Ermənistan müharibə cinayətlərini davam etdirir

Bakı:

24 °C

73 %

7 m/s

Əlaqə

AZ RU EN

Ana səhifə / Dünya / Ermənistan müharibə cinayətlərini davam etdirir

Ermənistan müharibə cinayətlərini davam etdirir

15.09.2020 [08:49]

Ekspertlərin qeyd etdikləri kimi, təcavüzkar dövlət qeyri-qanuni məskunlaşdırma siyasəti həyata keçirməklə işğal etdiyi Azərbaycan ərazilərində demoqrafik vəziyyəti dəyişməyə çalışır
Məlum olduğu kimi, Ermənistan işğal olunmuş Azərbaycan torpaqlarında qeyri-qanuni məskunlaşdırma siyasətini davam etdirməkdədir. Belə ki, Livandan gətirilən erməni ailələrin işğal altındakı Dağlıq Qarabağda yerləşdirilməsi faktları təsdiqlənir. Artıq onların Azərbaycan xalqı üçün böyük tarixi və mənəvi əhəmiyyətə malik Şuşa şəhərində yerləşdirilməsi barədə məlumatlar yayılıb. Qeyd etmək lazımdır ki, 1949-cu il Cenevrə Konvensiyası və ona əlavə Protokollara zidd olan bu köçürməni həyata keçirməkdə Ermənistanın əsas məqsədi Azərbaycanın işğal olunmuş ətraf rayonlarının etnik strukturunu, demoqrafik vəziyyətini öz lehinə dəyişməkdir. Bununla yanaşı, Ermənistanın Suriya və Livandan işğal olunmuş ərazilərə köçürülmüş insanları silahlı muzdlular kimi də istifadə etməsi əsas məqsədlərdəndir.
Ümumiyyətlə, beynəlxalq hüquqa əsasən, işğalçı dövlət tərəfindən zəbt olunmuş ərazilərdə məskunlaşma siyasətinin aparılması müharibə cinayəti kimi tövsif edilməlidir. Yeri gəlmişkən, məsələyə münasibət bildirən Milli Məclisin deputatı Ceyhun Məmmədov deyib ki, Azərbaycanın işğal olunmuş ərazilərində həyata keçirilən qeyri-qanuni məskunlaşdırma siyasətinin heç bir hüquqi qüvvəsi yoxdur. Onun sözlərin görə, bu addımlar, eyni zamanda, BMT-nin məlum qətnamələrinə və beynəlxalq hüquqa zidd əməllərdir. “Azərbaycan torpaqlarını işğal edən ermənilər indi orada qeyri-qanuni olaraq məskunlaşma siyasətini həyata keçirirlər. Eyni zamanda, bizim dini, tarixi abidələrimizi dağıdaraq məhv edirlər. Bu da onu göstərir ki, Ermənistan vandalizmlə məşğuldur”, - deyən deputat əlavə edib ki, beynəlxalq qurumlar Ermənistanı qeyri-qanuni əməllərdən çəkindirmək üçün işğalçı dövlətə təzyiq göstərməli və bu proseslərin qarşısı qəti surətdə alınmalıdır.
“Xalq cəbhəsi” qəzetinin baş redaktoru Elçin Mirzəbəylinin sözlərinə görə, işğal altında olan Azərbaycan ərazilərinin məskunlaşdırılması Nikol Paşinyan hakimiyyətinin əsas hədəflərindən biridir: “O, bununla ilk növbədə işğal altında olan Azərbaycan torpaqlarında tərəfdarlarının sayını artırmaq niyyətindədir. Hələlik isə Paşinyan rejiminin təmsilçiləri Azərbaycanın beynəlxalq müstəvidə səslənən etirazlarına cavab olaraq klassik erməni yalanlarına əl atmağı məqbul hesab edirlər”.
E.Mirzəbəyli ATƏT-in Minsk qrupunun həmsədrlərinin məsələyə səssiz qalmasının təəssüf doğurduğunu bildirib: “Görünür, Ermənistan-Azərbaycan Dağlıq Qarabağ münaqişəsinin tənzimlənməsi prosesinə maneə yaradan amillərin aradan qaldırılması üçün birbaşa məsuliyyət daşıyan ATƏT-in Minsk qrupunun həmsədrlərinin də danışmaq niyyətləri yoxdur. Halbuki işğal altında olan Azərbaycan ərazilərinin qanunsuz məskunlaşdırılması Ermənistanın işğala son qoymaq, sülh danışıqlarını davam etdirmək niyyətində olmadığını, əksinə, prosesi dalana dirəmək, mövcud status-kvonu qoruyub saxlamaq üçün bütün vasitələrə əl atacağını bir daha sübuta yetirir”.
Qaşqay ZİYƏDDİNOĞLU

Paylaş:

Baxılıb: 865 dəfə