Kölgə iqtisadiyyatına qarşı mübarizədə

Bakı:

17°C

82%

4m/s

Əlaqə

AZ RU EN

Ana səhifə / İqtisadiyyat / Kölgə iqtisadiyyatına qarşı mübarizədə

Kölgə iqtisadiyyatına qarşı mübarizədə

08.12.2022 [10:34]

Yeni mərhələ başlayır

“Kölgə iqtisadiyyatı”nın mövcudluğu sağlam rəqabətə mane olur və bir sıra mənfi təzahürlərə yol açır. Ölkəmizdə gizli iqtisadiyyata qarşı mübarizə siyasəti ardıcıl və sistemli səciyyə daşıyır.

Azərbaycan Respublikası Cinayət Məcəlləsinə dəyişikliklər edilməsi haqqında 6 dekabr 2022-ci ildə qüvvəyə minən Qanunla Məcəlləyə “Qanunsuz pul köçürmələrinə görə” cinayət məsuliyyəti nəzərdə tutan 206-1-ci maddə əlavə edilib. Prezident İlham Əliyevin həmin tarixli Fərmanı ilə belə cinayət əməllərinə görə cinayət işləri üzrə istintaqın Azərbaycan Respublikası İqtisadiyyat Nazirliyi və Dövlət Təhlükəsizliyi Xidməti tərəfindən aparılacağı müəyyən edilib.

Azərbaycanın hədəfi

“Kölgə iqtisadiyyatı”na qarşı mübarizə Azərbaycanın əsas hədəfləri sırasında yer alır. Respublikamızda Prezident İlham Əliyevin imzaladığı Fərman və Sərəncamlar əsasında reallaşdırılan islahatların bir çoxu məhz milli iqtisadiyyatımızda sağlam rəqabət mühitinin formalaşmasını, neqativ halların aradan qaldırılmasını, eyni zamanda sərt cəza tədbirlərinin görülməsini özündə ehtiva edir. Bir qədər bundan əvvəl “Azərbaycan Respublikasının 2022-2026-cı illərdə sosial-iqtisadi inkişaf Strategiyası” sənədi qəbul olundu. Gizli iqtisadiyyata qarşı mübarizə sözügedən strategiyanın əsas istiqamətlərindən biri kimi müəyyən edilib.

Ölkəmizdə aparılan institusional islahatlar “kölgə iqtisadiyyatı”nın əhatə dairəsinin daraldılmasında mühüm rol oynayır. Respublikamızda Açıq Hökumət portalı yaradılıb və ayrı-ayrı qurumlar ora inteqrasiya edilib. Eyni zamanda, iqtisadiyyatın idarə olunmasında informasiya-kommunikasiya texnologiyalarının tətbiqinə geniş meydan verilir. İdarəetmədə insan amili məhdudlaşdırılır, ödəmələr elektron vasitələr üzərindən həyata keçirilir. Bütün bunlar isə “kölgə iqtisadiyyatı”na effektiv zərbə vurur. Aparılan islahat tədbirlərinin nəticəsidir ki, son dövrlərdə respublikamızda 200 mindən çox yeni əmək müqaviləsinin bağlanması “kölgə iqtisadiyyatı”nın ümumdaxili məhsuldakı payının əhəmiyyətli dərəcədə azalmasına imkan verib. Əmək münasibətlərinin leqallaşdırılması ölkədə həyata keçirilən iqtisadi siyasətin ümumi hədəflərinə uyğundur. İqtisadiyyatın “ağardılmasının” nəticəsidir ki, müvafiq qurumların xətti ilə dövlət büdcəsinə proqnozlardan əlavə vəsaitlər daxil olur və həmin vəsaitlər Prezident İlham Əliyevin tapşırığı əsasında sosial sferaya, insanların rifah halının yaxşılaşdırılmasına yönəldilir. Bütövlükdə, kölgə iqtisadiyyatına qarşı mübarizədə Azərbaycan dövlətinin mövqeyi birmənalıdır - bu bəlaya qarşı mübarizə heç vaxt səngiməməlidir. “Kölgə iqtisadiyyatı, əlbəttə, hər ölkədə var, əsas məsələ onun həcmidir, dövlətin, hökumətin buna münasibətidir. Dövlətin və hökumətin buna münasibəti belədir ki, bu, Azərbaycanda olmamalıdır”, - deyə Prezident İlham Əliyev vurğulayıb.

