Məzahir Pənahova deyin ki...

Bakı:

25 °C

69 %

11 m/s

Əlaqə

AZ RU EN

Ana səhifə / Gündəm / Məzahir Pənahova deyin ki...

Məzahir Pənahova deyin ki...

22.10.2022 [10:23]

Ağalı kəndinin sakini ictimai rəyi ifadə edir

MÜBARİZ

Oktyabrın 19-da iki il bundan əvvəl işğaldan azad edilən Zəngilan rayonunun Ağalı kəndində heç də adi olmayan bir hadisə yaşandı. Bu yaşayış məntəqəsi dövlətimizin başçısının tapşırığı ilə “ağıllı kənd” konsepti əsasında inşa olunub və bir neçə ay bundan əvvəl buraya sakinlər köçürülüb. Prezident İlham Əliyev və birinci xanım Mehriban Əliyeva Zəngilan rayonuna növbəti səfərləri zamanı Ağalıya gələrək kənd orta məktəbinin şagird-müəllim kollektivi ilə və sakinlərlə görüşüblər. Sakinlər doğma yurd yerlərinin erməni işğalından azad edilməsinə və indi burada onlar üçün hər cür rahatlıqlar yaradılmasına görə dövlət başçımıza minnətdarlıqlarını bildiriblər. Görüş o qədər səmimi ab-havada keçib ki, məktəb şagirdləri və sakinlər ürəklərindən gələn bütün arzu və istəklərini ifadə ediblər. Söhbət əsnasında sakinlərdən biri Prezident İlham Əliyevə üz tutaraq “Mən şəhidlərin, qazilərin, şəhid analarının, atalarının qarşısında baş əyirəm. Onlara minnətdarıq. Bir də bir söz deyim gülməyin mənə, seçki komissiyasının sədri Məzahir Pənahova deyin kağız-kuğuzu korlamasın, bizim Prezidentimiz həmişəlik seçilib”, - deyə bildirib.

Bu, ibrətamiz bir məqamdır. İstənilən siyasi xadim, lider sıravi insanların, seçicilərin dilindən belə sözləri eşitmək üçün nələr etməzdi? Əslində, Ağalı sakininin dilə gətirdiyi sözlər elə ictimai rəyin, ölkədəki ab-havanın, seçicilərin əhvali-ruhiyyəsinin ifadəsidir. Ağalı kəndinin sakininin Prezident İlham Əliyevə xitabən “bizim Prezidentimiz həmişəlik seçilib!” deməsi Azərbaycandakı ictimai rəyi ifadə edir.

Biz yaxın-uzaq ölkələrin timsalında ayrı-ayrı liderlərin seçkilərə, necə deyərlər, hay-küylə, vədlərlə gəldiklərinin şahidi olmuşuq. Ancaq çox keçməyib ki, sular durulub, verilən vədlərin sabun köpüyündən başqa bir şey olmadığı üzə çıxıb. Bununla da vədlərini yerinə yetirə bilməyən liderlər şöhrət olimpindən aşağı yuvarlanıblar. Azərbaycan Prezidentinin nümunəsində isə tamam fərqli mənzərə izlənilir. 2022-ci il oktyabrın 15-də İlham Əliyevin birinci dəfə Azərbaycan Prezidenti seçilməsinin 19 ili tamam oldu. 2003-cü il oktyabrın 15-də keçirilən seçkilərdə Azərbaycan cəmiyyətinin İlham Əliyevə inamının təməlində müxtəlif amillər dayanırdı. Ən başlıca amil isə, heç şübhəsiz ki, insanlarda Ulu Öndər Heydər Əliyevin siyasətinə olan böyük inam idi. Seçicilər respublikamızın sabahını, inkişafını çətin vaxtlarda xalqa arxa, dayaq duran, müstəqilliyimizin əldən getməsinə imkan verməyən Ulu Öndərin əsasını qoyduğu siyasətin davam etdirilməsində görürdülər və əmin idilər ki, Ümummilli Liderin siyasi varisi İlham Əliyev bunu bacaracaq.

“Elin gözü tərəzidir”, deyiblər. İlham Əliyev Ona bəslənən ümidləri yüksək səviyyədə doğruldur. Ölkəmizin hər cəhətdən nümunəvi mənzərəsi bunun ən yaxşı təsdiqidir. 44 günlük müharibədə qazanılan Qələbə, ölkənin ərazi bütövlüyünün təmin olunması və indi qaçqınların, məcburi köçkünlərin doğma yurd yerlərinə qaytarılmasına start verilməsi isə Onun fəaliyyətinin zirvə nöqtəsi sayıla bilər.

Liderə inam mücərrəd bir anlayış deyil. Bu inam liderin fəaliyyətinə görə yaranır və yaxud uzunmüddətli olur. Azərbaycan Prezidenti İlham Əliyev məhz fəaliyyəti ilə xalqın rəğbətini qazanan liderdir. Ağalı sakini sıravi bir vətəndaşdır. Onun üçün həyatda ən böyük istək, arzu doğma yurd yerlərinə qayıtmaq idi ki, bunu da Prezident İlham Əliyev edib. Bundan sonra Ağalı sakini kimi ölkənin rəhbəri vəzifəsində görmək istəyər? Əlbəttə ki, milyonlarla Azərbaycan vətəndaşı kimi onun da arzularını çin edən İlham Əliyevi! 2003-cü il oktyabrın 15-də keçirilən seçkilərdə seçicilərin 76,86 %-i İlham Əliyevə səs vermişdi. Tam əminliklə demək mümkündür ki, əgər bu gün ölkəmizdə yenidən prezident seçkiləri keçirilsə, bu göstərici daha yüksək rəqəmlə ifadə olunacaq.

Paylaş:

Baxılıb: 891 dəfə