Polşanın hava məkanına dronların daxil olması ilə əlaqədar Rusiya səfiri Fransa XİN-ə çağırılıb

Bakı:

27 °C

49 %

6 m/s

Əlaqə

AZ RU EN

Ana səhifə / Dünya / Polşanın hava məkanına dronların daxil olması ilə əlaqədar Rusiya səfiri Fransa XİN-ə çağırılıb

Polşanın hava məkanına dronların daxil olması ilə əlaqədar Rusiya səfiri Fransa XİN-ə çağırılıb

12.09.2025 [12:28]

Mənşəyi Rusiya olduğu ehtimal edilən dronlar Polşanın hava məkanına qanunsuz şəkildə daxil olub.

AZƏRTAC xəbər verir ki, Fransanın xarici işlər naziri vəzifəsindən istefa vermiş Jan-Noel Barro “France Inter” radiosuna verdiyi açıqlamada bildirib: “Bu insidentə cavab olaraq, Rusiyanın Parisdəki səfiri Fransanın Xarici İşlər Nazirliyinə (XİN) çağırılıb. Biz ona deyəcəyik ki, qorxmayacağıq, geri çəkilməyəcəyik. NATO və onun müttəfiqləri dünyanın ən güclü müdafiə gücünə malikdir. Rusiya bizi sınamağı və qorxutmağa çalışmağı dayandırmalıdır”.

Jan-Noel Barro dron hadisəsinin qəza olmasından asılı olmayaraq, bunun qəbuledilməz sayıldığını deyib.

“Bu, yeni bir şey deyil. Rusiya tərəfindən qəsdən həyata keçirilən bir strategiyadır – bizi qorxutmaq, reaksiyamızı yoxlamaq məqsədi daşıyır. Amma Avropa ölkələri və NATO birlikdə sınanmamalı olan hərbi gücə sahibdir”, - deyə o əlavə edib.

Fransa Prezidenti Emmanuel Makron dünən axşam üç ədəd “Rafale” qırıcı təyyarəsinin Polşanın hava məkanını qorumaq məqsədilə göndərildiyini elan edib.

“Bu təyyarələrə hava məkanını müşahidə etmək və lazım gəldikdə təhlükəli dronları aşkar edib məhv etmək tapşırığı verilib. Digər ölkələr də bu təşəbbüsə qoşulacaq”, - deyə Barro vurğulayıb.

Varşavanın tələbi ilə NATO Atlantika Müqaviləsinin 4-cü maddəsini aktivləşdirib. Bu maddə, üzv dövlətlərdən birinə qarşı təhlükə yarandıqda, müttəfiqlər arasında məsləhətləşmələrin aparılmasını nəzərdə tutur.

Barro qeyd edib ki, NATO bu təhdidlərə qarşı hazırlaşır. Rusiya Avropa ölkələri ilə NATO müttəfiqlərinin bir-birindən ayrı düşdüyünü düşünürsə böyük bir səhv edir.

O, qarşıdan gələn bazar ertəsi günü Avropa İttifaqının 19-cu sanksiyalar paketini təqdim edəcəyini bildirib. Bu paket, ABŞ-da Donald Trampın yenidən hakimiyyətə gəlməsindən sonra birbaşa onunla koordinasiya olunmuş ilk sanksiyalar paketi olacaq. “Bu sanksiyalar paketi, Vladimir Putinin apardığı işğalçı və kolonial müharibəyə, onun bu müharibəyə sərf etdiyi resurslara qarşı çox böyük təzyiq yaradacaq. Məqsəd, Putinin hesablamalarını dəyişmək və onu atəşkəsə razı salmaqdır”, -deyə Barro əlavə edib.

Avropanın təhlükəsizliyi üçün ciddi narahatlıq doğuran bu son insident, Fransa və NATO-nun qəti mövqeyini bir daha ortaya qoyur. Diplomatik gərginlik artarkən, həm hərbi, həm də siyasi tədbirlər intensivləşir.

Paylaş:

Baxılıb: 528 dəfə