Xocalı soyqırımı qurbanlarının xatirəsi mədəniyyət ocaqlarında da anılacaq

Bakı:

12°C

87%

2m/s

Əlaqə

AZ RU EN

Ana səhifə / Mədəniyyət / Xocalı soyqırımı qurbanlarının xatirəsi mədəniyyət ocaqlarında da anılacaq

Xocalı soyqırımı qurbanlarının xatirəsi mədəniyyət ocaqlarında da anılacaq

20.02.2020 [09:08]

Soyqırımının iyirmi səkkizinci ildönümü ilə əlaqədar sərgi-tədbirlərin keçirilməsi, o cümlədən bədii və sənədli filmlərin nümayiş etdirilməsi planlaşdırılır
Xəbər verdiyimiz kimi, bu yaxınlarda Azərbaycan Respublikası Prezidentinin Administrasiyasının rəhbəri Samir Nuriyevin Sərəncamı ilə “Xocalı soyqırımının iyirmi səkkizinci ildönümünün keçirilməsinə dair tədbirlər planı” təsdiq edilib.
Tədbirlər planında Bakının Xətai rayonunda, Goranboy rayon mərkəzində və Ağcakənd qəsəbəsində Xocalı soyqırımı qurbanlarının xatirəsinə ucaldılmış abidələrin önünə əklil qoyulması mərasimlərinin keçirilməsi, ictimaiyyət nümayəndələri tərəfindən şəhər və rayonlarda Şəhidlər xiyabanının ziyarət edilməsi, Azərbaycanın xarici ölkələrdəki səfirliklərində, konsulluqlarında və diaspor təşkilatlarında soyqırımı ilə bağlı tədbirlərin, anım mərasimlərinin təşkili, xarici və yerli kütləvi informasiya vasitələri, o cümlədən teleradio kanallarında qanlı qırğını əks etdirən materialların yayılması və internet şəbəkəsində mütəmadi olaraq yenilənməsi nəzərdə tutulub.
Bundan başqa, ölkəmizdə fəaliyyət göstərən dini konfessiyaların və qurumların iştirakı ilə Xocalı soyqırımı qurbanlarının xatirəsinə həsr olunan anım mərasimləri təşkil ediləcək, idarə və təşkilatlarda, təhsil və mədəniyyət müəssisələrində xatirə gecələri, foto-rəsm sərgiləri, şahidlərlə görüşlər keçiriləcək, Azərbaycanın ərazi bütövlüyü uğrunda mübarizəyə həsr edilən sənədli və bədii filmlər nümayiş olunacaq.
Xocalılıların müvəqqəti məskunlaşdıqları şəhər və rayonlarda (Bakı, Sumqayıt, Gəncə, Mingəçevir, Şəki, Goranboy, Bərdə, Sabirabad, Göyçay, Zaqatala, Oğuz, Balakən) dövlət qurumları rəhbərlərinin, ziyalıların şəhid ailələri ilə görüşləri təşkil ediləcək.
Fevralın 26-da təhsil müəssisələrində ilk dərslər Xocalı soyqırımına həsr olunacaq. Həmin gün saat 17.00-da bütün ölkə ərazisində Xocalı soyqırımı qurbanlarının xatirəsi bir dəqiqəlik sükutla yad ediləcək. Xocalı soyqırımı günü ilə əlaqədar respublikanın şəhər və rayonlarında, kənd və qəsəbələrində Azərbaycanın dövlət bayraqları endiriləcək.
Milli Dram Teatrı “Xəcalət” tamaşasını təqdim edəcək
