Azərbaycan xarici işlər nazirinin müavini Bişkekdəki diasporumuzun üzvləri ilə görüşüb

Bakı:

12 °C

87 %

3 m/s

Əlaqə

AZ RU EN

Ana səhifə / Siyasət / Azərbaycan xarici işlər nazirinin müavini Bişkekdəki diasporumuzun üzvləri ilə görüşüb

Azərbaycan xarici işlər nazirinin müavini Bişkekdəki diasporumuzun üzvləri ilə görüşüb

23.08.2012 [02:13]

Türkdilli Dövlətlərin Əməkdaşlıq Şurasının (TDƏŞ) avqustun 23-də Bişkekdə keçiriləcək ikinci zirvə görüşündə iştirak etmək üçün Qırğızıstana gələn Azərbaycanın xarici işlər nazirinin müavini Xələf Xələfov paytaxtdakı diasporumuzun bir qrup üzvü ilə görüşüb. Bişkekdəki Türkdilli ölkələrin Siyasətinə Dəstək Fondunun (TöSDF) sədri Nüsrət Məmmədov X.Xələfovu salamlayıb, Fondun xətti ilə görülən işlərdən danışıb. Onun sözlərinə görə, indiyədək TöSDF-nin xətti ilə Azərbaycanın iqtisadi inkişafı, tarixi, ədəbiyyatı, mədəniyyəti, incəsənəti ilə əlaqədar qırğız, qazax, rus və ingilis dillərində 45 kitab çap edilib. Bu kitablar arasında Bişkekdə rus dilində nəfis şəkildə işıq üzü görən üç cilddən ibarət “Prezident İlham Əliyev” kitabı xüsusi yer tutur. Kitablar Azərbaycanda olduğu kimi, Qırğızıstan, Qazaxıstan və özbəkistanda da pulsuz paylanıb və maraqla qarşılanıb.
Xələf Xələfov Azərbaycan ilə Qırğızıstan arasında əlaqələrin yüksələn xətt üzrə inkişaf etdiyini bildirib, Qırğızıstan Prezidenti Almazbek Atambayevin Azərbaycana rəsmi səfərinin əlaqələrimizin inkişafına təkan verdiyini vurğulayıb. Belə ki, səfər zamanı Almazbek Atambayevin Azərbaycan Prezidenti İlham Əliyev ilə görüşündə ölkəmizin Qırğızıstana 1 milyard dollar sərmayə qoyulması ilə əlaqədar sənəd imzalanıb.
Xələf Xələfov Ermənistan-Azərbaycan, Dağlıq Qarabağ münaqişəsinin sülh yollu ilə həlli istiqamətində Azərbaycanın təşəbbüsləri haqqında danışıb, ölkəmizin iqtisadi inkişafına dair ətraflı məlumat verib. Azərbaycan diasporunun fəalları Cəbi Rəsulov, Əsəd Əsədov, Osman Səfərov, Rabil Rəsulov və başqaları diasporumuzun təşkilatlanması sahəsində görüləcək işlərdən danışıb, Orta Asiya və Qazaxıstanda “Azərbaycanlıların Əlaqələndirmə Konqresi”nin Bişkekdə yaradılması planları haqqında ətraflı məlumat veriblər.
Nüsrət Məmmədov üçcildlik “Prezident İlham Əliyev” kitabını, Azərbaycan Prezidenti Administrasiyasının rəhbəri, akademik Ramiz Mehdiyevin qırğız və rus dillərində çap edilmiş “Gorus-2010: absurd teatrı mövsümü”, “Azərbaycanlılara qarşı soyqırımı gerçəkliyi”, görkəmli alim, yazıçı Mircəlal Paşayevin qırğız dilində buraxılmış “Seçilmiş əsərləri”, Azərbaycanın Xalq şairi Bəxtiyar Vahabzadənin Azərbaycan, qırğız, rus və ingilis dillərində buraxılmış “Gülüstan” poemasını və digər kitabları Xələf Xələfova təqdim edib.

Paylaş:

Baxılıb: 936 dəfə