KİV nümayəndələri "Euronews" televiziya kanalının rəhbərliyinə müraciət ünvanlayıb

Bakı:

16 °C

77 %

10 m/s

Əlaqə

AZ RU EN

Ana səhifə / Gündəm / KİV nümayəndələri "Euronews" televiziya kanalının rəhbərliyinə müraciət ünvanlayıb

KİV nümayəndələri "Euronews" televiziya kanalının rəhbərliyinə müraciət ünvanlayıb

15.12.2009 [09:54]

Ermənistanın Avropalı Dostları (EuFoA) adlı qurumun təşkilatçılığı ilə Azərbaycan Respublikasının Dağlıq Qarabağ bölgəsinə tanışlıq səfəri edən “Euronews” telekanalının əməkdaşları çalışdıqları media qurumunun standartlarına zidd olaraq qeyri-obyektiv və qərəzli reportaj hazırlayıb, həmin reportaj bir neçə gün ardıcıl olaraq telekanal vasitəsilə yayımlanıb. Reportajda Belçikanın Lüven Katolik Universitetinin Akademik Şurasının direktoru, professor Bernar Kuli Dağlıq Qarabağın erməni mədəniyyəti və xristian keçmişə malik cəlbedici, unikal bölgə olduğunu söyləyərək buranı Ermənistanın qəlbi adlandırıb. Həmçinin, Ermənistan silahlı qüvvələri tərəfindən işğal olunmuş və separatçı rejimin idarə etdiyi Dağlıq Qarabağı “müstəqil dövlət”, separatçıların başçısı Bako Saakyan isə qondarma qurumun “prezidenti” kimi təqdim olunub.
Qeyd edək ki, 135 ölkədə 300 milyon tamaşaçı auditoriyasına malik “Euronews” televiziya kanalı bu günə kimi obyektiv, tərəfsiz, professional xəbər mənbəyi hesab olunub. Bu telekanal Azərbaycan Respublikasında kabel televiziyaları vasitəsilə yayımlanır və Azərbaycan tamaşaçıları tərəfindən diqqətlə izlənilir. Bu səbəbdən də, reportaj Azərbaycan ictimaiyyəti, dövlət və qeyri-hökumət qurumları, yerli kütləvi informasiya vasitələri arasında ciddi narazılıq doğurub.
Məsələ ilə bağlı olaraq, “Yeni Azərbaycan”, “Səs”, “İki sahil” qəzetləri və “Səs” İnformasiya Agentliyinin əməkdaşları “Euronews” televiziya kanalının rəhbərliyinə müraciət ünvanlayıb. Müraciətdə deyilir: “Hörmətli həmkarlar! Bu günlərdə “Euronews” televiziya kanalının efirində Mikael Rayxmanın “Dağlıq Qarabağ - dəyişik külək” reportajı bizim etirazımıza və sizə müraciət ünvanlamağımıza səbəb olmuşdur. 20 ildən artıq müddətdə davam edən və hər iki tərəfdən çoxsaylı tələfatlara səbəb olmuş Ermənistan-Azərbaycan Dağlıq Qarabağ münaqişəsi haqqında dünya ictimaiyyətinin ətraflı və obyektiv məlumat əldə etməyə haqqı var. İnanırıq ki, bu gün sabitlik və firavanlıq mühitində yaşayan, lakin keçmişdə çoxsaylı müharibələrdə milyonlarla insan tələfatı vermiş Avropa xalqları heç vaxt dezinformasiya, qeyri-obyektiv və qərəzli məlumatlandırma ilə barışa bilməzlər. 