Onu da qeyd edək ki, sözügedən sənədə uyğun olaraq bir sıra teatr və mədəniyyət ocaqlarında Xocalı soyqırımının iyirmi səkkizinci ildönümünə həsr olunmuş geniş anım mərasimlərinin keçirilməsi planlaşdırılır. Məsələn, Azərbaycan Dövlət Akademik Milli Dram Teatrı fevralın 26-da Hüseynbala Mirələmovun “Xəcalət” adlı tamaşasını təqdim edəcək.
Qurumun mətbuat xidmətinin rəhbəri Cavid Zeynallının verdiyi məlumata görə, nümayiş olunacaq pyes Qarabağ müharibəsində çiyin-çiyinə vuruşan, lakin müharibədən sonra uzun müddət bir-birindən ayrı düşən iki uşaqlıq dostunun görüşündən bəhs edir. Pyesdə həmçinin müharibənin yaratdığı faciələr bir ailənin timsalında verilib və qaçqınlığın bu gün dünyanı narahat edən qlobal problemə çevrilməsinə xüsusi diqqət yetirilib. Tamaşa boyu bir dəfə də olsun güllə səsi eşidilməsə də, dramaturq müharibənin doğurduğu faciələri, insanlara gətirdiyi fiziki və mənəvi əzabları, sındırılmış insan talelərini, hökm sürən ümidsizliyi təsirli boyalarla təsvir edə bilib.
“Xəcalət” pyesi dünyanı dolaşan müharibə kabusuna, zorakılığa qarşı yönəlmiş, insanları ən çətin anlarda belə ləyaqətli, mətin və mübariz olmağa səsləyən ikihissəli dramdır. Qeyd edək ki, səhnə əsəri Əməkdar incəsənət xadimi Bəhram Osmanovun quruluşunda təqdim ediləcək. Tamaşanın quruluşçu rəssamı Əməkdar rəssam İsmayıl Məmmədov, musiqi tərtibatçısı isə Xalq artisti Siyavuş Kərimidir. Tamaşada əsas rolları Xalq artistləri Nurəddin Mehdixanlı, Ramiz Novruz, aktyorlar Mətanət Atakişiyeva, Xədicə Novruzlu, Əlvida Cəfərov, Məzahir Cəlilov ifa edəcəklər.
“Mənim ağ göyərçinim” Gənc Tamaşaçılar Teatrının səhnəsində...
Azərbaycan Dövlət Gənc Tamaşaçılar Teatrı (ADGTT) da fevralın 26-sı üçün xüsusi repertuar hazırlayıb. Belə ki, həmin gün teatrda yazıçı-dramaturq Tamara Vəliyevanın müəllifi olduğu “Mənim ağ göyərçinim” əsəri əsasında səhnələşdirilən eyniadlı tamaşa nümayiş etdiriləcək. Qurumun mətbuat xidmətinin rəhbəri Pərvin Nurəliyeva bildirib ki, tamaşanın süjeti azadlıq və müstəqillik uğrunda canlarını qurban vermiş gənclərin nakam həyat hekayəsi əsasında qurulub. Səhnə əsərinin quruluşçu rejissoru Xalq artisti Cənnət Səlimova, quruluşçu rəssamı Gürcüstanın tanınmış rəssamı, Tumanaşvili adına Teatrın baş rəssamı Şota Qlurjidze, musiqi tərtibatçısı isə Vladimir Neverovdur.
Səhnə əsərində rolları Əməkdar artistlər Nəsibə Eldarova, Rahib Əliyev, aktyorlar Təhminə Məmmədova, Asya Atakişiyeva, Mirzəağa Mirzəyev, Eşqin Quliyev, Məsumə Babayeva, Kərəm Hadızadə, Zülfiyyə Alhüseynova, Xalidə Şərifova, Ədalət Əbdülsəməd və başqaları ifa edəcəklər.
Xocalı faciəsinə həsr edilmiş “Soyqırımı” adlı tədbir keçiriləcək
