Köhnə tikili mənzillərin qiyməti niyə bahalaşır?

Bakı:

28 °C

44 %

3 m/s

Əlaqə

AZ RU EN

Ana səhifə / İqtisadiyyat / Köhnə tikili mənzillərin qiyməti niyə bahalaşır?

Köhnə tikili mənzillərin qiyməti niyə bahalaşır?

16.05.2023 [10:41]

Nicat Dilqəmli

Son vaxtlar paytaxtın mənzil bazarında əhəmiyyətli dərəcədə artım müşahidə edilməkdədir. Bu barədə geniş araşdırmanı özündə əks etdirən məqaləni ötən buraxılışlarımızda oxucularımızın ixtiyarına təqdim etmişdik. Son bir neçə ay ərzində mənzil bazarında baş verən növbəti dəyişiklik isə köhnə tikili mənzillərin qiymətinin artmasıdır. Başqa sözlə, müşahidələr onu deməyə əsas verir ki, bəzi vətəndaşlar yeni tikililərdənsə, köhnə tikililərə daha çox üstünlük verirlər.

Bir neçə gündür ictimaiyyətdə geniş müzakirələrə səbəb olan bu qiymət dəyişikliyi barədə müxtəlif versiyalar səsləndirilir. Əsas səbəb kimi köhnə binaların yaxın zamanda sökülməsi göstərilir. Belə olan halda, həmin binadan ev alanlar təbii ki, onun yerində tikiləcək hündürmərtəbəli yeni tikili binadan kompensasiya olaraq mənzillə təmin olunurlar. Qaydaya əsasən, yeni binadan mənzil əvvəlkinin kvadratmetrinə uyğun olaraq verilir. Bu isə geniş, müasir mənzilə sahib olmaqla bərabər həm də on minlərlə manat əlavə gəlir deməkdir.

Bir neçə gün bundan öncə Bakı Şəhər İcra Hakimiyyətinin başçısı Eldar Əzizovun köhnə tikili binaların söküntü işləri ilə bağlı mətbuata açıqlama verməsi bu məsələni bir qədər də aktuallaşdırıb. Bakı meri paytaxtda köhnə binaların sayının 3 mindən çox olduğunu qeyd edərək bildirib ki, bu məsələ gündəmdədir: “Hazırda bununla bağlı işlər aparılır”.

Paytaxtın mənzil bazarındakı bahalaşmaya səbəb olan amillər barədə “Yeni Azərbaycan” qəzetinə danışan əmlak məsələləri üzrə mütəxəssis Ramil Qasımzadə köhnə mənzillərin qiymətində artımın olduğunu təsdiqləyib. Ekspertin sözlərinə görə, bu bahalaşma keçən ilin avqust ayından başlayıb: “Qiymət artımı bu günə qədər davam edir. Bu ilin 5 ayında isə qiymətlərdə təxminən 15-20 faizə qədər artım var. Ümumilikdə isə, ilin əvvəli ilə müqayisə edilərsə, təxminən 10 faizə qədər artım olduğunu görə bilərik”.

R.Qasımzadə qeyd edib ki, əsas səbəblərdən biri köhnə tikili binaların sökülməsidir. Yeni tikili binaların qiymətinin də bir xeyli bahalaşdığını diqqətə çatdıran əmlak eksperti qiymət artımına səbəb olan digər amillər barədə də danışıb: “Digər məqam ondan ibarətdir ki, köhnə tikili binalarda sahə azdır və bir qədər ucuzdur. Ucuz mənzillər tədricən sıradan çıxmaq üzrədir. Məsələn, 2022-ci illə müqayisə aparsaq, Nərimanov metrosu tərəfdə olan evlərin qiyməti 70 min manatdan 100 min manata qədər yüksəlib. Bu, bir otaqlı mənzillərə aiddir. İki otaqlı evlər isə əgər əvvəllər 80-85 min manat aralığında idisə, indi bu rəqəm 120 min manat və daha çoxdur”.

Məhz köhnə tikililərdə qiymətin artmasını isə ekspert belə izah edib: “Çünki yeni tikili binaların əksəriyyətinin sahəsi artıqdır. Bahalaşma həmin tikililərin də qiymətinə təsir edir. Ən başlıca səbəblərdən biri həm də torpaq bazarındakı qiymət artımıdır. Bu gün artıq, demək olar ki, yeni tikili binaların inşası üçün Bakıda torpaq tapmaq çox çətin məsələdir. Bina tikmək üçün torpaq axtaran çox sayda investorlar var. Amma tapmaq mümkün deyil. Digər tərəfdən, insanların gəlirlərinin artması, xidmət sahələrində qiymətlərin bahalaşması kimi bir sıra digər amillər də qiymət artımına səbəb kimi göstərilə bilər”.

R.Qasımzadə hesab edir ki, bahalaşma davam edəcək: “Qiymət artımının qarşısını almağın yeganə səbəbi qlobal böhran və ya müharibə ola bilər”.

Paylaş:

Baxılıb: 724 dəfə