Beynəlxalq təhlükəsizlik sahəsində çoxtərəfli əməkdaşlığın qurulması istiqamətində ilk mühüm addım

Bakı:

12 °C

76 %

9 m/s

AZ RU EN

Ana səhifə / Gündəm / Beynəlxalq təhlükəsizlik sahəsində çoxtərəfli əməkdaşlığın qurulması istiqamətində ilk mühüm addım

Beynəlxalq təhlükəsizlik sahəsində çoxtərəfli əməkdaşlığın qurulması istiqamətində ilk mühüm addım

08.10.2010 [11:07]

Azərbaycan Respublikası Prezidenti Administrasiyasının rəhbəri təhlükəsizlik məsələlərinə nəzarət edən yüksək vəzifəli nümayəndələrin Birinci Beynəlxalq görüşündə iştirak edib
Cari il oktyabrın 5-6-da Soçi şəhərində təhlükəsizlik məsələlərinə nəzarət edən yüksək vəzifəli nümayəndələrin Birinci Beynəlxalq görüşü keçirilib.
Görüşdə 43 ölkənin təhlükəsizlik şuralarının katibləri, prezidentlərin və baş nazirlərin milli təhlükəsizlik üzrə köməkçiləri, güc qurumlarının rəhbərləri, habelə BMT baş katibinin müavini Y.Fedotov iştirak ediblər. Rusiya Federasiyası Təhlükəsizlik Şurasının katibi N.Patruşev görüşü açaraq Rusiya Federasiyasının Prezidenti Dmitri Medbedevin təbrik məktubunu oxuyub. BMT-nin baş katibi Pan Gi Mun da forum iştirakçılarına təbrik məktubu göndərib.
Görüşdə ölkəmizi Azərbaycan Prezidenti Administrasiyasının rəhbəri, Təhlükəsizlik Şurasının katibi, akademik Ramiz Mehdiyev, Prezident Administrasiyasının xarici əlaqələr şöbəsinin müdiri Novruz Məmmədov, hüquq mühafizə orqanları ilə iş şöbəsinin müdiri Fuad Ələsgərov, siyasi təhlil və informasiya təminatı şöbəsinin müdiri Elnur Aslanov təmsil ediblər.
Azərbaycan Prezidenti Administrasiyasının rəhbəri, akademik Ramiz Mehdiyev Birinci Beynəlxalq görüşdə “Transmilli cinayətkarlıq, onun ən təhlükəli növləri arasında qarşılıqlı əlaqə” və “Formalaşan qlobal informasiya cəmiyyəti şəraitində beynəlxalq informasiya təhlükəsizliyinə təhdidlər: əməkdaşlıq istiqamətləri” mövzularında mühazirələrlə çıxış edib. Akademik Ramiz Mehdiyev transmilli cinayətkarlıq mövzusunda məruzəsində Azərbaycan ərazisinin bir hissəsinin işğal olunması kontekstində beynəlxalq mütəşəkkil cinayətkarlığın doğurduğu təhlükələri diqqətə çatdırıb. O, deyib ki, terrorçu qrupların “boz zonalar” adlandırılan ərazilərdə fəaliyyət göstərən müxtəlif profilli kriminal təşkilatlarla birləşməsi cinayətkarlıq üçün böyük potensial yaradır və çox təhlükəli meyildir: “Ermənistan silahlı qüvvələrinin işğal etdiyi Azərbaycanın Dağlıq Qarabağ bölgəsi və onun ətrafındakı yeddi rayonunun ərazisində məhz belə nəzarət olunmayan zona yaradılıb. Daxil olan əməliyyat məlumatları və prosessual şəkildə sübut olunmuş faktlar israrla söyləməyə əsas verir ki, bu ərazidən narkotik vasitələrin istehsalı, silah və insan tranziti və alveri, qeyri-leqal miqrasiya, terrorçuların göndərilməsi və gizlədilməsi, qanunsuz pul vəsaitlərinin leqallaşdırılması və transmilli cinayətkarlığın