikri əhəmiyyətlidir,” – deyə Kurtulmuş bildirib.

Komissiyanın işinə cəmiyyətin bütün təbəqələrinin – fikir adamlarının, ali təhsil müəssisələrinin, hüquq mühitinin və QHT-lərin qatılacağı gözlənilir. O, ictimai psixologiyanın düzgün idarə edilməsinin zəruriliyinə diqqət çəkərək deyib: “Kürdün şərəfini qorumayan, türkün qürurunu görməzlikdən gələn dil barışa yox, qırılmalara səbəb olar.”

Kurtulmuş çıxışında prosesin yalnız Türkiyə üçün deyil, region üçün də strateji əhəmiyyət daşıdığını bildirib. “Birinci Dünya Müharibəsindən sonra bir-birindən ayrılan, aralarına tikanlı məftillər çəkilən xalqlar artıq bir-birini yüksək səslə eşitməyi haqq edir. Atılan hər bir addım bu coğrafiyada sülh və qardaşlığı möhkəmləndirməyə yönəlib. Terrorsuz Türkiyə – əslində, terrorsuz bir bölgə deməkdir.”

Komissiyanın fəaliyyəti sadəcə məsləhətləşmələrlə və hesabatlarla məhdudlaşmayacaq. TBMM sədri bildirib ki, komissiya silahların yerə qoyulması prosesini xalq adından izləyəcək, zəruri qanunvericilik təşəbbüsləri hazırlayaraq parlamentin ümumi iradəsinə təqdim edəcək.

Çıxışının sonunda Kurtulmuş bu tarixi prosesi belə yekunlaşdırıb: “Bu masa millətin vicdanı, ağlı və inancı ilə qurulmuşdur. Demokratik, çoğulçu və hər kəsin özünü aid hiss etdiyi bir Türkiyəni birlikdə quracağıq. Allah yardımçımız olsun.”

Paylaş:

Baxılıb: 320 dəfə