“Rüstəm İbrahimbəyov Azərbaycan xalqının ancaq 1 faizinin səsini qazana bilər”

Bakı:

26 °C

54 %

2 m/s

Əlaqə

AZ RU EN

Ana səhifə / Müsahibə / “Rüstəm İbrahimbəyov Azərbaycan xalqının ancaq 1 faizinin səsini qazana bilər”

“Rüstəm İbrahimbəyov Azərbaycan xalqının ancaq 1 faizinin səsini qazana bilər”

03.07.2013 [01:46]

Siyavuş Novruzov: Rüstəm İbrahimbəyov qiyabi namizəddir
Yeni Azərbaycan Partiyası İcra katibinin müavini, Milli Məclisin deputatı Siyavuş Novruzov “Media forum” saytının suallarını cavablandırıb:
- “Milli şura” prezidentliyə vahid namizədini müəyyənləşdirib. Seçkidə bu qurumu Rüstəm İbrahimbəyov təmsil edəcək. Bu seçimi necə qiymətləndirirsiniz? YAP Rüstəm İbrahimbəyovu ciddi rəqib kimi qəbul edirmi?
- Rüstəm İbrahimbəyovun prezidentliyə namizəd olmasının bizim üçün heç bir əhəmiyyəti yoxdur. Azərbaycanda azad, ədalətli seçki mühiti var, istənilən Azərbaycan vətəndaşı qanunla müəyyən olunan şərtlər əsasında prezidentliyə namizədliyini irəli sürə bilər. İstər partiya, hərəkat sədrinin, istərsə də adi vətəndaşın belə bir hüququ var. Bunun üçün həmin şəxsin azı 35 yaşı, ali təhsili olmalı, o, son 10 ili Azərbaycanda yaşamalıdır.
Biz heç bir iddiaçını YAP-ın namizədinə alternativ, rəqib kimi görmürük. “Milli şura” heç bizim hansısa rayon təşkilatına alternativ ola bilməz. Ən azı intellektual cəhətdən YAP-ın hansısa rayon təşkilatına da çata bilmirlər. Hər partiyadan 5-6 nəfər “Milli şura”da yığışıb adını nə qoyur qoysun, onsuz da mahiyyətləri bəllidir.
- Rüstəm İbrahimbəyov namizədliyi irəli sürülən iclasda iştirak etməyib...
- Rüstəm İbrahimbəyov Azərbaycanda olmadığı halda onun namizədliyinin verilməsi qiyabi namizədlikdir. Necə ki, universitetlərdə qiyabi oxuyanlar, axşam şöbəsində oxuyanlar olur, bu da elə formada qiyabi şəkildə namizədliyini verib. O, heç əyani namizəd də ola bilməyib.
Seçki kampaniyasının üç əsas şərti var. Birinci şərt zamandır. Bu, yeganə resursdur ki, itirsən, onu bərpa etmək mümkün deyil. İkinci şərt sosial bazadır. Prezidentliyə iddia edən adamın güclü elektoratı olmalıdır. Üçüncü şərt seçki kampaniyasını, təbliğat-təşviqatı həyata keçirmək üçün lazım olan maliyyə dəstəyidir. Ən əsas amil isə namizədin özüdür.
“Milli şura” adı altında bir araya toplanan 5-10 nəfər şərtlərdən biri olan zamanı itirib. Çünki seçkiyə bir il qabaq hazırlıq görülməlidir. Bu, bütün dünyada belədir. Amma onlar hələ indi qiyabi, şifahi bir namizəd formalaşdırıblar. Onu da hələ tam başa çatdırmayıblar.
Onların sosial bazası da yoxdur, xalq onları dəstəkləmir. Həm də gözləyirlər ki, kimsə maliyyə dəstəyi göstərəcək. Elə bunun hesabına da ora yığışıblar. Amma bu maliyyə dəstəyi də hələlik ortada yoxdur.
Namizədləri də ki olsa-olsa ancaq bir rejissordur. Rüstəm İbrahimbəyov nə ictimai-siyasi xadimdir, nə dövlət adamıdır. Ancaq kinorejissor kimi tanınır və Azərbaycan xalqının da ancaq 1 faizinin səsini qazana bilər. Bütün bunlar da onu göstərir ki, onlar əsl seçkiyə hazırlaşmırlar, ümumiyyətlə seçki işi ilə məşğul olmurlar.
- Rejissor Rüstəm İbrahimbəyov siyasi ssenari əsasında Azərbaycan tarixinə düşən siyasi film çəkə bilərmi?
- O, heç adi kinonu yaxşı çəkə bilmir, o ki, qaldı siyasi kino çəksin. Ona görə də, onun işi baş aldatmaqdır. O, ətrafına yığışan siyasi partiyaları da pis vəziyyətə qoyacaq. Necə ki, vaxtilə bir yerdə işlədiyi adamları pis vəziyyətə qoyub, - o adamlar indiyə qədər də səslərini çıxarıb danışmırlar, - o cür də bu partiya sədrlərini aldadıb pis vəziyyətə qoyacaq.

Paylaş:

Baxılıb: 1291 dəfə