Maestro Niyazinin xatirəsi ehtiramla anılıb

Bakı:

32 °C

43 %

5 m/s

Əlaqə

AZ RU EN

Ana səhifə / Mədəniyyət / Maestro Niyazinin xatirəsi ehtiramla anılıb

Maestro Niyazinin xatirəsi ehtiramla anılıb

21.08.2013 [09:28]

Avqustun 20-də dünya şöhrətli dirijor, bəstəkar, ictimai xadim, SSRİ Xalq Artisti, Sosialist Əməyi Qəhrəmanı Niyazi Tağızadə-Hacıbəyovun anadan olmasının 101-ci ildönümü münasibətilə görkəmli sənətkarın xatirəsi anılıb.
AzərTAc xəbər verir ki, əvvəlcə Niyazinin mənzil-muzeyinin əməkdaşları Fəxri xiyabana gələrək maestronun məzarı önünə təzə-tər güllər düzüb, xatirəsinə dərin ehtiramlarını bildiriblər.
Sonra mənzil-muzeydə maestronun anadan olmasının 101-ci ildönümü münasibətilə tədbir keçirilib.
Əvvəlcə Üzeyir Hacıbəyli adına Bakı Musiqi Akademiyasının professoru, Əməkdar İncəsənət Xadimi, pianoçu Ülviyyə Hacıbəyova Niyazinin əsərlərini ifa edib.
Niyazinin mənzil-muzeyinin direktoru Rza Bayramov bildirib ki, Azərbaycan mədəniyyət tarixində dünya musiqi xəzinəsinə daxil olmuş şəxsiyyətlər çoxdur. Belə sənətkarlar sırasında Niyazinin xüsusi yeri var.
Diqqətə çatdırılıb ki, 1912-ci il avqustun 20-də Tbilisidə anadan olmuş maestro Niyazinin doğum günü hər il muzey tərəfindən geniş qeyd edilir.
Bildirilib ki, Niyazi klassik musiqimizin banisi Üzeyir Hacıbəylinin, sözün əsl mənasında, davamçısı olmaqla öz gərgin əməyi və istedadı nəticəsində Hacıbəyovlar nəslinin görkəmli nümayəndəsinə çevrilib. Orijinal fitri istedad, yüksək musiqi mədəniyyəti, möhkəm iradə onun yaradıcılığı üçün səciyyəvidir.
Qeyd olunub ki, Niyazinin mənzil-muzeyinin açılışında Ümummilli lider Heydər Əliyev şəxsən iştirak edərək maestronun həm fitri istedadına, həm musiqi sənətində xüsusi üslubuna, həm də bənzərsiz yaradıcılıq yoluna görə digər bəstəkar və dirijorlardan seçildiyini söyləyib.
Nəzərə çatdırılıb ki, Niyazinin interpretasiyalarında klassik və müasir əsərlər daha dolğun, ifadəli, yüksək tempramentdə səsləndirilib. Onun repertuarında Qərbi Avropa, rus klassiklərinin və müasir xarici bəstəkarların əsərləri xüsusi yer tutub.
Xüsusi vurğulanıb ki, Azərbaycan bəstəkarlarının və peşəkar dirijorluq məktəbinin formalaşması və inkişafında Niyazinin rolu böyük olub. Bundan əlavə, maestro Niyazinin ifaçılar nəslinin yetişməsində və formalaşmasında da xüsusi rol oynayıb. Fidan və Xuraman Qasımova bacıları, Lütfiyar İmanov, Firəngiz Əhmədova və başqa ifaçıları opera sənətinə məhz Niyazi gətirib və onlara dünya şöhrəti qazandırıb.
Niyazi “Rast” simfonik muğamının, “Xosrov və Şirin” operasının və “Çitra” baletinin, simfonik əsərlərin, kamera instrumental musiqilərinin, romansların müəllifidir.
Dünya şöhrətli musiqiçi onlarla xarici ölkədə qastrol səfərlərində olub, Azərbaycan musiqisini yüksək səviyyədə təmsil edib.
Mənzil-muzeyin şöbə müdiri Xanım Abdinova Niyazinin filmlərə bəstələdiyi musiqilər haqqında məlumat verib. Bildirib ki, sənətkar simfonik orkestr və fortepiano üçün əsərlər yazmaqla yanaşı, filmlərə, teatr tamaşalarına da musiqi bəstələyib. O, ilk olaraq “Almaz” filminə musiqi yazıb. Sonralar “Kəndlilər”, “Yeni horizont”, “Fətəli xan” və s. filmlərə musiqi bəstələyib. Niyazi bədii filmlərlə yanaşı, “Ordenli Azərbaycan”, “Arazın o tayından”, “Türk qadının baharı”, “Doğma xalqıma” kimi sənədli filmlərə də musiqi yazıb. Həmçinin bir çox sənədli və bədii filmlərin dirijorluq işi və musiqi tərtibatı Niyaziyə məxsusdur. Onun kino sahəsində sonuncu işi “Üzeyir ömrü” filmi olub.
Tədbir çərçivəsində musiqisini dahi Niyazinin yazdığı “Kəndlilər” filmi nümayiş etdirilib.
Avqustun 20-də, həmçinin Niyazinin doğum günü münasibətilə görkəmli sənətkarın mənzil-muzeyində “Açıq qapı” günü elan edilib.