"İkiqat Olimpiya Çempionu olmaq üçün səylə çalışacam"

Bakı:

21 °C

88 %

1 m/s

Əlaqə

AZ RU EN

Ana səhifə / Müsahibə / "İkiqat Olimpiya Çempionu olmaq üçün səylə çalışacam"

"İkiqat Olimpiya Çempionu olmaq üçün səylə çalışacam"

30.09.2009 [15:41]

Fərid Mansurov: Uğursuzluqları unutdurmaq üçün Dünya çempionatında qələbə vacib idi
Danimarkada keçirilən Dünya çempionatında komanda hesabında 3-cü olan yunan-Roma güləşi üzrə yığmamız Vətənə dönüb. 19 pəhləvan ilə çempionatda iştirak edən Azərbaycan yığma komandası ümumilikdə 10 medal - 3 qızıl, 4 gümüş, 3 bürünc qazanıb. Yarışın qəhrəmanı, ikiqat dünya çempionu Fərid Mansurov olub. O, çempion olmaqla ölkəmiz müstəqillik əldə etdikdən sonra ikiqat dünya çempionu tituluna yiyələnən güləşçi adını qazanıb. Qeyd edək ki, Fərid çempionatın son günü xalça üzərinə çıxaraq finala qədər irəliləyib. Bu yolda o, ardıcıl olaraq ispan Sançez Navarro və yapon Tsutomu Fucimuranı məğlub edib, 1/8 final mərhələsində erməni güləşçisi Sasun Qambaryan üzərində möhtəşəm qələbə (4:0, 2:1) qazanıb. 1/4 finalda iranlı Afşin Byabanqard ilə gərgin görüşdən (3:0, 0:2, 1:0) qalib ayrılan Fərid, yarımfinalda Kuba güləşçisi Pedro İsak Muleni (0:2, 1:0, 1:0) də məğlub edib. Finalda isə gürcü rəqibi Manuçar Tsxadaya üzərində təmiz qələbə qazanan F.Mansurov dünya çempionu olub. Bununla da Fərid Mansurov ikiqat dünya çempionu adını qazandı. çempionumuzun qəzetimizə müsahibəsini təqdim edirik:
- Fərid, təbrik edirik. Əvvəlcə Dünya çempionatı haqda fikirlərini bilmək istərdik.
- Təbrikə görə çox sağ olun. Yarışa gəlincə, çox gərgin və maraqlı oldu. Son yarışlarda ürəyimcə çıxış etməsəm də, əvvəlcədən çempion olacağıma inanırdım və açıqlamamda da bu haqda fikir bildirmişdim. çox şadam ki, Dünya çempionatında ikinci dəfə qızıl medal qazandım. Milli komandanın digər üzvlərindən Rövşənlə Vitali bürünc mükafat qazansa da, çempionluğa layiq güləşdilər. Ancaq kiçik ehtiyatsızlıq, bəxtsizlik ucbatından onlar qızıl medal qazana bilmədilər. Komanda hesabında böyük uğur qazandıq. Azərbaycanın güləş tarixində ilk dəfə dünyanın 3 ən güclü yığması sırasına düşdük.
- Final görüşü barədə nə düşünürsən?
- Milli komandanın üzvlərindən finala yalnız mən çıxmışdım. Qızıl medal qazanmaq şansını qaçıra bilməzdim. Allaha şükür ki, başımızı uca etdi, bizi utandırmadı.
- Həlledici görüşdə məğlub etdiyin gürcü güləşçisi bununla heç cürə barışa və göz yaşlarını saxlaya bilmirdi. Rəqib sanki hakimdən narazı görünürdü.
- Avropa çempionatında bu idmançıya uduzmuşdum. İlk hissədə qələbə qazandım. İkinci hissədə isə mübahisəli vəziyyət yarandı. Parterdə rəqib qaydalar çərçivəsində hərəkət etmədi, bir qədər ayaqları ilə maneçilik törətdi. Buna görə də, hakimlərin qərarı ilə qələbə mənə verildi.
- çempionluğu kimə həsr edirsən?
- Başda Prezidentimiz olmaqla xalqımıza. Qeyd edim ki, bu gün qardaşımla qardaşım oğlunun ad günüdür və onlar məndən yalnız qızıl medal gözləyirdilər. çox şadam ki, əliboş qayıtmadım, hədiyyə ilə gəldim. Son dəfə 2007-ci ildə Bakıdakı Dünya çempionatında uğur qazanmışdım. Bundan sonra Pekin Olimpiadasında yaxşı çıxış edə bilmədim. Buna səhhətimdə yaranan problem, xəstəlik imkan vermədi. Həmçinin, Avropa çempionatında ürəyimcə çıxış edə bilmədim. Bu uğursuzluqları unutdurmaq üçün Dünya çempionatında qələbə vacib idi. Başda Prezidentimiz olmaqla Azərbaycan Güləş Federasiyasının rəhbərliyinə, məşqçilərimiz və jurnalistlərə dərin təşəkkürümü bildirirəm.
- Dünya çempionatından sonra karyeranı başa vuracağını bəyan etmişdin.
- Ciddi zədəli olduğumdan belə fikrə düşmüşdüm. Ancaq yaxşı hazırlıq keçdik və yenə də uğur qazandığım üçün çox sevincliyəm.
- İlk dünya çempionluğu daha şirin idi, yoxsa budəfəki?
- Bilirsiniz ki, ilk dəfə iki il əvvəl Bakıda dünya çempionu olmuşdum. Bu, Dünya çempionatında ilk uğur olduğundan öz yeri vardı. ümumiyyətlə, çempionluqların hər ikisi mənə şirindir, hər hansı fərq görmürəm.
- İkiqat dünya çempionu oldun. İndi hamı səndən ikiqat Olimpiya çempionluğunu gözləyir...
- Bu məqsədə də nail olmaq çox çətin olacaq. Əvvəlcədən konkret nəsə demək olmur. İlk növbədə cansağlığı vacibdir. Digər tərəfdən, qarşıda vaxt var və ciddi hazırlaşmaq lazımdır. Məşqçilərin verdiyi tapşırıqları lazımınca yerinə yetirməliyik. Səylə çalışacağam ki, ikiqat Olimpiya çempionu olum.
ANAR

Paylaş:

Baxılıb: 1692 dəfə