ICAO-nun prezidenti Azərbaycanda səfərdədir

Bakı:

25 °C

66 %

6 m/s

Əlaqə

AZ RU EN

Ana səhifə / İqtisadiyyat / ICAO-nun prezidenti Azərbaycanda səfərdədir

ICAO-nun prezidenti Azərbaycanda səfərdədir

23.10.2015 [10:21]

Oktyabrın 22-də Beynəlxalq Mülki Aviasiya Təşkilatının (ICAO) prezidenti Olumuiva Benard Aliu Azərbaycana səfərə gəlib.
AZƏRTAC xəbər verir ki, qonağı qarşılayan “Azərbaycan Hava Yolları” QSC-nin prezidenti Cahangir Əsgərov “Azərbaycan Hava Yolları”nın yüksək sürətlə inkişaf etdiyini vurğulayıb və mülki aviasiyanın hazırkı mərhələsi barədə məlumatlandırıb.
Bildirilib ki, Heydər Əliyev Beynəlxalq Aeroportunun yeni aerovağzal kompleksi 2014-cü il aprelin 23-də istifadəyə verilib. İldə 6 milyon sərnişin daşıma gücünə malik olan yeni aerovağzal kompleksinin ümumi sahəsi 65 min kvadratmetrdir. Sərnişinlərin rahatlığını təmin etmək üçün aeroportda hər bir imkan yaradılıb - çoxlu sayda kafe və restoranlar, biznes salonlar, interaktiv köşklər və uşaq meydançası mövcuddur, zallarda 2000-dən çox rahat oturacaq, 40 ədəd qeydiyyat masası, 30 eskalator, 21 lift və binanın xaricində teleskopik traplar quraşdırılıb. İdarəetmə mərkəzində quraşdırılmış avadanlıq 165 min kvadratkilometr ərazidə hava gəmilərinin uçuşlarını idarə etməyə imkan verir. Yeni uçuş-enmə zolağı ICAO-nun ən yüksək kateqoriyasına cavab verən işıqlandırma sistemləri, radionaviqasiya avadanlığı və radarlarla təchiz olunub.
Aeroportla tanışlıqdan sonra tərəflər arasında görüş keçirilib. Görüşdə “Azərbaycan Hava Yolları” QSC-nin prezidenti Cahangir Əsgərov aviaşirkətin fəaliyyəti, onun uğurlarından bəhs edib.
Görüşdən sonra “Azərbaycan Hava Yolları” QSC-nin prezidenti Cahangir Əsgərova üzərində “Təsdiq olunur ki, Heydər Əliyev Beynəlxalq Aeroportu mülki aviasiyanın beynəlxalq uçuşları üçün açıqdır” sözləri yazılan Dövlətlərarası Aviasiya Komitəsinin sertifikatı təqdim olunub. Sertifikatı təqdim edən Dövlətlərarası Aviasiya Komitəsinin sədri Tatyana Anodina Cahangir Əsgərovu mülki aviasiyanın bacarıqlı mütəxəssisi və veteranı adlandırıb, Heydər Əliyev Beynəlxalq Aeroportunun dünyanın ən yaxşı aeroportlarından biri olduğunu bildirib. O, Azərbaycan Prezidenti İlham Əliyevə və Azərbaycan hökumətinə ölkədə mülki aviasiyanın inkişafına göstərdikləri dəstəyə görə təşəkkürünü bildirib.
T.Anodina ICAO prezidentinə Azərbaycanda mövcud olan digər aeroportlarla da tanış olmağı tövsiyə edib. Heydər Əliyev Beynəlxalq Aeroportunun möhtəşəmliyi, onun müasir dünya standartlarına və beynəlxalq mülki aviasiyanın tələblərinə cavab verdiyindən danışan T.Anodina bildirib ki, yalnız paytaxt Bakının aeroportu yox, Azərbaycanın digər şəhərlərinin aeroportları da çox gözəldir və müasir tələblərə cavab verirlər.
ICAO prezidenti Olumuiva Benard Aliu “Silk Way Business Aviation”, “Baku Cargo Terminal”ı, “Silk Way Technics” və “Azəraeronaviqasiya” Hava Hərəkəti İdarəsinin binalarına baş çəkib, oradakı inkişafla tanış olub, görülən işlər barədə məlumatlandırılıb.
ICAO prezidenti Heydər Əliyev Beynəlxalq Aeroportunda yaradılmış şəraitə, mülki aviasiya sahəsində görülən işlərə çox böyük qiymət verib.

Paylaş:

Baxılıb: 1104 dəfə