Azərbaycanda son illər ərzində səhiyyə sahəsində çox uğurlu işlər görülür

Bakı:

25 °C

58 %

3 m/s

Əlaqə

AZ RU EN

Ana səhifə / Gündəm / Azərbaycanda son illər ərzində səhiyyə sahəsində çox uğurlu işlər görülür

Azərbaycanda son illər ərzində səhiyyə sahəsində çox uğurlu işlər görülür

28.01.2010 [11:27]

Prezident İlham Əliyev: Biz elə etməliyik ki, həm Bakıda, həm bütün bölgələrdə hər bir vətəndaş yüksək tibbi xidmət almaq üçün imkanlara malik olsun
Respublikamızda səhiyyənin sürətli inkişafı göz önündədir. Hər il onlarla yeni səhiyyə müəssisəsi tikilərək istifadəyə verilir, köhnə tibb ocaqları müasir tələblərə uyğun şəkildə təmir olunaraq ən müasir texnologiyalarla təchiz edilir. Təkcə onu demək kifayətdir ki, ötən il dünya iqtisadi böhranına baxmayaraq, ölkəmizdə 59 yeni səhiyyə müəssisəsi yaradılıb və ya təmir olunub. Bu isə onu göstərir ki, Azərbaycanda bütün sahələrdə gedən sürətli inkişaf prosesi səhiyyə sahəsindən də yan keçmir. Yeri gəlmişkən, bu günlərdə əsaslı təmirdən sonra Bakıda açılan Respublika Klinik Uroloji Xəstəxanası deyilənlərə daha bir örnəkdir. Qeyd edək ki, ötən əsrin ortalarında yaradılan bu klinikada Cənubi Qafqazda və Yaxın Şərqdə ilk dəfə olaraq uğurlu böyrəkköçürmə əməliyyatı aparılmışdı. Respublikamızda urologiya və nefrologiya elminin inkişafına töhfələr verən xəstəxananın fəaliyyəti lazımi maddi-texniki bazanın olmaması səbəbindən dayandırılmışdı. Yalnız 2007-ci ildə Prezident İlham Əliyevin klinikanın əsaslı təmir və təchizatı, onun nəzdində böyrəkköçürmə mərkəzinin yaradılması haqqında Sərəncamından sonra görülən işlər nəticəsində klinika ən müasir tibb ocaqlarından birinə çevrilib. Onu da qeyd edək ki, sözügedən klinikanın açılışı ölkədə tibbi xidmətin yaxşılaşması istiqamətində atılan növbəti mühüm addımlardandır. Xəstəxananın açılış mərasimində iştirak edən dövlət başçısı respublikada son illərdə səhiyyə sahəsində böyük işlər görüldüyünü vurğulayaraq əlavə edib: “Yeni xəstəxanaların açılışı çox geniş vüsət almışdır, həm Bakıda, həm ölkəmizin müxtəlif rayonlarında, bölgələrdə 10 müalicə-diaqnostika mərkəzi tikilib, 6-sı tikilməkdədir. Demək olar ki, bütün rayonlarda mərkəzi xəstəxanalar, uşaq xəstəxanaları təmir edilir, yeniləri tikilir. Bakıda çox böyük elmi-tədqiqat institutlarının əsaslı təmir işləri başa çatır və bəziləri - Oftalmologiya, Onkologiya, Talassemiya mərkəzləri artıq istismara verilibdir. Bu gün uroloji xəstəxananın açılışını qeyd edirik. Dövlət Tibb Universitetinin iki korpusu - terapevtik və cərrahiyyə korpusları. Orada da işlər gedir. Hərbi hospital, Daxili İşlər Nazirliyinin hospitalı, Gömrük Komitəsinin hospitalı bütün bunlar-Azərbaycanın səhiyyə sisteminin müasirləşməsinə xidmət göstərir”.
Həqiqətən də, görülən işlər nəticəsində Azərbaycan regionun ən müasir və təkmilləşmiş səhiyyə sisteminə malik olan ölkəsinə çevrilib. Respublikamızın bütün regionlarında əhali yüksək keyfiyyətli tibbi xidmətlə təmin olunub. Belə ki, xəstəxanalarda yaradılan hər cür şərait tibb işçilərinə öz vəzifələrinin öhdəsindən yüksək səviyyədə gəlməyə imkan verir. Dövlət başçısının da bildirdiyi kimi, əsas məqsəd həm Bakı, həm də bölgələrdə yaşayan sakinlərin yüksək tibbi xidmətlə təmin edilməsidir: “çox vacibdir ki, bu gözəl şəraitdə insanlara yüksək tibbi xidmət göstərilsin. İndi bunu etmək üçün bütün imkanlar vardır. Gözəl şərait, ən müasir avadanlıq. Əsas odur ki, bu tibb müəssisələrində çalışan həkimlər və bütün işçilər insanlara, xəstələrə ən yüksək tibbi xidmət göstərsinlər. Əminəm ki, belə də olacaqdır. Bu xəstəxanalarda işləmək üçün bütün şərait, xəstələrin müalicəsi, diaqnostika üçün bütün imkanlar vardır. Beləliklə, biz Azərbaycanda müasir səhiyyə sisteminin yaradılması işində növbəti vacib addımı atırıq. Əminəm ki, gələcək illərdə bizim bütün planlarımız həyata keçiriləcəkdir”.
Bildiyimiz kimi, 2009-cu ilin “Uşaq ili” elan olunması ilə əlaqədar Tədbirlər Planı haqqında Prezident İlham Əliyevin Sərəncamına uyğun olaraq uşaq və yeniyetmələrin reproduktiv sağlamlığının qorunması istiqamətində xeyli işlər görülüb. Belə ki, respublikanın hər yerindən, eləcə də, qaçqın və məcburi köçkün ailələrindən olan minlərlə uşaq arasında kütləvi müayinələr aparılıb və müalicəyə ehtiyacı olanların sağlamlığının bərpa olunması məqsədilə həkim nəzarətinə götürülüb. Təhsil müəssisələrində, uşaq bağçalarında həyata keçirilən bu tədbirlər nəticəsində yeni nəslin sağlamlığının qorunmasında mühüm irərililəyişlər əldə olunub. ümumiyyətlə, səhiyyə sahəsində görülən sistemli və ardıcıl işlər bu sahənin sürətli inkişafına təkan verir.
Hülya MƏMMƏDLİ

Paylaş:

Baxılıb: 1348 dəfə