Dəmir yumruq ətrafında birləşənlər...

Bakı:

20°C

68%

6m/s

Əlaqə

AZ RU EN

Ana səhifə / MEDİA / Dəmir yumruq ətrafında birləşənlər...

Dəmir yumruq ətrafında birləşənlər...

26.12.2023 [11:20]

Azərbaycançılıq ideologiyasının təntənəsi

Günel ABBASOVA

Ölkəmizdə yaşayan bütün xalqların nümayəndələri azərbaycançılıq ideologiyası ətrafında birləşməklə, Vətən müharibəsində iştirak etməklə Azərbaycanın böyük zəfərinin əldə edilməsinə töhfə verib. Heç şübhəsiz bu tarixi zəfər Azərbaycandakı bütün xalqların həmrəyliyi nəticəsində əldə edilib.

Prezident İlham Əliyev çıxışlarının birində bu məqama toxunaraq deyir: “Vətən müharibəsində Azərbaycanda yaşayan bütün xalqların böyük payı vardır. Vətən müharibəsi bir daha onu göstərdi ki, Azərbaycanda bütün xalqlar dostluq, qardaşlıq, həmrəylik şəraitində yaşayır və bu 44 günlük müharibə bir daha onu göstərdi ki, ölkəmizdə milli birlik, milli həmrəylik vardır”.

Dövlət başçısının da qeyd etdiyi kimi, Vətən müharibəsindəki tarixi zəfər Azərbaycandakı xalqların birliyinin, tarixi dostluq və qardaşlığının məntiqi nəticəsi idi və bu azərbaycançılıq ideologiyasının nəcibliyindən, aliliyindən xəbər verirdi.

Milli Məclisin üzvü Tahir Rzayev “Yeni Azərbaycan”a açıqlamasında bildirib ki, 44 günlük müharibənin ilk günündən etibarən Azərbaycan xalqının birliyini pozmağa, həm arxa, həm də ön cəbhədə çaxnaşma yaratmağa, cəmiyyətimizdə inamsızlıq və etimadsızlıq mühiti formalaşdırmağa çalışan rəsmi İrəvan, bu məqsədlə müxtəlif təxribatlara əl atır, ən çirkin üsul və vasitələrdən istifadə etməyə çalışırdı: “Azərbaycan xalqının birliyini pozmaq, bu yolla onu məğlub etməyə çalışan düşmən müxtəlif media resursları, internet televiziyaları, sosial şəbəkələr vasitəsi ilə həqiqətdən tamamilə uzaq, təxribat xaraketerli məlumatlar yayır, ölkəmizdəki xalqları qarşı-qarşıya qoymağa çalışırdı. Düşmənin təxribat xarakterli məlumatlarından biri guya Azərbaycanda azsaylı xalqlara ögey münasibətin göstərildiyi, dövlətin onların qeydinə qalmaması ilə bağlı idi. Hətta erməni təxribatçıları iddia edirdi ki, guya Azərbaycan Ordusunun hücumçu dəstələri, ön xətdəki hissələri əsasən azsaylı xalqların nümayəndələrindən təşkil olunub və guya hərbi komandanlıq öz məqsədinə onların qanı və canı bahasına nail olmağa çalışır.

Vətən müharibəsi tarixinin qürurverici səhifələrindəndir ki, bu cür erməni təxribatlarına cavab ilk növbədə elə azsaylı xalqların nümayəndələri tərəfindən verilir, onlar erməni məkrini öz açıqlamaları ilə ifşa edirdi. Bəzi hallarda onlar bunu öz əməlləri ilə bəyan edir, bununla da ermənilərin səsləndirdiyi uydurma fikirlərin reallıqla heç bir əlaqəsi olmadığını diqqətə çatdırırdı. Hərbçilərimizin işğaldan azad edilən ərazilərdə küçə və divarlara yazdıqları yazılar, sadə dillə ermənilərə və bütün dünyaya verdiyi mesajlar da bu qəbildən olan addımlar hesab edilə bilər”.

O qeyd edib ki, Azərbaycan vətəndaşı olan müxtəlif xalqların nümayəndələrinin işğaldakı əraziləri öz canları bahasına azad etməklə Azərbaycanı həyatlarından daha çox sevdiklərini, doğma vətənləri uğrunda, Azərbaycan xalqının birliyi, xoşbəxt gələcəyi uğrunda canlarından sevə-sevə keçdiklərini sübut etdilər: “2020-ci ilin 10 noyabr tarixində - Vətən müharibəsinin sonuncu günündə Azərbaycandakı bir çox xalqların nümayəndələri Prezident İlham

Əliyevə müraciət edərək Ali Baş Komandanla həmrəyliklərini dilə gətirmiş, hər zaman olduğu kimi bundan sonra dövlət başçısının səsinə səs verəcəkələrini vurğulamışdılar. Məlum tarixi bəyanatda ölkəmizdə xalqların dostluq və qardaşlığına da toxunulmuş, bu dostluq və qardaşlığın əbədi olduğu qeyd edilmişdi.

44 günlük Vətən müharibəsi dövlətimizin düşmən üzərindəki qələbəsini təmn etməklə yanaşı, azərbaycançılıq ideyasının, bu ideyanın əsas tərkib hissələrindən biri olan multikulturalizm dəyərinin inkişafına da töhfə verdi. Müharibə bir daha sübut etdi ki, ölkəmizdə bütün xalqların səmimi, tarixi və qırılmaz birliyi mövcuddur. Məhz bu birliyin nəticəsidir ki, respublikamızın hakim partiyası olan Yeni Azərbaycan Partiyası tərəfindən Vətən müharibəsində şəhid olan rus və digər millətlərin ailələri ziyarət edilmiş, partiya nümayəndələri bu ziyarətlər əsnasında şəhidlərimizə olan sevgi və ehtiramı bir daha ortaya qoymuşlar”, - o vurğulayıb.

Göründüyü kimi, Vətən müharibəsi ermənilərin iddia etdiyi kimi, nəinki Azərbaycandakı xalqlar birliyini pozdu, əksinə bu qardaşlığı daha da inkişaf etdirdi və yeni zirvəyə qovuşdurdu.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Azərbaycançılıq ideologiyasının təbliği” istiqaməti üzrə hazırlanmışdır

Paylaş:

Baxılıb: 482 dəfə