Fəvvarələr meydanı əsaslı bərpa və yenidənqurma işlərindən sonra paytaxt sakinlərinin istifadəsinə verilib

Bakı:

0 °C

86 %

4 m/s

AZ RU EN

Ana səhifə / Gündəm / Fəvvarələr meydanı əsaslı bərpa və yenidənqurma işlərindən sonra paytaxt sakinlərinin istifadəsinə verilib

Fəvvarələr meydanı əsaslı bərpa və yenidənqurma işlərindən sonra paytaxt sakinlərinin istifadəsinə verilib

03.07.2010 [10:26]

Prezident İlham Əliyev və xanımı Mehriban Əliyeva burada aparılmış yenidənqurma işləri ilə tanış olublar
Dünən Bakının ən gözəl istirahət məkanlarından biri - Fəvvarələr meydanı əsaslı bərpa və yenidənqurma işlərindən sonra istifadəyə verilib. Prezident İlham Əliyev və xanımı Mehriban Əliyeva burada aparılmış yenidənqurma işləri ilə tanış olublar.
XIX və XX əsrlər Azərbaycan memarlıq incilərinin yerləşdiyi məkanlardan biri kimi diqqəti cəlb edən Fəvvarələr meydanı artıq əsaslı bərpa və yenidənqurma işlərindən sonra daha gözəl və daha orijinal formada paytaxt sakinlərinin istifadəsindədir. Amma bu istirahət məkanı bir çox dövrlərdə baxımsızlıqdan əziyyət çəkib. Zəngin bitki örtüyünə malik olan bu bağda illərin baxımsızlığı öz izini qoyub. Bundan əlavə, buradakı zövqsüz iaşə obyektlərinin mövcudluğu bir çox hallarda ərazinin təyinatını da dəyişib. Lakin Prezident İlham Əliyevin diqqət və qayğısı bu bağın da tarixi şöhrətini qaytarmağa imkan verib. Dövlətimizin başçısının paytaxtın inkişaf konsepsiyasının mühüm tərkib hissəsi kimi dəyərləndirdiyi bağ və parkların yenidən qurulmasına göstərilən diqqət və qayğı Fəvvarələr meydanının timsalında daha aydın görünür. Burada tikinti və yenidənqurma işlərinin gedişi hər zaman dövlətimizin başçısının diqqətində olub. Prezident İlham Əliyev mütəmadi olaraq əraziyə gələrək işlərin gedişi ilə maraqlanıb, yenidənqurma prosesinin meydanın orijinal üslubu saxlanılmaqla həyata keçirilməsinin vacibliyini bildirib.
Məlumat verilib ki, yenidənqurma işləri zamanı əsas diqqət ərazinin təkrarolunmaz koloritinin qorunub saxlanılmasına yönəldilib. Meydandakı fəvvarə, pavilyon və köşklər yenidən qurulub, bitki örtüyü olduğu kimi qorunub saxlanılıb, yenidənqurma nəticəsində yaşıllıq zolağının sahəsi artırılıb.
Bildirilib ki, Fəvvarələr meydanı salınandan sonra ilk dəfədir burada bu miqyasda abadlıq və yenidənqurma işləri aparılıb. Yüksək keyfiyyətlə aparılmış yenidənqurma prosesində Bakının tarixi, onun keçmişi ilə sıx bağlı olan bu ərazinin bədii tərtibatına xüsusi diqqət yetirilib. ümumi struktur saxlanılıb, bununla belə, yeni planlaşdırma işləri aparılıb. Burada gözəlliyi ilə diqqəti çəkən yeni fəvvarə tikilib. Onun arxasındakı memarlıq kompozisiyası isə həm dizaynına, həm də koloritinə görə köhnə Bakı elementlərini özündə cəmləşdirməsi ilə diqqəti çəkir.
Prezident İlham Əliyev və xanımı Mehriban Əliyeva “Fəvvarə” restoran-kafesində yaradılan şəraitlə də tanış olublar.
Bildirilib ki, burada paytaxt sakinlərinin, qonaqların istirahətinin təşkili üçün hər cür şərait yaradılıb.
Yeni ağacların əkilməsi, ərazinin bitki örtüyünün zənginləşdirilməsi, gözəl landşaft kompozisiyalarının yaradılması Fəvvarələr meydanına xüsusi yaraşıq verir.
Diqqətə çatdırılıb ki, meydanda müxtəlif dizaynda bir neçə fəvvarə kompleksi yaradılıb.
Dövlətimizin başçısına meydanı əhatələyən binalarda aparılan bərpa işləri barədə məlumat verilib. Bildirilib ki, bu binaların hamısı tarixi memarlıq tikililəridir və binalarda aparılan bərpa işləri ərazinin ümumi memarlıq ansamblına uyğunlaşdırılıb. Binalardakı eyvanların hamısı yenilənib, fasadlarda müasir işıqlandırma sistemi quraşdırılıb.
Prezident İlham Əliyev və xanımı Mehriban Əliyeva paytaxt sakinlərinin “Kitab pasajı” kimi tanıdığı ərazidə aparılan yenidənqurma işləri ilə də tanış olublar. Buradakı memarlıq abidələri olan bütün binalarda, küçəni hər iki tərəfdən əhatə edən tağlı keçidlərdə yenidənqurma işləri görülüb. Tağlı keçidlərin tavanında Bakı memarlığını əks etdirən tablolar çəkilib.
Dövlətimizin başçısı və xanımı “Xaqani” bağında da aparılmış yenidənqurma işləri ilə də maraqlanıblar. Qeyd olunub ki, bu bağda yaşıllıq zolağının artırılmasına xüsusi diqqət göstərilib, istirahət guşəsinin əvvəlki koloriti qorunub saxlanılıb. Tərtibatında müxtəlif bəzək elementlərindən istifadə olunan bağda xüsusi formalı fəvvarə də əvvəlki görkəmində saxlanılıb.
Burada görülən işlər bir daha təsdiqləyir ki, paytaxtda yeni park və xiyabanların salınması, mövcud olanlarda abadlaşdırma işlərinin aparılması hər zaman dövlətimizin başçısının diqqət mərkəzindədir. Bu, ilk növbədə şəhərimizin gözəlləşməsinə, digər tərəfdən paytaxtımızın sakinlərinin və qonaqlarının mənalı istirahətinə geniş imkanlar açır.
Prezident İlham Əliyev və xanımı Mehriban Əliyeva Nizami küçəsində salınan yeni parka və burada yaradılan fəvvarəyə də baxıblar.
Dövlətimizin başçısının diqqətinə ərazinin əvvəlki görüntüləri də təqdim olunub. Bildirilib ki, aparılan abadlıq və yenidənqurma işləri zamanı burada yeni parkın salınması ilk növbədə paytaxt sakinlərinin mənalı istirahətinə xidmət edir.
Prezident İlham Əliyev və xanımı Mehriban Əliyeva Nizami küçəsində davam edən yenidənqurma işlərinin gedişi ilə maraqlanıblar. Bildirilib ki, artıq burada yenidənqurma işləri başa çatmaq üzrədir. Məlumat verilib ki, ərazidə əhalinin rahat hərəkətini təmin etmək üçün yeni piyada keçidi də inşa edilib. Bununla da paytaxtın böyük bir ərazisində yüksək keyfiyyyətlə yenidənqurma işlərinin aparılması məqsədinə nail olunub.

Paylaş:

Baxılıb: 1037 dəfə