Nəqliyyat sektorunda uğurlu əməkdaşlıq

Bakı:

14°C

82%

5m/s

Əlaqə

AZ RU EN

Ana səhifə / İqtisadiyyat / Nəqliyyat sektorunda uğurlu əməkdaşlıq

Nəqliyyat sektorunda uğurlu əməkdaşlıq

25.08.2022 [07:25]

Nicat PAŞA

Azərbaycan-Türkiyə-Gürcüstan arasında nəqliyyat sektorunda sıx əməkdaşlıq formalaşıb. Bu xüsusda Azərbaycanın moderatorluğu ilə icrasına başlanılan Bakı-Tbilisi-Qars dəmir yolunun 2017-ci ildə istifadəyə verilməsi qarşılıqlı əməkdaşlığın yeni, daha aktiv mərhələyə keçməsində böyük önəm kəsb edir.

Xatırladaq ki, Bakı-Tbilisi-Qars dəmir yolunun tikintisi ilə bağlı anlaşma Gürcüstanda imzalanıb. Türkiyədə təməlqoyma mərasiminin keçirildiyi yolun açılış mərasimi isə 2017-ci ilin oktyabr ayının 30-da Azərbaycanda baş tutub.

Bu yolun uzunluğu təxminən 850 kilometrdir, onun 504 kilometri isə Azərbaycan ərazisindən keçir. Bakı-Tbilisi-Qars dəmir yolu Avropanı Asiya ilə birləşdirən ən qısa və etibarlı yoldur. Bu yol vasitəsilə birinci mərhələdə 5 milyon ton, ondan sonrakı mərhələdə 17 milyon ton, ondan sonra isə daha böyük həcmdə yüklərin daşınması nəzərdə tutulur. Biznesin inkişafı, qarşılıqlı faydalı əməkdaşlıq üçün Bakı-Tbilisi-Qars dəmir yolunun çox böyük əhəmiyyəti var.

Rəsmi statistik göstəricilərə əsasən 2021-ci ilin noyabrın 19-dək BTQ xətti ilə ümumilikdə 262 qatar, 26 min 214 konteynerlə 1 milyon 419 min 686 ton yük daşınıb. 2020-ci ildə pandemiya dövründə məlum səbəblərdən azalan daşımalar 2021-ci ildən etibarən yenidən artmağa başlayıb. Belə ki, 2020-ci ilin birinci rübündə Bakı-Tbilisi-Qars dəmir yolu ilə cəmi 78 min ton yük daşındığı halda, ötən ilin eyni dövründə BTQ xətti ilə daşınan yüklərin çəkisi 154 min 836 tona çatıb. Bu isə onu deməyə əsas verir ki, BTQ xətti ilə daşınmaların ümumi həcmi günbəgün artır.

Bugünkü geosiyasi reallıqlar fonunda Azərbaycan, Türkiyə və Gürcüstanın nəqliyyat sektorundakı önəmi daha da artıb. Rusiya ilə Ukrayna arasında gedən müharibə səbəbindən hazırda yüklərin Rusiya ərazisindən daşınması təhlükəsizlik nöqteyi-nəzərindən arzuolunan deyil. Buna görə də Avrasiyada ölkələrlə daşıma şirkətləri yükləri əsasən Azərbaycan, Gürcüstan və Türkiyə üzərindən daşımağa üstünlük verirlər. Hər üç ölkənin siyasi rəhbərliyi nəqliyyat sektorunun dayanıqlı inkişafına yüksək siyasi iradə göstərirlər. Müşahidələr onu deməyə əsas verir ki, son vaxtlar artan yük axınının müqabilində Azərbaycan və Gürcüstanın müvafiq infra??rukturları artıq yük həcmlərini qəbul etməkdə çətinlik çəkirlər. Bu səbəbdən də mövcud infrastrukturun genişləndirilməsi zərurəti ortaya çıxır. Prezident İlham Əliyevin göstərişi əsasında Azərbaycan bu istiqamətdə işlərin həyata keçirilməsinə, infrastrukturun genişləndirilməsi işlərinə artıq başlayıb.

İki gün öncə isə Tbilisi şəhərində Azərbaycan, Türkiyə və Gürcüstanın nəqliyyat sahəsi üzrə məsul nazirlərinin üçtərəfli görüşü keçirilib.

Rəqəmsal İnkişaf və Nəqliyyat Nazirliyindən verilən məlumata görə, görüş çərçivəsində Orta Dəhlizin potensialından geniş istifadə olunması və bu dəhlizin bir hissəsi kimi Bakı-Tbilisi-Qars dəmir yolunun ötürmə qabiliyyətinin artırılması, tranzit yükdaşımaları ilə bağlı vahid tarif siyasətinin formalaşdırılması məsələləri müzakirə olunub. Tranzit yük axınlarının sabit artımını təmin etmək üçün müştərək əməliyyatların sinxronlaşdırılmasının vacibliyi vurğulanıb.

Tərəflər Orta Dəhlizə marağın artdığını qeyd ediblər. Belə ki, 2022-ci ilin yanvar-iyun aylarında dəhlizlə ötən ilin müvafiq dövrü ilə müqayisədə 15 faiz çox yük daşınıb. Qeyd olunub ki, Şimal-Qərb dəhlizinə tələbat ötən ilin müvafiq dövrü ilə müqayisədə təxminən üç dəfə artıb.

Görüşdə vurğulanıb ki, Azərbaycan, Türkiyə və Gürcüstan Orta Dəhlizdə həyati əhəmiyyət kəsb edən Bakı-Tbilisi-Qars dəmir yolu xəttinin ötürmə qabiliyyətinin artırılması istiqamətində səyləri gücləndirib. Birgə səylərin və səmərəli əməkdaşlığın nəqliyyat sahəsində qarşıya çıxan çətinlikləri aradan qaldıracağına əminlik ifadə olunub.

Nazir Rəşad Nəbiyev Gürcüstana səfəri zamanı Baş nazirin müavini, iqtisadiyyat və davamlı inkişaf naziri Levan Davitaşvili ilə də ikitərəfli görüş keçirib.

Görüş çərçivəsində Poti və Batumi limanları ilə Ələt limanı arasında blok qatarın yaradılması, qrafiklərin uyğunlaşdırılması, vahid tariflərin müəyyən olunması müzakirə olunub və bu istiqamətdə müvafiq işlərin görüləcəyi razılaşdırılıb.

Görülən işlər onu deməyə əsas verir ki, yaxın gələcəkdə nəqliyyat sektorunda üçtərəfli əməkdaşlıq çərçivəsində daha da böyük uğurlar əldə olunacaq. Bununla da ölkələrimizin geosiyasi əhəmiyyəti artacaq və bizim üçün əlavə imkanlar yaradacaq.

Paylaş:

Baxılıb: 567 dəfə