Bu gün “Tour d’Azerbaidjan-2017” beynəlxalq velosiped turu start götürür

Bakı:

21 °C

74 %

5 m/s

Əlaqə

AZ RU EN

Ana səhifə / İdman / Bu gün “Tour d’Azerbaidjan-2017” beynəlxalq velosiped turu start götürür

Bu gün “Tour d’Azerbaidjan-2017” beynəlxalq velosiped turu start götürür

03.05.2017 [08:39]

Builki yarışda 18 ölkədən 22 komanda mübarizə aparacaq ki, onlardan da 6-sı peşəkar kontinental, “Synergy Baku” da daxil olmaqla 16-sı kontinental kollektivdir
Son illər silsilə beynəlxalq tədbirlərinin, həmçinin nüfuzlu idman yarışlarının keçirildiyi məkan kimi tanınan Azərbaycan daha bir mötəbər turnirə ev sahibliyi edir. Belə ki, bu gün Bakıda “Tour d’Azerbaidjan-2017” beynəlxalq velosiped turu start götürür. Bu barədə dünən Respublika Velotrekində keçirilən mətbuat konfransında məlumat verilib.
Veloturun Təşkilat Komitəsinin sədri, Azərbaycan Velosiped İdmanı Federasiyasının vitse-prezidenti, Avropa Velosipedçilər Birliyinin Rəhbər Komitəsinin üzvü Sahib Ələkbərovun və yarışın texniki direktoru, Avropa Velosipedçilər Birliyinin fəxri baş katibi Roland Hoferin iştirak etdiyi mətbuat konfransında builki yarışda 18 ölkədən 22 komandanın mübarizə aparacağı qeyd olunub.
Veloturun Təşkilat Komitəsinin sədri Sahib Ələkbərov 2.1 kateqoriyalı “Tour d’Azerbaidjan-2017” barədə ətraflı məlumat verərək bildirib ki, yarış gözəl idman tədbiri olmaqla yanaşı, ölkəmizin beynəlxalq arenada təbliği baxımından mühüm rol oynayır: “Velosiped idmanı başqa idman növlərindən onunla fərqlənir ki, digər yarışlar əsasən qapalı məkanda keçirildikləri halda, bu yarışlar yüz kilometrlərlə məsafəni əhatə edir və düzənlik, dağlıq ərazilərdən, müxtəlif şəhər, rayon, qəsəbə və kəndlərdən keçməklə təşkil olunur. Təbii ki, bu da ölkənin beynəlxalq səviyyədə tanınması, onun görməli yerlərinin, turistləri maraqlandıran məkanların bütün dünyaya təqdim edilməsi üçün çox vacibdir. Azərbaycan xalqının Ümummilli lideri Heydər Əliyevin anadan olmasının 94-cü ildönümünə həsr olunan “Tour d’Azerbaidjan-2017” beynəlxalq velosiped turu Gənclər və İdman Nazirliyi, Milli Olimpiya Komitəsi və Beynəlxalq Velosipedçilər İttifaqının dəstəyi ilə Azərbaycan Velosiped İdmanı Federasiyası tərəfindən təşkil olunur”.
Sahib Ələkbərov əlavə edib ki, “Tour d’Azerbaidjan-2017” veloturu ölkəmizdə keçiriləcək IV İslam Həmrəyliyi Oyunları öncəsi dünya idman ictimaiyyətinin diqqətini bir daha Azərbaycana yönəldəcək.
Onun sözlərinə görə, builki yarışda 18 ölkədən 22 komanda mübarizə aparacaq ki, onlardan da 6-sı peşəkar kontinental, “Synergy Baku” da daxil olmaqla 16-sı kontinental kollektivdir: “İştirakçılar 1-ci mərhələdə Bakı - Sumqayıt (150 km), 2-ci mərhələdə Bakı - İsmayıllı (187 km), 3-cü mərhələdə Qəbələ - Şəki - Qəbələ (177 km), 4-cü mərhələdə Qəbələ - Ağsu - Pirqulu (164 km) və sonuncu mərhələdə Bakı - Abşeron - Bakı (158 km) marşrutu üzrə ümumilikdə 836 km məsafə qət edəcəklər. Əvvəlki illərdən fərqli olaraq bu il turun 4-cü mərhələsinə Ağsu dolaylarının əlavə edilməsi yarışa olan marağı daha da artırıb”.
Sahib Ələkbərov Azərbaycanın “Synergy Baku” klubunun güclü və ümidverici velosipedçilərdən ibarət olduğunu da deyib.
Azərbaycana hər səfərində bir çox müsbət dəyişikliklərin şahidi olduğunu deyən yarışın texniki direktoru R.Hofer ölkəmizdə velosiped idmanının günü-gündən inkişaf etməsindən, yeni idman qurğularının tikilməsindən məmnunluğunu bildirib. O qeyd edib ki, Azərbaycanda artıq velosiped idmanının inkişafı üçün gözəl baza yaradılıb, Velopark, BMX stadionu, Dağ Velosipedi parkı, Velotrek istifadəyə verilib: “Bunun nəticəsidir ki, ölkə 2018-ci ildə velosiped idmanının BMX növü üzrə dünya çempionatına ev sahibliyi edəcək. Bu da ölkənin dünya velosiped aləmində mövqelərinin getdikcə güclənməsinin bariz nümunəsidir”.
“Tour d’Azerbaidjan-2017” beynəlxalq velosiped turunun əvvəlki illərdə oluğu kimi, bu dəfə də uğurla keçəcəyinə əmin olduğunu deyən R.Hofer qonaqların Azərbaycandan ən xoş hisslərlə ayrılacaqlarına şübhə etmədiyini vurğulayıb.
Sonra jurnalistlərin sualları cavablandırılıb.
Nadir AZƏRİ

Paylaş:

Baxılıb: 1003 dəfə