“Bakı-2017”nin futbol yarışının yarımfinalçıları müəyyənləşib

Bakı:

23 °C

78 %

3 m/s

Əlaqə

AZ RU EN

Ana səhifə / İdman / “Bakı-2017”nin futbol yarışının yarımfinalçıları müəyyənləşib

“Bakı-2017”nin futbol yarışının yarımfinalçıları müəyyənləşib

16.05.2017 [09:00]

Azərbaycan milli komandası mübarizəni yarımfinalda davam etdirəcək
Mayın 15-də IV İslam Həmrəyliyi Oyunlarının futbol yarışında qrup mərhələsinin sonuncu turunun oyunları keçirilib, yarımfinalçılar müəyyənləşib.
AZƏRTAC xəbər verir ki, “A” qrupunda yer alan Azərbaycan millisi Mərakeş yığması ilə qarşılaşıb. “Bayıl Arena”da təşkil olunan görüşdə futbolçuların cəhdlərinə baxmayaraq, hesab açılmayıb və komandalar bir xalla kifayətləniblər.
“AZAL Arena”da isə Kamerun və Səudiyyə Ərəbistanı yığmaları üz-üzə gəliblər. Azərbaycanlı hakimlər briqadasının idarə etdiyi oyunun 39-cu dəqiqəsində kamerunlu futbolçu Denis İvan Nkolo Ossinqane topu başla qapıya göndərib. Matçın 46-cı dəqiqəsində Səudiyyə Ərəbistanı millisinin qapısına təyin olunmuş 11 metrlik cərimə zərbəsini Frantz Panqop Tçidcui dəqiq yerinə yetirib. Görüşün ilk hissəsi Kamerun yığmasının 2:0 hesablı üstünlüyü ilə bitib. Matçın 59-cu dəqiqəsində Kamerun millisinin üzvü Moueqni Baqnak oyunda sonuncu qolu rəqib qapısından keçirib. Beləliklə, görüş Kamerun futbolçularının 3:0 hesablı qələbəsi ilə yekunlaşıb.
“A” qrupunda hesabında 5 xal olan Kamerun, Azərbaycan və Mərakeş yığmaları qrupda ilk üç pillədə qərarlaşıblar. Səudiyyə Ərəbistanı yığmasının isə xalı yoxdur. Əlavə göstəricilərə görə, Kamerun və Azərbaycan yığması yarımfinala yüksəliblər.
“B” qrupunun oyunları çərçivəsində “AZAL Arena”da Oman millisi Əlcəzair yığması ilə qarşılaşıb. Moldovalı baş hakim Andrey Çebanın idarə etdiyi oyunun 40-cı dəqiqəsində Oman millisinin üzvü Muhsen Əl-Qassani hesabı açıb. Matçın 46-cı dəqiqəsində əlcəzairli Tayeb Mezaiani hesabı bərabərləşdirib. İkinci hissədə komandaların cəhdlərinə baxmayaraq, hesab dəyişməyib və matç 1:1 hesablı heç-heçə ilə yekunlaşıb.
“Bayıl Arena”da təşkil olunan digər oyunda isə Türkiyə və Fələstin yığmaları üz-üzə gəliblər. Görüşə fəal başlayan Fələstin millisi oyunun 23-cü dəqiqəsində Oday Dabbaq, dörd dəqiqə sonra Mohammed Maraaba və 33-cü dəqiqədə İslam Batranın qolları hesabda önə çıxıb. Görüşün 44-cü dəqiqəsində türkiyəli Can Hakki Aksu fərqlənib. Oyunun birinci hissəsi Fələstin yığmasının 3:1 hesablı üstünlüyü ilə yekunlaşıb. Matçın 63-cü dəqiqəsində Melih Okutan və 71-ci dəqiqəsində Taylan Antalyalı rəqib qapısına yol taparaq hesabı bərabərləşdiriblər. Qarşılaşmanın 81-ci dəqiqəsində Can Hakki Aksu dubl edərək Türkiyə millisinin 4:3 hesablı qələbəsini rəsmiləşdirib.
Hesabında 7 xal olan Əlcəzair millisi “B” qrupunun lideri kimi yarımfinala vəsiqə qazanıb. Oman yığması (5 xal) qrup ikincisi kimi mərhələ adlayıb. Türkiyə 3 xalla qrupda üçüncü, Fələstin isə 1 xalla sonuncu pillədə qərarlaşıblar.
Mayın 18-də keçiriləcək yarımfinal mərhələsində Azərbaycan-Əlcəzair və Oman-Kamerun görüşləri keçiriləcək.

Paylaş:

Baxılıb: 1099 dəfə