Milli maraqlarımızın qorunması üçün...

Bakı:

12°C

87%

0m/s

Əlaqə

AZ RU EN

Ana səhifə / MEDİA / Milli maraqlarımızın qorunması üçün...

Milli maraqlarımızın qorunması üçün...

03.10.2024 [11:42]

Vətəndaş cəmiyyəti institutları nə etməlidir?

Dövlət iradəsini xalqdan alır. İstənilən bir ölkənin hərtərəfli inkişafı üçün əsas məqamlardan biri həm ictimai, həm də dövlət maraqlarının xalq tərəfindən müdafiə olunmasıdır. Çünki hər bir dövlət xalqın iradəsinə söykənərək onun milli maraqları üçün çalışır və buna uyğun siyasət həyata keçirir.

Azərbaycan bu sahədə uğurlu addımlar atıb. Müxtəlif zamanlarda ictimai maraqların dövlət maraqları ilə üst-üstə düşməsinin şahidi olmuşuq. Xalqımız hər zaman əl-ələ verərək bir yumruq halında birləşib, əzmlə mübarizə aparıb. Bütün bunların sayəsində müxtəlif, bir o qədər də böyük və şanlı qələbələrə imza atmışıq.

Mövzunu “Yeni Azərbaycan”a şərh edən politoloq İlyas Hüseynovun sözlərinə görə, ictimai və dövlət maraqlarının müdafiəsi cəmiyyətin əsas meyarı olmalıdır. Ekspert bunu hər bir vətəndaşın qarşısında duran mühüm vəzifələrdən biri adlandırıb: “Yəni hər bir vətəndaş kimliyindən asılı olmayaraq, dövlətin, ictimaiyyətin maraqlarına xidmət etməyə borcludur. Vətəndaşın ilk məqsədi dövlətin və dövlətçiliyin möhkəmlənməsinə çalışmaq olmalıdır. Bu gün dünyada baş verən siyasi-iqtisadi proseslər, geosiyasi dəyişikliklər, qloballaşma kimi amillər dövlət və ictimai maraqların mahiyyəti və təmin olunması ilə bağlı ortaya real çağırışlar qoyur. Dövlət və ictimai maraqlar arasında qarşılıqlı münasibət və ya bunların hansının daha üstün olması ilə bağlı fərqli siyasi düşüncələr, yanaşmalar var”.

“Canlı orqanizm” halında çalışmalıyıq...

İ.Hüseynovun sözlərinə görə, dövlət o vaxt dərin və sürətli inkişafla irəliləyir ki, burada xalqın dövlət maraqları ilə ictimai maraqları üst - üstə düşür: “Dövlətin milli maraqlarına söykənən siyasəti həm diplomatik meydanda, həm də hərb meydanında öz uğurlu nəticəsini verdi. Hər bir vətəndaş Vətən müharibəsi zamanı bir əsgər idi. Yaşından, cinsindən, irqindən asılı olmayaraq, özünü azərbaycanlı sayan hər kəs bir əsgərə dönərək, Vətənin qorunması üçün əlindən gələni etdi və bu gün dünyanın ən qürurlu xalqlarından birinə çevrildik. Təbii olaraq vətəndaşın mənafeyinin müdafiə olunması, onun maraqları üçün çalışmaq dövlətin bir nömrəli vəzifələrindən biridir. Bu mənada Azərbaycan hazırda sosial dövlət kimi bu siyasəti də uğurla aparmaqdadır.

Təbii ki, problemlər də var. Lakin bu problemlərin həll edilməsi üçün dövlətlə bərabər vətəndaş cəmiyyəti, qeyri-hökumət təşkilatları, ictimai və digər icmalar, bələdiyyələr fəal şəkildə çalışmalı və dövlət maraqlarının müdafiəsi üçün vacib layihələri də icra etməlidirlər. Bu mənada siyasi birliyin vəhdətində çox böyük uğurlar qazandıq. Vətən müharibəsindən keçən bu dövr ərzində hətta siyasi partiyalar da vacib anlarda dövlətin maraqları çərçivəsində birləşdilər və öz siyasətlərini yalnız dövlətin uğuru üçün ortaya qoydular. Eyni anda qeyri-hökümət təşkilatları və vətəndaş cəmiyyəti də öz töhfələrini bu inkişafa vermiş oldular”.

Vətəndaş cəmiyyəti institutlarının üzərinə böyük iş düşür

İ.Hüseynov vurğulayıb ki, ictimai maraqlarımızın qorunmasında QHT-lərin və vətəndaş cəmiyyəti institutlarının üzərinə də böyük iş düşür: “İctimai maraq dedikdə cəmiyyəti narahat edən aktual məsələlərin həlli, əhalinin haqq və hüquqları, o cümlədən sosial, iqtisadi hüquqlar, xüsusən isə insan hüquq və azadlıqlarının, ətraf-mühitin qorunması kimi başa düşürük. Bu zaman vətəndaş cəmiyyəti institutları aktual hesab edilən məsələlərin qorunmasında tarazlığı bərpa edə bilər”.

İnkişaf yolunda birlikdə irəliləməliyik!

Politoloq qeyd edib ki, bu gün hər bir Azərbaycan vətəndaşı fəxr edir ki, o, qürurlu, müzəffər, şanlı ordusu olan, iqtisadiyyatı inkişaf etmiş dövlətin vətəndaşıdır: “Bu baxımdan ölkəmizin gələcəkdə də hərtərəfli inkişafında hər birimizin üzərinə düşən vəzifələr aydındır. Hər zaman olduğu kimi biz bir xalq olaraq bu gündən sonra da bütün problemləri birlikdə həll etməli və birlikdə inkişaf yolunda düzgün irəliləməliyik.”

Y.SAHİB

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “İctimai və dövlət maraqlarının müdafiəsi” istiqaməti üzrə hazırlanmışdır.

Paylaş:

Baxılıb: 357 dəfə