AZAL ilə “Bakı-2017” Əməliyyat Komitəsi arasında rəsmi tərəfdaşlığa dair Saziş imzalanıb

Bakı:

26 °C

62 %

3 m/s

Əlaqə

AZ RU EN

Ana səhifə / İdman / AZAL ilə “Bakı-2017” Əməliyyat Komitəsi arasında rəsmi tərəfdaşlığa dair Saziş imzalanıb

AZAL ilə “Bakı-2017” Əməliyyat Komitəsi arasında rəsmi tərəfdaşlığa dair Saziş imzalanıb

31.03.2017 [09:42]

Martın 30-da “Azərbaycan Hava Yolları” QSC (AZAL) ilə “Bakı-2017” IV İslam Həmrəyliyi Oyunlarının Əməliyyat Komitəsi arasında rəsmi tərəfdaşlığa dair Saziş imzalanıb.
AZƏRTAC xəbər verir ki, Azərbaycan Hava Yolları aviaşirkəti “Bakı-2017” IV İslam Həmrəyliyi Oyunlarının növbəti rəsmi tərəfdaşı olub. Saziş “Azərbaycan Hava Yolları” QSC-nin vitse-prezidenti Eldar Hacıyev və “Bakı-2017” IV İslam Həmrəyliyi Oyunları Əməliyyat Komitəsinin əməliyyatlar üzrə baş direktoru Mayk Loynd tərəfindən imzalanıb.
Daha sonra tərəflər arasında sazişin imzalanmasına dair mətbuat konfransı keçirilib.
Mətbuat konfransında “Bakı-2017” IV İslam Həmrəyliyi Oyunları Əməliyyat Komitəsinin əməliyyatlar üzrə baş direktoru Mayk Loynd mötəbər idman tədbirlərində aviaşirkətlərin əsas tərəfdaşlardan biri olduğunu qeyd edərək AZAL şirkətinin Azərbaycanda keçirilən idman tədbirlərinin bir hissəsi olmasının vacibliyini vurğulayıb.
Onun sözlərinə görə, çox böyük nüfuza və güvənə malik olan “Azərbaycan Hava Yolları” QSC-nin “Bakı-2017” IV İslam Həmrəyliyi Oyunlarının rəsmi tərəfdaşı olması çox böyük önəm kəsb edir. Oyunların təbliği işlərində də AZAL mühüm rol oynayacaq.
“Bakı-2017” IV İslam Həmrəyliyi Oyunlarına 43 gün qalıb. 40 gündən az bir müddət ərzində isə artıq qonaqların qarşılanmasına başlanılacaq. Azərbaycan Hava Yolları bu mötəbər tədbirdə mühüm mövqe tutur. Onlar həm qonaqları qarşılayaraq ilkin təəssürat yaradacaq, həm də yola salarkən qonaqların xoş təəssüratına yekun vuracaqlar. Bizim də məhz AZAL ilə tərəfdaş olmağımızda səbəb qonaqlarda ölkəyə gələrkən ilk xoş təəssüratı yaratmaqdır. Azərbaycan Hava Yolları aviaşirkəti coğrafi məkanda çoxşaxəli uçuşlar həyata keçirir. Gələn qonaqlara yüksək səviyyəli xidmət göstərmək, təhlükəsiz uçuşlar həyata keçirmək üçün AZAL ən ideal aviaşirkətdir”, - deyə M.Loynd vurğulayıb.
AZAL-ın vitse-prezidenti Eldar Hacıyev bildirib ki, “Bakı-2017” IV İslam Həmrəyliyi Oyunları ölkəmiz üçün təkcə idman yarışı deyil, eyni zamanda mühüm tarixi tədbirdir: “Biz bu tədbirin təşkilatçılarını dəstəkləməkdən qürur hissi duyuruq. Əminəm ki, ölkəmiz digər mötəbər idman tədbirləri kimi, IV İslam Həmrəyliyi Oyunlarına da yüksək səviyyədə ev sahibliyi edəcək”.
E.Hacıyev qeyd edib ki, sazişə əsasən “Bakı-2017” IV İslam Həmrəyliyi Oyunları Əməliyyat Komitəsi Azərbaycan Hava Yollarının infrastrukturundan istifadə etmək hüququna malikdir.
Qeyd edək ki, İslam dünyasını birləşdirən maraqlı, çoxnövlü idman tədbiri olan “Bakı-2017” bu il mayın 12-22-də Azərbaycan paytaxtında keçiriləcək. Müsəlman dövlətlərini təmsil edən idmançılar on gün ərzində idmanın 20 növü (23 kateqoriya) - atletika və para-atletika, su idmanı növləri (suyatullanma, üzgüçülük, su polosu), basketbol 3x3, futbol, idman gimnastikası, bədii gimnastika, uşu, stolüstü tennis, həndbol, cüdo və görmə qabiliyyəti olmayanlar üçün cüdo, yunan-Roma güləşi, sərbəst güləş, atıcılıq, tennis, voleybol, boks, zorxana, karate, taekvando, ağır atletika üzrə yarışlarda mübarizə aparacaqlar. Yarışlar paytaxtın 16 müasir idman qurğusunda təşkil olunacaq.
İslam Həmrəyliyi İdman Federasiyasının səkkizinci seçilmiş Baş Assambleyası Səudiyyə Ərəbistanının Ciddə şəhərində dördüncü İslam Həmrəyliyi Oyunlarının 2017-ci ildə Azərbaycanda keçirilməsinə qərar verib.

Paylaş:

Baxılıb: 998 dəfə