Ölkəmiz daha zəngin dövlətə çevriləcək

Bakı:

29 °C

51 %

15 m/s

Əlaqə

AZ RU EN

Ana səhifə / Gündəm / Ölkəmiz daha zəngin dövlətə çevriləcək

Ölkəmiz daha zəngin dövlətə çevriləcək

24.10.2010 [11:30]

2010-cu ilin ötən doqquz ayı ərzində xalqın maddi rifahının yaxşılaşması ilə bağlı davamlı tədbirlər həyata keçirilib
Respublikamızda Prezident İlham Əliyevin rəhbərliyi ilə həyata keçirilən sosial-iqtisadi islahatlar 2010-cu ilin əvvəllərindən başlayaraq ötən dövr ərzində daha da sürətlənib və bütün iqtisadi sektorlarda dinamikliyin təmin olunmasına səbəb olub. Mükəmməl iqtisadi strategiya ölkə iqtisadiyyatının davamlı artımını təmin etməklə yanaşı, Azərbaycan xalqının maddi rifahının durmadan yaxşılaşmasını da şərtləndirib. Bu inkişafı və artım indiqatorlarını 2010-cu ilin ötən doqquz ayının makroiqtisadi göstəriciləri aydın şəkildə təsdiq etmiş olur.
2010-cu ilin 9 ayının sosial-iqtisadi göstəriciləri bir daha respublikamızın iqtisadiyyatının inkişafını şərtləndirmiş olur. Belə ki, ötən ilin eyni dövrü ilə müqayisədə hesabat dövründə ümumi daxili məhsul (üDM) 4,1 faiz artaraq 29,3 milyard manat, adambaşına düşən ümumi daxili məhsul isə 2,8 faiz artaraq 3 min 286 manat, orta aylıq əməkhaqqı 6,6 faiz artaraq 319 manat, əhalinin adambaşına düşən gəlirləri 10 faiz artaraq 2 min 16 manat təşkil edib. Bu dövrdə makroiqtisadi və sosial sabitliyin qorunub saxlanılması, əhalinin rifah halının, maddi təminatının yaxşılaşdırılması, aztəminatlı qruplara dövlət qayğısının artırılması, infrastruktur layihələrinin davamlılığı, investisiyaların həcminin çoxalması müşahidə edilib. Prezident İlham Əliyevin qeyd etdiyi kimi, ötən dövr ölkəmiz üçün uğurlu olub və Azərbaycan iqtisadiyyatı ən yüksək templərlə artıb: “Bu il iqtisadiyyatımız 4,1 faiz, qeyri-neft sektoru 5,2 faiz, sənaye istehsalı 3,1 faiz artmışdır. Hesab edirəm ki, bu göstəricilər müsbət göstəricilər kimi qəbul edilməlidir. Nəzərə alsaq ki, son illər ərzində Azərbaycanda çox sürətli iqtisadi inkişaf müşahidə olunurdu, əlbəttə, bu yüksək bazanın üstündə əlavə inkişafa nail olmaq üçün böyük səylər göstərilməli idi. Azərbaycanda iqtisadi sahədə aparılan düşünülmüş siyasət bizə bu göstəricilərə nail olmaq üçün şərait yaratdı. Bu il əhalinin pul gəlirləri 11 faiz artmışdır. Əgər bu rəqəmi inflyasiya ilə müqayisə etsək, görərik ki, əhalinin gəlirləri inflyasiyanı 2 dəfədən çox üstələyir. Bu il və xüsusilə keçən rübdə minimum əməkhaqqı və minimum pensiyanın səviyyəsi 75 manatdan 85 manata qaldırılmışdır. Bu meyillər Azərbaycanda keçən illərdə də müşahidə olunurdu, gələcək illərdə də əhalinin pul gəlirlərinin artırılması üçün dövlət tərəfindən bütün addımlar atılacaqdır”.
