Heydər Əliyev Fondunun hazırladığı “Eurovision Bakıda” filminin və kitabının təqdimat mərasimi keçirilib

Bakı:

23 °C

52 %

8 m/s

AZ RU EN

Ana səhifə / Siyasət / Heydər Əliyev Fondunun hazırladığı “Eurovision Bakıda” filminin və kitabının təqdimat mərasimi keçirilib

Heydər Əliyev Fondunun hazırladığı “Eurovision Bakıda” filminin və kitabının təqdimat mərasimi keçirilib

04.05.2013 [10:35]

Azərbaycanın birinci xanımı Mehriban Əliyeva mərasimdə olub
Mayın 3-də “Nizami” Kino Mərkəzində Heydər Əliyev Fondunun və Heydər Əliyev Mərkəzinin birgə layihəsi olan “Eurovision Bakıda” filminin və kitabının təqdimat mərasimi keçirilib.
AzərTAc xəbər verir ki, mərasimdə Azərbaycanın birinci xanımı, Heydər Əliyev Fondunun prezidenti, “Eurovision-2012” Mahnı Müsabiqəsi Təşkilat Komitəsinin sədri Mehriban Əliyeva iştirak edib.
Mərasim Azərbaycan tarixini, mədəniyyətini və zəngin turizm potensialını əks etdirən videoçarxın nümayişi ilə başlayıb.
Təqdimat mərasimində 2012-ci ilin may ayının Azərbaycan üçün çox əlamətdar bir hadisə ilə yadda qaldığı, ölkəmizin “Eurovision” Mahnı Müsabiqəsinə ev sahibliyi etdiyi xüsusi vurğulanıb.
Bildirilib ki, Azərbaycan təmsilçiləri ilk dəfə 2008-ci ildə müsabiqəyə qatılıb. Diqqətə çatdırılıb ki, “Eurovision” Mahnı Müsabiqəsində ölkəmizin iştirak etməsinin təşəbbüskarı Azərbaycanın birinci xanımı, Heydər Əliyev Fondunun prezidenti, UNESCO və İSESCO-nun xoşməramlı səfiri Mehriban Əliyeva olub. Məhz bu dəstəyin nəticəsində ölkəmiz hər il müsabiqədə uğurla təmsil olunub. Vurğulanıb ki, Prezident İlham Əliyevin Sərəncamı ilə Azərbaycanın birinci xanımı Mehriban Əliyevanın “Eurovision-2012” Mahnı Müsabiqəsi Təşkilat Komitəsinin sədri təyin edilməsi bu tədbirin ən yüksək səviyyədə keçirilməsinə şərait yaradıb.
Sonra “Eurovision Bakıda” filmi nümayiş olunub. Filmdə Avropanın ən mötəbər yarışması olan “Eurovision” Mahnı Müsabiqəsində qələbəyə gedən yol, bu yarışmaya Prezident İlham Əliyevin dəstək və diqqəti, Azərbaycanın birinci xanımı Mehriban Əliyevanın rəhbərlik etdiyi Təşkilat Komitəsinin fəaliyyəti əksini tapıb. Filmdə müsabiqənin keçirildiyi “Baku Crystal Hall”un tikintisi, “Eurovision-2012” ilə bağlı təşkil edilən mərasimlər və yarışmanın Bakı şousu da yer alıb. Nümayəndə heyətlərinin və qonaqların paytaxtımızda qarşılaşdığı qonaqpərvərlik, Təşkilat Komitəsinin uğurlu fəaliyyəti və yüksək təşkilatçılığı barədə məlumat verilib.
Bu ekran işində, həmçinin müsabiqənin keçirildiyi müddətdə şəhərimizin qonaqlarının nəqliyyat və otel məsələlərinin yüksək səviyyədə həll edildiyi, Avropanın kütləvi informasiya vasitələrində ölkəmizin tarixi, adət-ənənələri, mədəniyyəti, Avropa Yayımları Birliyi ilə əməkdaşlıq, “EuroClub” və “EuroVillage” barədə verilişlərin yayımı, yarışma müddətində bir çox yeniliklərin tətbiqi, Azərbaycana gələn xarici vətəndaşların viza prosedurlarının sadələşdirildiyi diqqətə çatdırılıb.
Sonra “Eurovision Bakıda” kitabı haqqında da məlumat verilib.
Nəşrin ön səhifəsində “Eurovision-2012” Mahnı Müsabiqəsi Təşkilat Komitəsinin sədri xanım Mehriban Əliyevanın musiqi yarışması ilə bağlı fikirləri yer alıb. 192 səhifəlik kitabda “Eurovision” yarışmasının Bakıda keçirilməsi ilə bağlı görülən hazırlıq işlərini, ölkəmizin bu möhtəşəm mahnı müsabiqəsinə uğurla ev sahibliyini, yarışmanın gedişi prosesini əks etdirən maraqlı fotoşəkillər toplanıb. Bu nəşr bir daha təsdiq edir ki, müxtəlif mədəniyyətlərin qarşılıqlı zənginləşməsində rol oynayan bu böyük Ümumavropa musiqi bayramı dünya mədəniyyəti xəzinəsinə öz töhfəsini verib, Azərbaycandan yüz milyonlarla auditoriyaya möhtəşəm təqdimatı ilə yaddaşlarda həkk olunub.
Qeyd edək ki, Azərbaycan Avropanın bu məşhur yarışmasında dörd il layiqli iştirakçı kimi tanındıqdan sonra qonaqpərvər ev sahibliyi ilə də öz sözünü deyə bilib, “Eurovision”un Bakı şousu əsl bayrama çevrilib. Paytaxtımızda təşkil edilən bu yarışma hər bir kəsi qədim Odlar yurduna toplamaqla yanaşı dünyanı Azərbaycan haqqında geniş məlumatlandırıb. Şəhərimizin gözəlliyini, qədim Bakımızın müasir simasını, xalqımızın səmimiliyini hiss edən hər bir qonaq mədəniyyətimizi, ölkəmizi daha çox sevib. Bu sevginin qazanılmasına kimi fəaliyyəti, layihəyə dəstəyi, kimi də sadəcə təbəssümü, xoş davranışı ilə öz töhfəsini verib.
“Eurovision-2012” Mahnı Müsabiqəsi həm xalqımızın, həm də ölkəmizə gələn qonaqların yaddaşından uzun zaman silinməyəcək.

Paylaş:

Baxılıb: 1215 dəfə