1992-1993-cü illərdə Azərbaycan torpaqlarına daim iddiası olmuş Ermənistanın təcavüzü nəticəsində Dağlıq Qarabağ da daxil olmaqla Azərbaycanın 20 faiz torpaqları işğal olunmuş, bir milyondan artıq azərbaycanlı öz doğma torpaqlarından qovulmuşdur. Həmin insanlar uzun illər çox acınacaqlı şəraitdə yaşamış, hər bir çətinliyə dözmüş, lakin heç vaxt doğma torpaqlarına qayıdacaqlarına inamlarını itirməmişlər. Azərbaycanla Ermənistan arasında 15 ildir ki, atəşkəs imzalanmasına baxmayaraq, rəsmi Yerevan müxtəlif bəhanələrlə danışıqlar prosesini uzatmış və Azərbaycana qarşı ciddi informasiya müharibəsi aparmışdır. Biz hər dəfə dünyanın bu və ya digər mətbuat orqanında, televiziya kanalında Azərbaycanla, Dağlıq Qarabağ münaqişəsi ilə bağlı təhrif olunmuş, yanlış və ədalətsiz materiallar getməsinin şahidi oluruq. İstisna deyil ki, “Euronews” telekanalında təqdim olunmuş məlum reportaj da erməni lobbisi və ya Ermənistanın müvafiq təşkilatlarının Azərbaycana qarşı növbəti təxribatıdır.
Qeyd etmək istərdik ki, Ermənistan tərəfindən işğal olunmamışdan əvvəl Dağlıq Qarabağ Azərbaycan və erməni icmalarının birgə yaşadığı məkan olmuş, sovet illərində bu bölgənin inkişafına xüsusi diqqət ayrılmış, yeni-yeni qəsəbələr, şəhərlər salınmışdır. Ermənistanın hərbi təcavüzü və azərbaycanlılara qarşı etnik təmizləmə siyasəti həyata keçirildikdən sonra bütün infrastruktur, mədəniyyət abidələri dağıdılmış, bərbad hala düşmüşdür. Rəsmi Yerevan Dağlıq Qarabağda separatçı rejim yaratmış, bu ərazinin Ermənistana heç bir aidiyyəti olmasına baxmayaraq, Ermənistan vətəndaşları orada hərbi xidmət keçirlər.
Göründüyü kimi, Ermənistan dünyada sülh və ədalətin, sabitliyin qorunub saxlanılması istiqamətində qəbul edilmiş bütün beynəlxalq hüquq və normaları kobudcasına pozmaqdadır.
Təsəvvür etmək çətin deyil ki, telekanalın əməkdaşlarının rəsmi Bakının icazəsi olmadan həmin əraziyə daxil olması, “Euronews” kimi nüfuzlu televiziya kanalının Azərbaycanın ərazi bütövlüyünü şübhə altına alan reportaj yayması vətəndaşlarımız tərəfindən necə qarşılanır.
Qeyd etmək istəyirik ki, müasir cəmiyyətlərdə, informasiya əsri adlandırdığımız yaşadığımız dövrdə kütləvi informasiya vasitələrinin insanların məlumatlandırılması, hətta idarə olunmasında rolu inkaredilməzdir. Eyni zamanda, dəqiq, obyektiv, qərəzsiz və vicdanlı informasiyanı cəmiyyətə çatdırmaq mənsubiyyətindən, fəaliyyət göstərdiyi ölkədən, təyinatından asılı olmayaraq, hər bir KİV-in başlıca vəzifəsidir. Tamaşaçı auditoriyası da aludəçisinə çevriləcəyi KİV-i müəyyənləşdirərkən, ilk olaraq, bu kriteriyaları nəzərə alır.
Yüzdən artıq ölkədə yayımlanan və 300 milyona yaxın tamaşaçı auditoriyasına malik “Euronews” televiziya kanalı da bu günə kimi obyektiv, tərəfsiz, professional xəbər mənbəyi hesab olunub. Bu imicini telekanal dəqiq, qərəzsiz, müstəqil informasiya siyasətinə sədaqəti ilə qazanıb. Etiraf etməliyik ki, bu yaxınlarda təqdim olunan həmin reportaj nə “Euronews”un imicinə, nə də onun prioritetlərinə uyğun gəlir.
ümid edirik ki, “Euronews” telekanalı tənqidimizə anlaşıqlıqla yanaşacaq və yaranmış problemin aradan qaldırılması üçün müvafiq tədbirlər görəcək. Biz məsələ ilə əlaqədar həqiqətlərin öyrənilməsi, ən azından münaqişəyə dair azərbaycanlıların mövqeyini öyrənmək üçün telekanalın əməkdaşlarını ölkəmizə dəvət edir və istənilən dəstəyi göstərməyə hazır olduğumuzu bildiririk”.

Paylaş:

Baxılıb: 1219 dəfə