2010-cu ilin ötən 9 ayının makroiqtisadi göstəriciləri respublikamızda həyata keçirilən siyasi, iqtisadi və sosial islahatların və məqsədyönlü siyasətin uğurlarının davamı kimi qiymətləndirilə bilər. Prezident İlham Əliyevin rəhbərliyi ilə həyata keçirilən təmkinli, qətiyyətli və çevik iqtisadi strategiya nəticəsində islahatların davamlılığı təmin edilib. Həyata keçirilən düşünülmüş iqtisadi siyasət, liberallaşmanın struktur və keyfiyyət baxımından dərinləşməsi, sahibkarlığa dövlət dəstəyinin artırılması, rəqabət qabiliyyətinin təmin olunması, kompleks islahatlar iqtisadiyyatın şaxələndirilməsinin əsas komponentləri olub.
ölkə iqtisadiyyatının modernləşdirilməsi, diversifikasisya siyasətinin dərinləşməsi bütün sahələrdə dinamizmin təmin olunmasına və yeni inkişaf proqramlarının reallaşmasına əlverişli zəmin yarıdıb. Prezident İlham Əliyev tərəfindən irimiqyaslı, məqsədyönlü islahatların ardıcıllıq və peşəkarlıqla həyata keçirilməsi ölkəmizin maliyyə qüdrətinin daha da yüksəlməsinə, valyuta rezervlərinin artmasına da əhəmiyyətli zəmin yaradıb. Dövlət başçısı deyib ki, “Bu ilin doqquz ayında valyuta ehtiyatlarımız artmışdır. Artıq bu gün mənə verilən məlumata görə, ümumi valyuta ehtiyatlarımız 28 milyard dollardan çoxdur. Bu, əlbəttə ki, bizi daha da gücləndirir, bizi tam şəkildə əmin edir ki, bundan uzun illər, onilliklər sonra Azərbaycan ancaq və ancaq inkişaf yolu ilə gedəcək, Azərbaycan daha da çiçəklənəcək, daha da zəngin dövlətə çevriləcək və ölkə qarşısında duran iqtisadi və sosial problemlər daha da sürətlə həllini tapacaqdır. Bütövlükdə bu mənzərə bir daha onu göstərir ki, Azərbaycan iqtisadiyyatı müstəqil iqtisadiyyatdır, daxili resurslara söykənir, Azərbaycanda iqtisadi və sosial məsələlərin həllində düşünülmüş proqram, strategiya, hər il üçün layihə paketi vardır”.
Azərbaycanın formalaşdırılmış inkişaf bazası, hərtərəfli, balanslaşdırılmış sosial-iqtisadi siyasət, böyük həcmdə strateji valyuta ehtiyatları imkan verir ki, qarşıya qoyulan bütün vəzifələr, o cümlədən, iqtisadi, sosial, hərbi, ekoloji və digər bir çox məsələlər tez bir zamanda öz həllini tapsın. Bu inkişaf tendensiyası o cümlədən, bölgələrdə davamlı quruculuq işlərinin genişlənməsi üçün əlverişli baza yaradır. ötən 9 ayda bölgələrdə davam edən quruculuq, abadlıq işləri bütün rayonların sosial infrastruktur təminatının xeyli yaxşılaşmasına səbəb olub. Dövlətimizin başçısı regional inkişaf proqramlarının icrası ilə bağlı görülən tədbirləri yüksək qiymətləndirib: “Regionlarda gedən işlər bizi qane edir. Mən regionlara tez-tez gedirəm, vəziyyətlə tanış oluram və görürəm ki, həm abadlıq-quruculuq sahəsində, həm də sənayeləşmə, kənd təsərrüfatının, emal sənayesinin inkişafı istiqamətində ildən-ilə çox mühüm addımlar atılır. Təsadüfi deyil ki, bu il də Azərbaycanda yeni iş yerlərinin yaradılması prosesi uğurla davam edibdir. İlin əvvəlindən bəri Azərbaycanda 56 min yeni iş yeri açılmışdır. 2003-cü ildən sonra Azərbaycanda 900 minə yaxın iş yeri açılmışdır. Bu da özlüyündə onu göstərir ki, işsizlik kimi çox çətin və ağır problem Azərbaycanda tədricən öz həllini tapır. Əminəm ki, növbəti illərdə Azərbaycanda işsizliklə bağlı daha da böyük addımlar atılacaqdır”.
Elbrus CƏFƏRLİ

Paylaş:

Baxılıb: 1201 dəfə