O cümlədən paytaxtın bir çox muzey və sərgilərində də Xocalı faciəsinin qurbanlarına həsr olunmuş anım tədbirlərinin keçirilməsi planlaşdırılıb. Məsələn, Abdulla Şaiqin ev-muzeyinin və Nəriman Nərimanovun Xatirə Muzeyinin birgə təşkilatçılığı ilə fevralın 22-də Xocalı faciəsinə həsr edilmiş “Soyqırımı” adlı tədbir keçiriləcək. Nəriman Nərimanovun Xatirə Muzeyində keçiriləcək tədbirdə Xətai rayonu UPD qəsəbəsinin 58 nömrəli tam orta məktəbinin şagirdləri mövzu ilə bağlı ədəbi-bədii kompozisiya təqdim edəcəklər.
Sonda Xocalı faciəsinə həsr olunmuş film nümayiş olunacaq.
Tədbir çərçivəsində iştirakçılar Xocalı faciəsinə həsr edilmiş “Ana harayı” abidəsini ziyarət edəcəklər.
İstiqlal Muzeyində “Xocalıda can qaldı” adlı tədbir təşkil olunacaq
Həmçinin fevralın 21-də Azərbaycan İstiqlal Muzeyi və Azərbaycan Dövlət Mədəniyyət və İncəsənət Universitetinin (ADMİU) birgə təşkilatçılığı ilə Xocalı soyqırımının 28-ci ildönümünə həsr olunmuş “Xocalıda can qaldı” adlı tədbir təşkil ediləcək.
Muzeydən qəzetimizə bildirilib ki, Xocalı faciəsinin acı xatirəsini yaşatmaq, bu barədə ictimaiyyəti geniş şəkildə məlumatlandırmaq, gənc nəsli vətənpərvərlik ruhunda tərbiyə etmək məqsədi ilə keçiriləcək tədbirin rəsmi hissəsində Azərbaycan İstiqlal Muzeyinin icraçı direktoru Sədi Mirseyibli, ADMİU-nun rektoru Ceyran Mahmudova, Azərbaycan Dövlət Mədəniyyət və İncəsənət Universitetinin professoru, Xalq rəssamı Arif Əziz, kinorejissor, Azərbaycan Respublikasının Xalq artisti Vaqif Mustafayev çıxış edəcəklər.
Tədbirdə Azərbaycanın Xalq artisti, rejissor Vaqif Mustafayevin “Xocalıya ədalət!” beynəlxalq təbliğat-təşviqat kampaniyası çərçivəsində lentə alınmış “Dərdimi çəkirəm” sənədli filmi nümayiş olunacaq.
“Xocalı - şəhid şəhər” rəsm müsabiqəsinin yekun sərgisi açılacaq
Bundan başqa, Xətai Sənət Mərkəzində uşaq və yeniyetmələr üçün nəzərdə tutulan “Xocalı - Şəhid şəhər” adlı müsabiqənin yekun sərgisi açılacaq.
Fevralın 22-23-də Xətai Sənət Mərkəzində açılacaq sərgi çərçivəsində işlərin müəllifləri diplomla və fəal tədris mərkəzləri (dərnək, incəsənət məktəbi və s.) təşəkkürnamə ilə təltif olunacaq.
Xatırladaq ki, müsabiqə Mədəniyyət və Təhsil nazirlikləri, “Azərbaycan Televiziya və Radio Verilişləri” Qapalı Səhmdar Cəmiyyəti, Xətai Rayon İcra Hakimiyyəti, Azərbaycan Rəssamlar İttifaqı, Naxçıvan Rəssamlar Birliyinin dəstəyi, Azərbaycan Dövlət Rəsm Qalereyası və Xətai Sənət Mərkəzinin təşkilatçılığı ilə reallaşıb.
Müsabiqə XX əsr tarixinə “Əsrin genosidi” kimi daxil olmuş Xocalı soyqırımı qurbanlarının xatirəsini yad etmək və qan yaddaşımıza əbədi həkk olunmuş soyqırımı hadisəsini unutdurmamaq məqsədi ilə keçirilib.
Müşfiqə BAYRAMLI