digər təhlükəli növləri üçün fəal istifadə olunur. Milli və beynəlxalq hüququn təsir dairəsindən kənarda qalan bu zona və digər belə ərazilər qeyd olunan təhdidlərə adekvat və vaxtında münasibət göstərilməsi üçün əlçatmaz qalır. Buna görə də biz Ermənistan-Azərbaycan, Dağlıq Qarabağ münaqişəsinin həlli ilə əlaqədar məsələlərə milli və regional təhlükəsizliyin təmin olunması, terror təhlükəsinin və digər təhdidlərin aradan qaldırılması sahəsində işin bir hissəsi kimi baxırıq”.
İnformasiya cəmiyyəti şəraitində əlaqələndirilmiş fəaliyyətin zəruriliyini və aktuallığını qeyd edən Ramiz Mehdiyev bildirib ki, Azərbaycan tez-tez açıq-aşkar informasiya təhrikləri ilə üzləşir: “ümumdünya şəbəkəsində separatçılıq fəaliyyətinə açıq çağırışlar müşahidə olunur, dövlətin ərazi bütövlüyü şübhə altına alınır, dövlət rəhbərləri, ölkənin ictimai-siyasi xadimləri təhqir obyektinə çevrilir. Qeyd etmək lazımdır ki, bu cür hərəkətlər Azərbaycanın müharibə şəraitində olduğu qonşu Ermənistanın informasiya qurumları tərəfindən tez-tez həyata keçirilir. “İnformasiya silahından” istifadə olunması ilə əlaqədar qeyd edilən nümunələrlə yanaşı, xüsusilə, dinc Azərbaycan əhalisinin 1918-ci ilin martında, 1990-cı ilin yanvarında, habelə 1992-ci ilin fevralında Xocalı şəhərində erməni separatçılarının silahlı qrupları tərəfindən kütləvi surətdə qırılması ilə bağlı faciəli günlərdə Azərbaycanın informasiya resurslarına xaker hücumlarına daimi cəhdlər göstərilir”.
Azərbaycan Prezidenti Administrasiyasının rəhbəri, Təhlükəsizlik Şurasının katibi akademik Ramiz Mehdiyev səfər çərçivəsində Türkiyə Milli Təhlükəsizlik Şurasının baş katibi Sərdar Kılıç, Ukrayna Milli Təhlükəsizlik və Müdafiə Şurasının katibi Raisa Boqatıryova, Belarus Təhlükəsizlik Şurasının dövlət katibi Leonid Maltsev, İsveçrə Konfederasiyasının Müdafiə, Əhalinin Qorunması və İdman Federal Departamentinin Təhlükəsizlik Siyasəti İdarəsinin rəisi Kristian Katrina ilə ikitərəfli görüşlər keçirib. Görüşlərdə geniş fikir mübadiləsi aparılıb, regionda və dünyada vəziyyət və təhlükəsizlik məsələləri təhlil olunub, habelə qarşılıqlı maraq doğuran digər məsələlər müzakirə edilib.
Soçi görüşündə təbii və texnogen qəzalar barədə qabaqcadan xəbərdarlıq edilməsi və nəticələrin aradan qaldırılması, transmilli cinayətkarlığın müxtəlif formaları və təzahürləri - terrorizm, narkotrafik, qeyri-leqal miqrasiya, silah və radioaktiv materialların qanunsuz dövriyyəsi ilə mübarizə sahəsində qarşılıqlı fəaliyyət, habelə qlobal informasiya cəmiyyətinin formalaşdırılması şəraitində beynəlxalq informasiya təhlükəsizliyinin təmin edilməsi istiqamətində əməkdaşlıq məsələləri diqqət mərkəzində olub.
Soçi görüşü beynəlxalq təhlükəsizlik sahəsində çoxtərəfli əməkdaşlığın qurulması istiqamətində ilk mühüm addımdır.

Paylaş:

Baxılıb: 1051 dəfə