Kardioloqlar qan təzyiqinin aşağı salınmasına kömək edən dörd meyvəni müəyyən ediblər

Bakı:

29 °C

55 %

14 m/s

Əlaqə

AZ RU EN

Ana səhifə / Maraqlı / Kardioloqlar qan təzyiqinin aşağı salınmasına kömək edən dörd meyvəni müəyyən ediblər

Kardioloqlar qan təzyiqinin aşağı salınmasına kömək edən dörd meyvəni müəyyən ediblər

15.07.2026 [10:39]

Kardioloqlar alma, avokado, qaragilə və portağalı müntəzəm olaraq qida rasionuna daxil etməyi tövsiyə edirlər. Çünki bu meyvələrin tərkibindəki qida maddələri ürək-damar sisteminin sağlamlığını dəstəkləyir və qan təzyiqinə nəzarət etməyə kömək edir.

AZƏRTAC “Eating Well” jurnalına istinadla xəbər verir ki, kardioloq Devid Minn ürək-damar xəstəliklərinin dünya üzrə ölüm səbəbləri arasında əsas yerlərdən birini tutduğunu, lakin düzgün qidalanma və fiziki fəaliyyət də daxil olmaqla sağlam həyat tərzi ilə bu riskin əhəmiyyətli dərəcədə azaldıla biləcəyini bildirib.

Mütəxəssisin sözlərinə görə, alma qida lifi, xüsusilə pektin və antioksidantlarla zəngindir. Bu maddələrin birləşməsi xolesterin səviyyəsinin aşağı salınmasına kömək edir, bağırsaqlarda xolesterinin sorulmasını azaldır və qan damarlarını oksidləşdirici zədələnmədən qoruyur.

Avokado isə aşağı sıxlıqlı lipoproteinlərin (“pis” xolesterin) səviyyəsini azaltmağa və yüksək sıxlıqlı lipoproteinlərin (“yaxşı” xolesterin) səviyyəsini artırmağa kömək edən tək doymamış yağların əsas təbii mənbələrindən biridir. O, həmçinin qan damarlarının genişlənməsinə yardım edərək təzyiqin tənzimlənməsinə və ürək-damar xəstəlikləri riskinin azalmasına təsir göstərə bilər.

Qaragilə yüksək miqdarda antioksidant və qida lifi ehtiva edir. Devid Minnin sözlərinə görə, bu giləmeyvənin müntəzəm istehlakı arterial elastikliyi yaxşılaşdırmağa, qan təzyiqini aşağı salmağa və “yaxşı” xolesterinin səviyyəsini artırmağa kömək edə bilər.

Mütəxəssislər portağalı da faydalı qidalardan biri kimi qeyd edirlər. Tərkibində yüksək miqdarda C vitamini ilə yanaşı, flavanonlar – bitki mənşəli birləşmələr var. Kardioloq Odri T. Damranın sözlərinə görə, bu maddələr qan təzyiqinin aşağı salınmasına, xolesterin səviyyəsinin yaxşılaşdırılmasına, iltihabın azalmasına və qanda şəkərin səviyyəsinin normallaşmasına kömək edə bilər.

Ekspertlər vurğulayırlar ki, ürək-damar xəstəliklərinin qarşısının alınması üçün kompleks yanaşma vacibdir. Buraya yüksək lifli və az doymuş yağlı qidalanma, müntəzəm fiziki fəaliyyət, sağlam bədən çəkisinin qorunması, siqaretdən imtina, spirtli içkilərin məhdudlaşdırılması, eləcə də qan təzyiqi və qanda şəkər səviyyəsinə nəzarət daxildir.

Mütəxəssislər müntəzəm olaraq yaşıl tərəvəzlər, tam taxıllı məhsullar, paxlalılar, balıq, qoz-fındıq, toxumlar və bitki yağları, xüsusilə də zeytun yağı istehlak etməyi tövsiyə edirlər. Eyni zamanda qeyd edirlər ki, heç bir ayrıca məhsul ürək sağlamlığının qorunmasında əsas amil olan sağlam həyat tərzini əvəz edə bilməz.

Paylaş:

Baxılıb: 90 dəfə