Avropa Bankı razıdır

Bakı:

28 °C

49 %

5 m/s

Əlaqə

AZ RU EN

Ana səhifə / İqtisadiyyat / Avropa Bankı razıdır

Avropa Bankı razıdır

30.11.2024 [10:18]

Azərbaycanın maliyyə-bank sektoru müasir inkişaf çağırışlarına uyğun təkmilləşdirilib

Avropa Yenidənqurma və İnkişaf Bankının (AYİB) bugünlərdə açıqladığı hesabatda Azərbaycanda maliyyə sektorunun inkişafı ilə bağlı aparılan instit?sional islahatlar, o cümlədən bank və maliyyə qanunvericiliyinin müasir dünya çağırışlarına uyğun təkmilləşdirilməsi təqdir olunur. Hesabatda qeyd edilir ki, rəqəmsal quruculuğa dayanıqlı keçid strategiyalarının hazırlanması və yeni maliyyə ekosisteminin formalaşdırılması kapital bazarında likvidliyin artırılmasına və risklərin idarə edilməsinə münbit şərait yaradır.

Kapital bazarları inkişaf mərhələsinə çatıb

AYİB ekoloji cəhətdən təmiz investisiya layihələrinin dəstəklənməsini nəzərdə tutan yeni maliyyələşdirmə alətlərinin təşviqi və emissiyası istiqamətində Azərbaycanın bank institunun təmin etdiyi müasir qanunvericilik bazasının əhəmiyyətinə də diqqət çəkir, bu tədbirlərin beynəlxalq standartlara cavab verməklə davamlı maliyyə sisteminin inkişafına və qlobal bazarlara inteqrasiya üçün stimul verdiyini vurğulayır. Bildirilir ki, Azərbaycanın bank tənzimləyici orqanı kommersiya banklarına çoxçeşidli investisiya xidmətləri göstərməyə imkan verən xüsusi qaydalar tətbiq edib ki, bu da investorlar üçün birbaşa giriş kanallarını genişləndirir.

AYİB-in ekspertlərinin qənaətinə görə, ümumilikdə, Azərbaycanda kapital bazarları mühüm inkişaf mərhələsinə çatıb, ölkənin aktivlərinə görə ən böyük bankı olan Azərbaycan Beynəlxalq Bankı bank tarixində ilk İlkin Kütləvi Təklif (IPO) elan edib ki, bu meyar üzrə sövdələşmənin ilin sonuna qədər başa çatması gözlənilir. İPO missiyası Beynəlxalq Bankın səhmdarlar bazasını şaxələndirmək və əlavə kapital cəlb etmək üçün yeni mühit yaradıb, habelə səhmlərinin əhəmiyyətli hissəsinin yerli və beynəlxalq investorların əlində cəmləşməsinə imkan verməklə səhm sektorunun rəqabətliliyini genişləndirib.

AYİB “yaşıl istiqraz” və “yaşıl səhm”lərin buraxılışına dəstək göstərəcək

Qeyd edək ki, Mərkəzi Bank (MB) tərəfindən bir neçə gün əvvəl təsdiqlənən “Yaşıl Taksonomiya” sənədində bank və maliyyə institutları, investorlar, beynəlxalq təşkilatlar və digər tərəfdaşların iştirakı ilə rəqəmsal quruculuğa keçid üçün “yaşıl maliyyə” alətlərinin ölkəmizdə tətbiqinin genişləndirilməsi nəzərdə tutulub. Azərbaycanın bank sisteminin “yaşıl istiqraz” və “yaşıl səhm”lərin emissiyasına hazırlığı üçün xarici maliyyə institutları və emitentlərindən köməyindən istifadə olunacaq ki, onlardan biri də Avropa Bankıdır.

Azərbaycan Mərkəzi Bank ilə AYİB arasında qarşıdakı illərdə əməkdaşlığın gündəliyində maliyyə sisteminin “yaşıl”laşdırılmasını təmin etmək üçün yeni risk daşımayan yuksək keyfiyyətli, likvid maliyyə məhsullarının dövriyyəyə çıxarılması nəzərdə tutulur ki, bu layihələrin icrası ekoloji layihələrin maliyyə təminatı baxımından mühüm əhəmiyyət kəsb edir. Yeri gəlmişkən, Avropa Bankı Azərbaycanda bərpa olunan enerji və regional “yaşıl enerji” dəhlizinin həyata keçirilməsində maliyyə donorluğuna da razılıq verib. AYİB 2027-ci ilədək 8 külək və günəş elektrik stansiyasının istismara hazırlanmasına kreditlər ayırmaqla bağlı Bakı ilə razılaşıb. Həmçinin, “Xəzər-Qara dəniz-Avropa” dəhlizinin yaradılmasında maliyyə təchizatçı olmaq niyyətini ifadə edib.

Kibertəhlükəsizliklə bağlı tədbirlər də qaneedicidir

Avropa Bankı Azərbaycanda kibertəhlükəsizliyin vəziyyətinin də qənaətbəxş olduğunu bildirir. Mərkəzi Bankın (MB) məlumatların qorunmasının gücləndirilməsi və kibertəhdidlərin minimuma endirilməsi istiqamətində gördüyü tədbirlər də müsbət addımlar kimi səciyyələndirilir. Həmçinin, bank sistemində infrastruktur məhdudiyyətlərinin aradan qaldırılması sayəsində yeni güclü ekosistem və rəqəmsallaşma infrastrukturu möhkəmlənməkdədir. Hesabat müəlliflərinin fikrincə, hökumətin ötən ilin avqustunda məlumatların qorunması və milli rəqəmsal məkanın vahid standartlarının yaradılmasına yönəlmiş ilk beşillik “2023-2027-ci illər üçün İnformasiya təhlükəsizliyi və kibertəhlükəsizlik Strategiyası”nın qəbul edilməsi də bank sektorunda iradəli islahatların mühüm tərkib hissəsidir.

Avropa Bankı ilə əməkdaşlıq ölkəmizdə dayanıqlı maliyyə ekosisteminin formalaşdırılmasına, daxili və xarici resursların yaşıl və dayanıqlı layihələrə yönəldilməsinə, iqlim dəyişikliyindən yaranan risklərin tənzimlənməsinə, aşağı karbon iqtisadiyyatına keçidə, həmçinin mal və xidmətlərin ixracı sahəsində ixtisaslaşan müəssisələrə maliyyə köməkliyinin göstərilməsinə imkan verəcək.

E.CƏFƏRLİ

Paylaş:

Baxılıb: 557 dəfə