Yeni imtahan modeli!

Bakı:

11 °C

87 %

7 m/s

Əlaqə

AZ RU EN

Ana səhifə / Elm / Yeni imtahan modeli!

Yeni imtahan modeli!

02.04.2025 [08:20]

Ekoloji cəhətən səmərəli...

Onlayın imtahanların üstün cəhətləri nədir?

Bir neçə müddətdir ki, ölkəmizdə rəqəmsal imtahanlara keçid üzrə işlər görülür. Bununla əlaqədar olaraq Dövlət İmtahan Mərkəzi (DİM) və Elm və Təhsil Nazirliyi müvafiq müzakirələr aparır. Ötən ay isə “Azərbaycan dili üzrə sertifikasiya imtahanı”nın onlayn platformasının təqdimat mərasimi keçirilib.

Tədbirdə çıxış edən Dövlət İmtahan Mərkəzinin (DİM) sədri Məleykə Abbaszadə bildirib ki, “Azərbaycan dili üzrə sertifikasiya imtahanı” demo versiyada istifadəyə verilir və ilkin nəticə üçün müxtəlif yaş kateqoriyalarından 2000 nəfərin nəticəsi lazımdır.

M.Abbaszadə qeyd edib ki, artıq imtahanın sınaq versiyasının onlayn platforması hazırdır. Onun sözlərinə görə, imtahan modeli dünyanın müxtəlif yerlərində dilin tədrisi üçün kurikulumların və dil üzrə bilik və bacarıqların ölçülməsi ilə bağlı alətlərin hazırlanmasında istifadə olunan dillər üzrə ümum-Avropa çərçivə sənədi və Azərbaycan dilinin xüsusiyyətləri nəzərə alınaraq ərsəyə gətirilib.

Ölkəmizdə ilk dəfə...

DİM sədri bildirib ki, 2024-cü ildə imtahanın müəllif hüquqları alınıb: “Avropa Şurasının rəsmi səhifəsinə ümum-Avropa çərçivə sənədi əsasında hazırlanmış Azərbaycan dili imtahanı haqqında sənəd əlavə edildi və proqram qəbul olundu”.

M.Abbaszadə vurğulayıb ki, imtahan kompüter əsaslıdır: “Platforma bu gündən etibarən Dövlət İmtahan Mərkəzinin rəsmi internet səhifəsində sınaq müddətinə istifadəyə verilir. Sınaq prosesinin məqsədi imtahanının effektivliyini yoxlamaq və daha da təkmilləşdirməkdir”.

Qeyd edək ki, bu sertifikasiya imtahanı ölkəmizdə ilk dəfə tətbiq olunur. İmtahan müddəti 3 saatdır. İmtahanda təhsil səviyyəsi, iş yeri, tutduğu vəzifədən asılı olmayaraq, hər kəs iştirak edə bilər, iştirak ödənişsizdir və sertifikatın etibarlılıq müddəti 2 ildir.

Azərbaycan dili imtahanları rəqəmsallaşdırılacaq

Bundan başqa, DİM sədri qeyd edib ki, gələcəkdə rus bölməsi üçün Azərbaycan dili imtahanları da rəqəmsallaşdırılacaq. Onun sözlərinə görə, bu imtahanlar hələ ki, kağız variantında keçirilir, yaxın gələcəkdə onlayn formata keçiriləcək.

Onlayn imtahanların müsbət tərəfləri...

Mövzunu “Yeni Azərbaycan”a şərh edən təhsil üzrə ekspert Elçin Əfəndi bildirib ki, rus bölməsi üçün Azərbaycan dili imtahanlarının onlayn keçirilməsində nəzərə alınan məqamlardan biri odur ki, burada kütləvilik azdır, ona görə də DİM-in imtahanları onlayn keçirmək imkanı var: “Məlumdur ki, informasiya texnologiyaları əsrində yaşayırıq, müasir çağırışlara, yeniliklərə mütləq adekvat cavab verilməlidir. Fikrimcə, dövlətin təhsil siyasətində məhz kağız daşıyıcılardan imtina, o cümlədən ekologiyaya daha çox töhfə verməsi başlıca olaraq prioritet məsələlərdən biri kimi nəzərə alınır. Təsadüfi deyil ki, ötən il ölkəmiz COP29 kimi beynəlxalq və mühüm bir tədbirə ev sahibliyi etdi. Azərbaycan dünyada baş verən qlobal ekoloji problemlərin qarşısının alınması ilə bağlı müəyyən qərarlar qəbul edir. Düşünürəm ki, zamanla nəinki rus bölməsi, həmçinin Azərbaycan bölməsi üçün də imtahanların kağız üzərində deyil, rəqəmsal formada həyata keçirilməsi nəzərdə tutulacaq. Bu, ekoloji cəhətən daha uyğun və səmərəli bir imtahan modelidir. Əlbəttə ki, dünyanın inkişaf etmiş ölkələrində artıq bu təcrübədən geniş istifadə olunur, bütün imtahanlar onlayn qaydada keçirilir. Belə imtahanların üstünlüyü odur ki, cavablar daha tez elan olunur, 3-4 müddət tələb edilmir. İmtahan başa çatdıqdan dərhal sonra namizədlər öz nəticələri ilə tanış ola bilirlər. Təbii ki, qarşıdakı dövr ərzində Dövlət İmtahan Mərkəzi Elm və Təhsil Nazirliyi ilə paralel olaraq təkcə elektron binada deyil, eyni zamanda başqa təhsil müəssisələrində də komputerləşməni tam həyata keçirəndən sonra elektron imtahanların keçirilmə imkanı olan təhsil müəsissələrində kütləvi olaraq onlayn imtahanlar keçirməyə başlayacaqlar. Bundan sonra isə gələcəkdə həm buraxılış, həm də blok imtahanlarını elektron qaydada keçirildiyinə şahid olacağıq”.

Yeganə BAYRAMOVA

Paylaş:

Baxılıb: 541 dəfə