Bölgədə iqtisadi inkişafa və turizmə açılan yol

Bakı:

17°C

77%

0m/s

Əlaqə

AZ RU EN

Ana səhifə / İqtisadiyyat / Bölgədə iqtisadi inkişafa və turizmə açılan yol

Bölgədə iqtisadi inkişafa və turizmə açılan yol

19.04.2025 [11:29]

Ağdam-Xankəndi dəmir yolu xəttinin tikintisinə başlanılır

“Azərbaycan Dəmir Yolları” (ADY) QSC Ağdam-Xankəndi dəmir yolu xəttinin layihələndirmə işlərinə başlayıb. Layihə tamamlandıqdan sonra cari ilin qarşıdakı aylarında dəmir yolunun tikinti işlərinə başlanması nəzərdə tutulur. Artq bununla bağlı podratçı şirkət seçilib və mobilizasiya işləri davam etdirilir. ADY sədrinin müşaviri Tural Abbaslı “Nəqliyyat İnfrastrukturunun inkişafına dair sual və təkliflərin müzakirəsi” mövzusunda keçirilən “Milli Biznesin İnkişafı Forumunda bildirib ki, Ağdamdan Xankəndiyə qədər uzanan dəmir yolunun uzunluğu 27-28 kilometrdir.

Tural Abbaslı əlavə edib ki, Ağdam avtovağzal və dəmir yolu kompleksinin tikintisi tamamlanma mərhələsindədir: “İşlərin növbəti ayın əvvəllərinə tam olaraq bitməsi nəzərdə tutulub. Bu, Azərbaycan Yerüstü Nəqliyyat Agentliyi ilə birgə çalışdığımız layihədir. Burada şəhərlərarası, rayonlararası marşrutlar və dəmir yolu stansiyası fəaliyyət göstərəcək.

Ulu öndərin əsasını qoyduğu layihə

Xatırladaq ki, Ağdam-Xankəndi dəmir yolu 1979-cu ildə Ümummilli Lider Heydər Əliyevin təşəbbüsü ilə inşa olunub. Məqsəd Qarabağın inkişafında mühüm rol oynayan sənaye istehsalı və emalı tədarüklərini gücləndirmək və digər bölgələrlə nəqliyyat inteqrasiyasını təmin etmək idi və sözügedən dəmir yolu xətlərinin çəkilməsi Xankəndinin digər sənaye sistemlərinə qoşulmasına təkan verib. Həmin dövrdə Ağdam-Xankəndinin illik daşınma gücü illik 1 milyon ton idi və kifayət qədər böyük mal axınlarının təchizatını təmin edirdi. Nəqliyyat xətti Yevlax-Bakı dəmir yoluna qoşulmaqla Qarabağın sosial-iqtisadi, mədəni inkişafı daha da sürətləndirdi, Bakı ilə əlaqələri möhkəmləndirdi. Bu, əhalinin maddi-texniki təchizatını yaxşılaşdırmaqla bərabər, həm də regionun iqtisadi göstəricilərinin əhəmiyyətli dərəcədə artmasına imkan verdi. Məsələn, xammalın tədarükü və məhsulların daşınması xərclərinin aşağı düşməsi səbəbindən Qarabağda istehsal olunan məhsulların maya dəyəri xeyli ucuzlaşdı.

Sahibkarlar üçün yeni fürsətlər

Ermənistanın Azərbaycana hərbi təcavüzü və ərazilərimizin 20 faizinin işğalı nəticəsində iqtisadiyyatın digər sahələri kimi respublikanın dəmir yolu təsərrüfatı, o cümlədən Ağdam-Xankəndi, Bərdə-Yevlax-Xankəndi dəmir yolu da dağıdılaraq sıradan çıxarılıb. Hazırda azad edilmiş torpaqlarımızda bütün nəqliyyat-yol infrastrukturları yenidən qurulur və Böyük Qayıdışa dair Birinci Dövlət Proqramı çərçivəsində inşa edilən Xankəndi dəmir yolu xətti bu quruculuq planının ən mühüm həlqələrindən biridir.

Yeni dəmir yolu sadəcə nəqliyyat layihəsi deyil, eyni zamanda, iqtisadi inkişaf və rifahı təmin edəcək proqramın mühüm tərkib hissəsi kimi qiymətləndirilə bilər. Yol və digər kommunikasiyaların qurulması bölgədə sahibkarların fəaliyyyəti, biznesin yeni layihələrinin icra edilməsi, xarici və yerli sərmayə qoyuluşları, milli istehsalın artması və ixracın diversifikasiyası üçün mühüm əhəmiyyət kəsb edir. Nəzərə alsaq ki, Xankəndi zəngin iqtisadi potensiala və xammal ehtiyatlarına malik bölgədir, burada sənaye, emal-kənd təsərrüfatı, turizm üçün münbit şərait mövciddur.

Xankəndinin ətraf rayonlarla bağlantısı təmin ediləcək

Hazırda Xankəndi şəhərində iqtisadi layihələrin icrasına start verilib və bölgədə sahibkarlıq fəaliyyəti üçün əlverişli imkanlar açılıb. İş adamları, sənaye icması Xankəndi şəhərində və ətraf rayonlarda çoxistiqamətli layihələrə cəlb olunub, xidmət, turizm, emal sənayesi infrastrukturları yaradılmaqdadır. “Qarabağ”, “Palace”, “Bulud”, “Şəfəq” və digər hotellərin, turizm, iaşə və xidmət obyektlərinin açılışı Xankəndinin inkişafında yeni mərhələ açıb. Habelə, şəhərdə dövlət-özəl sektor və biznes icmasının istehsal və xidmətlə bağlı imkanları səfərbər edilir. Bütün bu proseslər bölgənin digər şəhər və rayonlarla reinteqrasiyaya qoşulmasını artırır. İnşa edilən nəqliyyat layihələri Xankəndinin təkcə Ağdamla deyil, digər rayonlarla bağlantısını həll edəcək, eləcə də Şuşa, Əsgəran, Ağdərə və digər rayonlarla sərnişin və yük daşınmalarının vahid zəncirdə birləşməsini mümkünləşdirəcək.

Beləliklə, Ağdam-Xankəndi nəqliyyat qovşaqlarının yaradılması, kommunikasiya xətlərinin açılması region üçün perspektiv inkişafın sürətlənməsinə səbəb olacaq.

E.CƏFƏRLİ

Paylaş:

Baxılıb: 330 dəfə