“ASAN İmza” sertifikatlarının onlayn əldə edilməsi və yenilənməsi ilə bağlı yeni elektron xidmət istifadəyə verilib

Bakı:

26 °C

57 %

9 m/s

AZ RU EN

Ana səhifə / İqtisadiyyat / “ASAN İmza” sertifikatlarının onlayn əldə edilməsi və yenilənməsi ilə bağlı yeni elektron xidmət istifadəyə verilib

“ASAN İmza” sertifikatlarının onlayn əldə edilməsi və yenilənməsi ilə bağlı yeni elektron xidmət istifadəyə verilib

16.11.2020 [20:38]

Dövlət Vergi Xidməti yeni elektron xidmət istifadəyə verib.

Xidmətdən AZƏRTAC-a bildirilib ki, bu, qüvvədə olan “ASAN imza” sertifikatlarının onlayn yenilənməsi və “Şəxsi” tipli “ASAN imza” sertifikatı əsasında “İş (Biznes)” və “Dövlət və bələdiyyə” tipli “ASAN imza” sertifikatlarının onlayn əldə olunması xidmətidir.

Vergi xidmətlərinin böyük əksəriyyətinin elektronlaşdırılmasına baxmayaraq, sahibkarların geniş istifadə etdiyi “ASAN imza”ların əldə edilməsi və yenilənməsi prosesi məsafədən xidmətlər sisteminə daxil edilməmişdi. “ASAN imza” sertifikatının vaxtı başa çatmaqda olan sahibkarlar vergi xidmətləri və ya “ASAN xidmət” mərkəzlərinə gəlməli, növbələrdə gözləməli və bir çox prosedurları yazılı şəkildə həyata keçirməli olurdular. Bu məsələ koronavirus pandemiyası ilə mübarizənin gücləndiyi və insanlar arasında təmasların minimallaşdırılmağa göstərilən səylər çərçivəsində son bir neçə ayda daha kəskin şəkildə ortaya çıxmışdı.

Azərbaycan Respublikası Nazirlər Kabinetinin 2019-cu il 4 sentyabr tarixli Qərarı ilə “Sertifikat xidmətlərinin göstərilməsi, sertifikatın verilməsi və reyestrin aparılması Qaydaları”nda dəyişiklilər edilərək Asan Sertifikat Xidmətləri Mərkəzinə (ASXM) müraciət etmiş şəxslə Mərkəz arasında bağlanılan müqavilənin yazılı formada tərtib edilməsi və sertifikatların kağız daşıyıcıda çap edilərək təqdim edilməsi ilə bağlı tələblər aradan qaldırılıb, imza sahibi tərəfindən sertifikatın qüvvədə olma müddəti ərzində yeni sertifikatın alınması üçün Mərkəzə elektron qaydada müraciət etmək imkanının edilməsi üçün hüquqi əsas yaradılıb.

Vergi orqanları və vergiödəyiciləri tərəfindən sərf olunan vaxt, insan və maliyyə resurslarının dəfələrlə azaldılmasına nail olmaq, ASXM-lərinin fəaliyyətinin yeni qaydaların tələblərinə uyğun təşkil etmək və ölkədə COVID-19 təhlükəsinin qarşısını almaq məqsədilə İnternet Vergi İdarəsində proqram təminatında dəyişikliklərin edilməsi, bununla da qüvvədə olan “ASAN imza” sertifikatlarının onlayn yenilənməsi və “Şəxsi” tipli “ASAN imza” sertifikatı əsasında “İş” (Biznes) və “Dövlət və bələdiyyə” tipli “ASAN imza” sertifikatlarının onlayn əldə olunması istiqamətində işlərə başlanıb.

Aparılan işlər qüvvədə olan “Şəxsi” yaxud “İş” (Biznes) və ya “Dövlət və bələdiyyə” tipli “ASAN imza” sertifikatlarının qüvvədə olma müddəti bitməmiş onların müddətinin uzadılmasını onlayn formada həyata keçirmək, həmçinin “Şəxsi” tipli “ASAN imza” sertifikatı əsasında “İş” (Biznes) və “Dövlət və bələdiyyə” tipli “ASAN imza” sertifikatlarının onlayn əldə olunması üçün müvafiq imkanının yaradılması ilə bağlı idi.

2020-ci ilin oktyabrında bu işlər başa çatdırılıb, “Elektron imza üçün sertifikat xidmətlərinin göstərilməsi üzrə İstifadəçi Təlimatı”na əlavə və dəyişikliklər edilib, o cümlədən mobil operatordan əldə edilmiş “Asan İmza” mobil xidmətinə qoşulma formasının ASXM-ə təqdim edilməsi tələbi aradan qaldırılıb.

Artıq sözügedən elektron xidmət istifadəyə verilib. İstifadəçilər sertifikatın qüvvədə olma müddəti ərzində yeni sertifikatın alınması və “Şəxsi” tipli “ASAN imza” sertifikatı əsasında “İş” (Biznes) və “Dövlət və bələdiyyə” tipli “ASAN imza” sertifikatlarının onlayn əldə olunması üçün ASXM-ə elektron qaydada müraciət edə bilərlər. Vergiödəyiciləri qüvvədə olan “Asan İmza” sertifikatlarının onlayn yenilənməsi prosedurları ilə Dövlət Vergi Xidmətinin rəsmi saytında tanış ola bilərlər. “Qüvvədə olan “ASAN imza” sertifikatlarının onlayn yenilənməsi üzrə İstifadəçi Təlimatı” və “Şəxsi” tipli “ASAN imza” sertifikatı əsasında “İş (Biznes)” və “Dövlət və bələdiyyə” tipli “ASAN imza” sertifikatlarının onlayn əldə olunması üzrə İstifadəçi təlimatı” rəsmi internet səhifəyə yerləşdirilib.

Paylaş:

Baxılıb: 908 dəfə