Sahibkarlıq fəaliyyəti ilə bağlı bütün lisenziyalar “ASAN xidmət” mərkəzlərində veriləcək

Bakı:

28 °C

45 %

2 m/s

Əlaqə

AZ RU EN

Ana səhifə / İqtisadiyyat / Sahibkarlıq fəaliyyəti ilə bağlı bütün lisenziyalar “ASAN xidmət” mərkəzlərində veriləcək

Sahibkarlıq fəaliyyəti ilə bağlı bütün lisenziyalar “ASAN xidmət” mərkəzlərində veriləcək

21.10.2015 [10:05]

Anar Hüseynov: Prezident İlham Əliyevin lisenziya verilməsi qaydalarının sadələşdirilməsi barədə imzaladığı Fərman sahibkarlığın inkişafına müsbət təsirini göstərəcək
Məlum olduğu kimi, 2015-ci il oktyabrın 19-da Azərbaycan Respublikasının Prezidenti İlham Əliyev tərəfindən qanunvericilik təşəbbüsü qaydasında Milli Məclisə sahibkarlıq sahəsində aparılan yoxlamaların dayandırılmasını nəzərdə tutan qanun layihəsi göndərilib. Qanun layihəsinə əsasən, 2015-ci il noyabrın 1-dən etibarən sahibkarlıq sahəsində aparılan yoxlamalar 2 il müddətinə dayandırılır. Eyni zamanda, Azərbaycan Respublikasının Prezidenti İlham Əliyev tərəfindən imzalanmış Fərmanla lisenziyaların sayının minimuma endirilməsi, lisenziya verilməsi qaydalarının sadələşdirilməsi və şəffaflığının təmin edilməsi, sahibkarlıq fəaliyyəti ilə bağlı bütün lisenziyaların İqtisadiyyat və Sənaye Nazirliyi tərəfindən “ASAN xidmət” mərkəzlərində verilməsi nəzərdə tutulub.
Xatırladaq ki, Prezident İlham Əliyev sahibkarlıq subyektlərinin yoxlanılması məsələsinə oktyabrın 12-də Nazirlər Kabinetinin 2015-ci ilin 9 ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasda çıxışı zamanı da toxunmuşdu. Ölkə başçısı çıxışında sahibkarlıq sahəsində yoxlamalardan çoxsaylı şikayətlərin daxil olmasını, yoxlamaların, eləcə də lisenziyaların sayının həddindən artıq çox olmasını, göstərilən sahədə sui-istifadə hallarının qarşısının alınacağını, nəticə çıxarmayanların da cəzalandırılacağını bildirmişdi. Dövlət başçısı qeyd etmişdi ki, biznes mühitini yaxşılaşdırmaq və biznesin inkişafına təkan vermək üçün çox ciddi addımlar atılacaq: “Deməliyəm ki, yoxlamalarla bağlı çoxsaylı şikayətlər gəlir. Yoxlamaların sayı kifayət qədər çoxdur, yoxlayan təşkilatlar da sanki bir-biri ilə rəqabətə çıxıb. Bu da dözülməzdir. Yoxlamaların böyük əksəriyyətinin arxasında yenə də maddi təmənna dayanır. Yoxlayan gəlir, nəyi yoxlayır, nəyi yoxlamır, ancaq nəticə etibarilə öz payını alır, çıxıb gedir. Budur reallıq. Bu, heç kim üçün sirr deyil. Buna da son qoyulmalıdır. Ona görə də qısa müddət ərzində mənə yoxlamalarla bağlı müfəssəl məlumat verilsin - hansı qurumlar kimi yoxlayırlar, ildə neçə dəfə yoxlayırlar, nə üçün yoxlayırlar. Burada bir sistem olmalıdır. Yoxlamaların tənzimlənmə mexanizmi işlənməlidir. Burada müəyyən şərtlər qoyulmalıdır - kim, nə vaxt, hansı müddət ərzində kimi yoxlaya bilər? Ümumiyyətlə, biz bu yoxlamaların sayını kəskin şəkildə aşağı salmalıyıq...”.
Yeri gəlmişkən, aidiyyəti qurumlar artıq Fərmandan irəli gələn məsələlərin icrasına başlayıblar. Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin ictimaiyyətlə əlaqələr sektorunun müdiri Anar Hüseynov Prezident İlham Əliyevin lisenziyaların sayının minimuma endirilməsi, lisenziya verilməsi qaydalarının sadələşdirilməsi və şəffaflığının təmin edilməsi, sahibkarlıq fəaliyyəti ilə bağlı bütün lisenziyaların İqtisadiyyat və Sənaye Nazirliyi tərəfindən “ASAN xidmət” mərkəzlərində verilməsini nəzərdə tutan Fərmandan irəli gələn məsələlərlə bağlı artıq ciddi işlərə başlanıldığını bildirib. Anar Hüseynovun sözlərinə görə, bununla bağlı qurum öhdəsinə düşən bütün işləri görməyə hazırdır. O bildirib ki, hazırda Fərmandan irəli gələn məsələlərin icrası ilə bağlı müzakirələr davam edir. Bununla yanaşı, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə birlikdə sahibkarlıq fəaliyyətinin həyata keçirilməsi üçün tələb olunan xüsusi razılıq (lisenziya), sertifikat, şəhadətnamə və digər sənədlərin elektron qaydada verilməsini təmin edən “Elektron lisenziya” portalının yaradılması istiqamətində də işlər həyata keçirilir: “Prezident İlham Əliyevin lisenziya verilməsi qaydalarının sadələşdirilməsi barədə imzaladığı Fərman sahibkarlığın inkişafına müsbət təsirini göstərəcək. Bununla bağlı qurumumuzda məsləhətləşmələr olub. Müvafiq istiqamətlərdə aidiyyəti orqanlarla işlərimiz davam edir”.
Vüsalə CAVANŞİR

Paylaş:

Baxılıb: 1063 dəfə