Dövlət Statistika Komitəsi ilə Dünya Bankı arasında statistika sahəsində əməkdaşlığın inkişafı məsələsi müzakirə edilib

Bakı:

27 °C

57 %

10 m/s

AZ RU EN

Ana səhifə / İqtisadiyyat / Dövlət Statistika Komitəsi ilə Dünya Bankı arasında statistika sahəsində əməkdaşlığın inkişafı məsələsi müzakirə edilib

Dövlət Statistika Komitəsi ilə Dünya Bankı arasında statistika sahəsində əməkdaşlığın inkişafı məsələsi müzakirə edilib

26.10.2017 [10:25]

Azərbaycan Respublikası Dövlət Statistika Komitəsinin sədri Tahir Budaqov ölkəmizdə səfərdə olan Dünya Bankının nümayəndə heyəti ilə görüşüb. Bu barədə AZƏRTAC-a Dövlət Statistika Komitəsinin mətbuat xidmətindən məlumat verilib.
Dünya Bankının iqtisadçısı, tapşırıq qrupunun rəhbəri Moritz Meyer, dövlət sektoru üzrə baş mütəxəssis Qreqori Kisunko, baş iqtisadçı Alan Fuçs, proqram üzrə assistent Nigar Sadıqova və Azərbaycan nümayəndəliyinin əməliyyatlar üzrə baş mütəxəssisi Səidə Bağırlının iştirak etdiyi görüşdə Dövlət Statistika Komitəsi ilə Beynəlxalq Yenidənqurma və İnkişaf Bankı arasında imzalanmış və Azərbaycan Respublikası Nazirlər Kabinetinin 2017-ci il 16 avqust tarixli sərəncamı ilə təsdiq edilmiş “Azərbaycan Respublikası: 2018-2022-ci illər üzrə müfəssəl institusional, kadr və informasiya-kommunikasiya texnologiyaları potensialının artırılması planları daxil olmaqla, 2018-2030-cu illər üzrə Statistikanın İnkişafı üzrə Milli Strategiya Layihəsi”nin həyata keçirilməsi üzrə hazırlıq işlərinin gedişinə dair fikir mübadiləsi aparılıb.
Dövlət Statistika Komitəsinin sədri Tahir Budaqov Azərbaycan Prezidenti İlham Əliyevin rəhbərliyi ilə ölkəmizdə dayanıqlı sosial-iqtisadi inkişafın təmin edildiyini, iqtisadiyyatın şaxələndirilməsi istiqamətində ciddi addımlar atıldığını diqqətə çatdırıb. Son illər ərzində Azərbaycanda bir çox sahələrdə, xüsusilə qeyri-neft sektorunda əldə olunan uğurlar, Azərbaycan statistika sisteminin daha da təkmilləşdirilməsi sahəsində qazanılmış nailiyyətlər və həyata keçirilən layihələr barədə qonaqlara ətraflı məlumat verib. Dövlət Statistika Komitəsinin BMT-nin müvafiq qurumları, o cümlədən Dünya Bankı ilə milli statistika sisteminin inkişafı sahəsində fəal əməkdaşlıq etdiyini vurğulayıb.
Dünya Bankının iqtisadçısı, tapşırıq qrupunun rəhbəri Moritz Meyer və digərləri Azərbaycan Respublikasının statistika sisteminin daha da təkmilləşdirilməsi istiqamətində aparılan işlərin təqdirəlayiq olduğunu vurğulayıblar. Qeyd ediblər ki, Azərbaycan Respublikası Dövlət Statistika Komitəsi və Dünya Bankı tərəfindən həyata keçiriləcək “Azərbaycan Respublikası: 2018-2022-ci illər üzrə müfəssəl institusional, kadr və informasiya-kommunikasiya texnologiyaları potensialının artırılması planları daxil olmaqla, 2018-2030-cu illər üzrə Statistikanın İnkişafı üzrə Milli Strategiya Layihəsi” milli statistika sisteminin inkişafına təkan verəcək.
Görüşdə Dövlət Statistika Komitəsi ilə Dünya Bankı arasında statistika sahəsində ikitərəfli əməkdaşlıq əlaqələrinin inkişafına dair fikir mübadiləsi aparılıb.

Paylaş:

Baxılıb: 898 dəfə