Prezident İlham Əliyevin ekoloji məsələlərin həlli ilə bağlı göstərişləri uğurla icra olunur

Bakı:

13 °C

82 %

5 m/s

Əlaqə

AZ RU EN

Ana səhifə / Gündəm / Prezident İlham Əliyevin ekoloji məsələlərin həlli ilə bağlı göstərişləri uğurla icra olunur

Prezident İlham Əliyevin ekoloji məsələlərin həlli ilə bağlı göstərişləri uğurla icra olunur

22.04.2010 [09:59]

Uzun illər təbiətə müxtəlif təsirlər nəticəsində, Azərbaycanın bir çox yerlərində ekoloji böhran sahələri yaranıb. Məsələn, meşələrin qırılması nəticəsində, onsuz da az olan meşə örtüyünün torpaqqoruyucu, susaxlayıcı, havatəmizləyici kimi vacib sanitar-gigiyenik və sosial-ekoloji funksiyası xeyli dərəcədə zəifləyib. Bəzi qiymətli ağac və kol növlərinin ehtiyatı tükənmək təhlükəsi qarşısında qalıb. Yaylaqlardan qeyri-səmərəli istifadə olunması onların geniş ərazidə sürətlə eroziyaya uğramasına və bitki örtüyünün məhv olmasına səbəb olub. Digər tərəfdən, son illərdə ölkədə baş vermiş təbii fəlakətlər ətraf mühitə ciddi ziyan vurub. Odur ki, ölkədə təbiətin mühafizəsi, bioloji müxtəlifliyin azalmasının və ətraf mühitin çirklənməsinin qarşısının alınması məqsədi ilə təxirəsalınmaz tədbirlərin həyata keçirilməsi böyük sosial-iqtisadi əhəmiyyət kəsb edir.
Bu zərurəti nəzərə alan ölkə başçısı İlham Əliyevin birbaşa göstərişləri ilə Azərbaycanda ekoloji məsələlərin həlli istiqamətində genişmiqyaslı tədbirlərə start verilib. Yaşıllığın ləğvi istiqamətində hərəkətlərin qarşısı alınıb və yaşıllaşdırma sürətləndirilib. Bununla bağlı müvafiq qurumlarla birgə işlərə başlanıb. ölkəmizdə ekoloji tarazlığın bərpası və ətraf mühitin qorunması məqsədilə Azərbaycan Prezidenti İlham Əliyev 2010-cu ili “Ekologiya ili” elan edib. Dövlət başçısının tapşırığına əsasən, “Ekologiya ili” çərçivəsində bir sıra mühüm tədbirlər, həmçinin, yaşıllaşdırma kampaniyasına başlanıb. Bir sözlə, bu Sərəncama uyğun olaraq, həyata keçiriləcək tədbirlərdə yaşıllaşdırma prioritet istiqamət olacaq. Prezident İlham Əliyevin bu il ərzində ölkədə 3 milyon ağac əkilməsi barədə göstərişinə uyğun olaraq tədbirlər planı tutulub. Plana əsasən, yaşıllıqlar iki istiqamətdə artırılacaq.
Birinci istiqamət boş ərazilərə yaşıl örtük salınmasıdırsa, ikinci istiqamət magistral yol ətrafının yaşıllaşdırılmasıdır. ETSN-in həyata keçirdiyi yaşıllaşdırma tədbirləri ilə bağlı texniki əsaslandırma da hazırlanıb. Yalnız bu istiqamətdə 11 layihə tərtib olunub. Həmin layihələrdə yaşıllıq salınacaq ərazinin seçilməsindən tutmuş tətbiq ediləcək suvarma texnologiyasına qədər hər bir texniki amil nəzərə alınıb. Yaşıllaşdırılacaq ərazilər əsasən, Abşeron yarımadasında seçilib. Ekoloji problemlərin böyük hissəsi, məhz bu ərazidə olduğundan problemin həllinə də buradan başlanıb. Onu da qeyd edək ki, yaşıllaşdırılacaq ərazilər seçilərkən ilk növbədə istifadəsiz olan, gözdən uzaq qalaraq bərk tullantılar poliqonuna çevrilmiş ərazilərə üstünlük veriləcək. Bu isə, həm ərazilərin zibilliklərdən təmizlənməsində, həm də yaşıllıqların artırılmasında mühüm rol oynayacaq. Artıq bu prosesə start da verilib.
Ekologiya və Təbii Sərvətlər Nazirliyi, həmçinin, magistral avtomobil yollarının kənarlarının yaşıllaşdırılması ilə bağlı prosesdə xüsusi fəallıq göstərib. Təkcə bu ilin birinci rübü ərzində “Azəryaşlandşaft” ASC Əzizbəyov-Heydər Əliyev Beynəlxalq Hava Limanı magistral avtomobil yolunun ətrafının abadlaşdırılması, mövcud yaşıllıqların bərpası istiqamətində xeyli iş görüb. Keçmiş Binə və Sədərək ticarət mərkəzlərinin yerində 85 ha ərazinin 60 ha ərazisi abadlaşdırılıb. 74 min ədəd müxtəlif cins ağac və kol bitkiləri əkilib. Bayıl yamacında 60 ha ərazinin 30 ha ərazisi yaşıllaşdırılıb. 15 min ədəd müxtəlif cins ağac və kol bitkiləri əkilib, Bakı-Qazax magistral avtomobil yolunun Ələt-Atbulaq hissəsi 57,6 ha ərazisinin 32 ha yaşıllaşdırılıb. Burada 42 min ədəd ağac əkilib.
Bakı-Astara magistral avtomobil yolunun Ələt-Salyan hissəsində 46 hektar ərazinin 10 hektarı yaşıllaşdırılıb. Məlumata görə, burada 13 min ədəd müxtəlif cins ağac və kol bitkiləri əkilib. Bakı-Quba magistral avtomobil yolunun Z.Tağıyev qəsəbəsi hissəsində 80 hektar ərazinin 10 hektarı yaşıllaşdırılıb. Burada isə 12 min ədəd müxtəlif cins ağac və kol bitkiləri əkilib. Bakı-Şamaxı magistral avtomobil yolunun Pireküşkül-çaylı hissəsində isə 80 hektar ərazinin 10 hektarı yaşıllaşdırılıb, 10 min ədəd ağac və kol bitkiləri əkilib.
RUHİYYƏ

Paylaş:

Baxılıb: 1153 dəfə