DTX və İqtisadiyyat Nazirliyinə yeni səlahiyyətlər verildi

Yuxarıda bəhs olunan dəyişikliyə əsasən, Azərbaycan “kölgə iqtisadiyyatı”na qarşı sərt yol seçib. Bu sahədə DTX və İqtisadiyyat Nazirliyinə yeni səlahiyyətlər verilib. Təhlillər apardıqda aydın olur ki, “kölgə iqtisadiyyatı” bir sıra hallarda milli çərçivələrdən çıxaraq beynəlxalq şəbəkə halında formalaşır. Beynəlxalq hüquqla dövlətlərin sərhədlərinin tanındığı bir dövrdə dövlətlərarası mübarizə xeyli dərəcədə “kəşfiyyat-pozuculuq səngərləri”ndə baş verir.

Ötən müddət ərzində Dövlət Təhlükəsizliyi Xidməti tərəfindən həyata keçirilən genişmiqyaslı tədbirlər nəticəsində qonşu dövlətlərin xeyrinə casusluq edən şəxslər və onların əməlləri, xarici havadarların himayəsində fəaliyyət göstərən təşkilatlar barədə məlumatlar tez-tez gündəm olub. Bəs qeyd olunan Azərbaycan vətəndaşları və ayrı-ayrı təşkilatlar xaricdən necə maliyyələşdirilir? Hazırda xaricdən pul vəsaitlərinin dövlət nəzarətindən gizli əldə edilməsinin xeyli dərəcədə qanunsuz pul köçürmələri yolu ilə təşkil edildiyi məlumdur. “Kölgə iqtisadiyyatı”nın mövcudluğu şəraitində xarici xüsusi xidmət orqanları üçün belə şəxslərə pul çatdırılması xeyli asanlaşır. Təsadüfi deyil ki, ayrı-ayrı ölkələrdə “kölgə iqtisadiyyatı”na, eyni zamanda iqtisadi və milli təhlükəsizliyə təhdid olan mexanizmlərə qarşı sərt mübarizə metodları vardır.

Ötən illərdə bir çox ölkələrdə terrorçu birləşmələrin, kriminal təbiətli siyasi radikal dairələrin, dini ekstremistlərin və casusların məhz heç yerdə dövlət qeydiyyatı və nəzarəti olmayan “həvalə” adı ilə tanınan və digər analoji pul çatdırma şəbəkələrinin imkanlarından istifadə edilərək maliyyələşdirilməsi müəyyən edilib. Müxtəlif səs-küylü işlər aparılıb. Vurğulanan məsələlərlə bağlı bir çox dövlətlər daxili və ölkələrarası hüquqi mübarizə mexanizmləri yaradıb.

Heç kimə sirr deyil ki, korrupsiya cinayət əməllərinə qurşanmış şəxslər də qanunsuz pul köçürmələri üsullarından istifadə edərək cinayət yolu ilə əldə etdikləri külli miqdarda vəsaitləri ölkədən çıxarmışlar. Qanuna edilən dəyişiklik bu kimi neqativlərin qarşısının alınmasına hesablanıb. Azərbaycanda qeyd olunan istiqamətdə, o cümlədən, ümumilikdə, “kölgə iqtisadiyyatı”nın bütün zərərli təzahürlərinə qarşı xüsusi islahatlar, sərt mübarizə tədbirləri həyata keçiriləcək.

MÜBARİZ

Paylaş:

Baxılıb: 607 dəfə