Paytaxtda möhtəşəm gül bayramı təşkil edilib

Bakı:

23 °C

47 %

1 m/s

Əlaqə

AZ RU EN

Ana səhifə / Gündəm / Paytaxtda möhtəşəm gül bayramı təşkil edilib

Paytaxtda möhtəşəm gül bayramı təşkil edilib

13.05.2009 [10:50]

Prezident İlham Əliyev ümummilli lider Heydər Əliyevin anadan olmasının 86-cı ildönümü münasibətilə təşkil edilən bayramda olub
Mayın 10-da Azərbaycan xalqının ümummilli lideri, dünya şöhrətli siyasi xadim Heydər Əliyevin anadan olmasının 86-cı ildönümü ilə əlaqədar Bakıda, ulu öndərin adını daşıyan sarayın qarşısındakı parkda möhtəşəm gül bayramı təşkil edilib. Azərbaycan Prezidenti İlham Əliyev, xanımı Mehriban Əliyeva və qızları gül bayramında olublar. Dövlətimizin başçısına məlumat verilib ki, səhər tezdən başlayaraq paytaxt sakinləri Bakı Şəhər İcra Hakimiyyətinin təşkilatçılığı ilə xarici ölkələrdən gətirilmiş gül-çiçəklə bəzədilən parka gəlirlər. Gül bayramında dünyanın 81 ölkəsindən gətirilmiş 1,5 milyondan çox müxtəlif güllərdən istifadə olunub. Müstəqil dövlətimizin xilaskarı və qurucusu, xalqımızın dahi oğlu Heydər Əliyevin əzəmətli abidəsinin ətrafı gül-çiçəyə qərq olub, postament güllərlə hörülüb. Prezident İlham Əliyev və ailə üzvləri ulu öndərin abidəsini ziyarət, gül-çiçəyə qərq olmuş parkın gözəlliyini seyr ediblər. Müxtəlif çiçəklərdən yığılan “xalça”lar və türk dünyasının böyük oğlu Heydər Əliyevin portreti orijinallığı ilə göz oxşayırdı. Yer kürəsinin maketi üzərində səkkizguşəli ulduzun içərisində qızıl güllərdən yığılmış “86” rəqəminin təsvir olunduğu kompozisiya gözəlliyi ilə diqqəti cəlb edirdi. Xarici ölkələrdən gətirilən və Azərbaycanda yetişdirilən cürbəcür çiçək və güllərdən, bitkilərdən, yarpaqlardan hazırlanan rəngarəng kompozisiyalar buraya gələnləri heyran qoyurdu. Fəvvarələrin ətrafından tutmuş hər tərəf bir-birindən gözəl, bahar təravətli gül-çiçək içində idi. Bir-birini əvəz edən musiqi nömrələri bayram ovqatını daha da yüksəldirdi.
Prezident İlham Əliyevə və ailə üzvlərinə Hollandiyadan gətirilən zambaq buketləri təqdim olunub. Məlumat verilib ki, qızılı-bənövşəyi rəngli bu güllər Hollandiya Zambaqlarının Kultivasiyası üzrə Kral Assosiasiyası tərəfindən dünyada ilk dəfə olaraq ümummilli lider Heydər Əliyevin adına yetişdirilib. Sertifikatın iki nüsxəsi Prezident İlham Əliyevə təqdim olunub. Sertifikatlardan daha biri Zambaqların Kultivasiyası Beynəlxalq Reyestr Təşkilatına, digəri isə Hollandiya Zambaqlarının Kultivasiyası üzrə Kral Assosiasiyasına təqdim edilib. Dövlətimizin başçısı yeni uğurlu növ yetişdirilməsi münasibətilə Assosiasiyanın nümayəndələrini təbrik edərək, onlara müvəffəqiyyətlər arzulayıb. Gül kimi bəzənən və bayramı daha da gözəlləşdirən uşaqlar Prezident İlham Əliyevi və ailə üzvlərini özlərinə xas səmimiyyətlə salamlayıblar. Dövlətimizin başçısı və xanımı Mehriban Əliyeva uşaqlarla söhbət ediblər, xatirə şəkli çəkdiriblər. Prezident İlham Əliyev və ailə üzvləri gül kompozisiyalarına maraqla tamaşa ediblər. Güldən hazırlanan müxtəlif mənzərələr, orijinal lövhələrdə ulu öndər Heydər Əliyevin həyat və fəaliyyətinin bütün dövrlərinə aid fotoşəkillər böyük maraq doğurub. Dövlətimizin başçısı və ailə üzvləri ümummilli lider Heydər Əliyevin güllərdən yığılan portreti önündə xatirə şəkli çəkdiriblər.

Paylaş:

Baxılıb: 1404 dəfə