Prezident İlham Əliyevin Latviyaya rəsmi səfəri Latviya KİV-lərinin diqqət mərkəzindədir

Bakı:

11 °C

100 %

1 m/s

Əlaqə

AZ RU EN

Ana səhifə / Gündəm / Prezident İlham Əliyevin Latviyaya rəsmi səfəri Latviya KİV-lərinin diqqət mərkəzindədir

Prezident İlham Əliyevin Latviyaya rəsmi səfəri Latviya KİV-lərinin diqqət mərkəzindədir

20.01.2011 [09:21]

Azərbaycan Prezidenti İlham Əliyevin Latviyaya rəsmi səfəri Latviya KİV-lərinin diqqət mərkəzində olub. Bu səfərlə bağlı məlumatlar mətbuatın, elektron KİV-lərin və internet-portalların informasiya buraxılışlarında ən çox diqqət yetirilən yeniliklər olub. Azərbaycan dövlətinin başçısı İlham Əliyevin Riqaya səfəri başa çatdıqdan sonra da Latviya mass-mediası bu səfərin səmərəli yekunlarını şərh etməkdədir. Məsələn, “delfi.lv” internet portalında dərc edilmiş “Əliyev və Zatlers: əməkdaşlığın potensialı tükənməmişdir” adlı materialda deyilir: “Əliyev Latviya ilə siyasi dialoqu yüksək qiymətləndirərək qeyd etmişdir ki, bu dialoqun inkişaf etdirilməsi üçün iqtisadiyyat və mədəniyyət sahələrində xeyli imkan vardır”.
Məqalədə daha sonra deyilir: “Zatlers və Əliyev birgə bəyanat da imzalamışlar. Sənəddə, bütün başqa məqamlardan əlavə, Dağlıq Qarabağda münaqişənin dinc yolla həll edilməsinin zəruriliyi qeyd edilir. Tərəflər Latviyanın və Azərbaycanın müstəqilliyinə və ərazi bütövlüyünə hörmət etdiklərini bildirirlər. İki ölkənin prezidentləri ticarət, müdafiə, kommunikasiyalar, nəqliyyat və logistika, mülki aviasiya, turizm, təbabət, elm, təhsil və digər sahələrdə əməkdaşlığı davam etdirməyə hazır olduqlarını bildirmişlər”.
Latviyanın “mixnews” multimedia informasiya portalında dərc edilmiş “Prezidentlər: Latviya və Azərbaycan hansı məqsədə can atdıqlarını bilirlər” sərlövhəli məqalə də ikitərəfli əməkdaşlıq potensialının artırılması mövzusuna həsr edilib.
Bu materialda qeyd edilir ki, Prezident İlham Əliyevin sözlərinə görə, ölkələrimiz arasında siyasi münasibətlərin yüksək səviyyədə olmasına baxmayaraq, iqtisadiyyat və mədəniyyət sahəsində hələ görüləsi işlər də var. Latviya-Azərbaycan biznes forumunda Azərbaycan biznesinin 50-dən çox nümayəndəsinin iştirak etməsi faktı da bunu təsdiqləyir.
Zatlers isə, öz növbəsində, göstərib ki, Latviyada da bu foruma böyük maraq müşahidə olunur. Latviya tərəfindən həmin forumda 250-dən çox sahibkar iştirak edib.
Prezidentlər informasiya texnologiyaları, nəqliyyat, energetika və linqvistika sahələrində də əməkdaşlığın perspektivlərini müzakirə ediblər.
“Qrani.lv” portalı Prezident İlham Əliyevin Riqaya səfəri barədə “Azərbaycan və Latviya iqtisadiyyat və informasiya texnologiyaları sahələrində əməkdaşlıq edəcəklər” sərlövhəli materialda yazır: “Azərbaycan Prezidenti İlham Əliyevin Latviyaya səfəri iki ölkənin iqtisadi və mədəni əməkdaşlığını möhkəmlətmək məqsədi daşıyırdı”.
Müəllif iki dövlətin münasibətlərinin kifayət qədər müsbət istiqamətdə inkişaf etməsini vurğulayan Latviya Prezidenti Valdis Zatlersə istinad edir: “İlk baxışda tənəzzül gözlənilən bu illər ərzində iqtisadi əməkdaşlığın həcmi 10 faiz artmışdır. Forumun işi nəticəsində Azərbaycan-Latviya işgüzar şurası yaradılması təkcə hökumətlər və dövlət rəhbərləri səviyyəsində deyil, həm də sahibkarlar arasında əlaqələri möhkəmlətməyə imkan verəcəkdir”.
“Qrani” portalındakı məqalənin sonunda deyilir: “Azərbaycan Prezidenti Seymin sədri Solvita Aboltinya ilə də görüşmüşdür. Söhbət zamanı Aboltinya ümidvar olduğunu bildirmişdir ki, iqtisadi böhrana baxmayaraq, iki dövlətin paytaxtları arasında birbaşa hava əlaqəsi iqtisadi əməkdaşlığı xeyli asanlaşdıracaq, bu əməkdaşlığa, eləcə də “ölkələr arasında adi insani əlaqələrə” kömək edəcəkdir”.
“Biznes & Baltiya” nəşrində dərc edilmiş “Bakı Riqaya bir sıra layihələrdə iştirak etməyi təklif etmişdir” və “tvnet.Lv” internet portalında dərc edilmiş “Azərbaycan bizim yollarla maraqlanmışdır” sərlövhəli məqalələr də iqtisadi mövzuya həsr edilmişdir. Birinci məqalədə vurğulanır ki, Azərbaycan Prezidenti İlham Əliyevin Latviyaya rəsmi səfəri zamanı iki dövlətlərarası müqavilə imzalanmış, Latviya-Azərbaycan işgüzar əməkdaşlıq şurası yaradılmışdır. İkinci materialda deyilir: “Latviya-Azərbaycan biznes-forumunda Latviya ilə Azərbaycan arasında energetika və nəqliyyat sahələri kimi istiqamətlər üzrə iqtisadi əməkdaşlıq həyata keçirilə biləcəyini bəyan edən Azərbaycan Prezidenti İlham Əliyev forumu fikir mübadiləsi və yeni əlaqələr axtarışı üçün mühüm məkan kimi qiymətləndirmiş, Avropa ilə Asiyanı birləşdirən dəmir yol layihələrinin inkişaf etdirilməsini nəzərdə tutaraq latviyalı biznesmenlərin təcrübəsi və bilikləri barədə xoş sözlər söyləmişdir. Prezident qeyd etmişdir ki, Latviya ilə Azərbaycan arasında münasibətlərin möhkəmlənməsi bu ölkənin Avropa İttifaqı ilə münasibətlərini də möhkəmlədəcəkdir”.

Paylaş:

Baxılıb: 1051 dəfə