ABŞ-ın müstəqillik günü qeyd edilib

Bakı:

23 °C

49 %

5 m/s

Əlaqə

AZ RU EN

Ana səhifə / Siyasət / ABŞ-ın müstəqillik günü qeyd edilib

ABŞ-ın müstəqillik günü qeyd edilib

04.07.2013 [01:51]

İyulun 3-də ABŞ-ın Azərbaycandakı səfirliyi ölkəsinin müstəqilliyinin elan edilməsinin 237-ci ildönümü ilə əlaqədar rəsmi qəbul təşkil edib.
AzərTAc xəbər verir ki, qəbulda dövlət və hökumət rəsmiləri, Milli Məclisin deputatları, xarici ölkələrin Azərbaycanda akkreditə olunmuş səfirləri, ABŞ konqresmenləri, ictimaiyyətin nümayəndələri iştirak ediblər.
Əvvəlcə hər iki ölkənin dövlət himnləri səsləndirilib.
Tədbirdə çıxış edən ABŞ-ın Azərbaycandakı səfiri Riçard Morninqstar ölkəsinin müstəqillik tarixindən danışıb. Qeyd edib ki, 1776-cı il 4 iyul ABŞ-ın “Müstəqillik Bəyannaməsi”nin imzalandığı gündür.
Azərbaycan ilə ABŞ arasındakı münasibətlərdən danışan R.Morninqstar qeyd edib ki, ölkəmiz müstəqilliyini bərpa etdikdən sonra diqqətəlayiq uğurlar qazanıb. Azərbaycan özünü həqiqətən də regional və qlobal aləmdə önəmli rol oynayan müstəqil ölkə kimi təsdiq edib. Diplomat Azərbaycanın BMT-nin Təhlükəsizlik Şurasının üzv seçilməsini, Avropanın enerji təhlükəsizliyinin təmin olunmasında mühüm rol oynamasını, hər iki ölkənin əsgərlərinin Əfqanıstanda həyata keçirilən sülhməramlı əməliyyatlarda çiyin-çiyinə fəal iştiraklarını yüksək qiymətləndirib.
Azərbaycan hökuməti adından ABŞ xalqını təbrik edən maliyyə naziri Samir Şərifov ölkələrimiz arasındakı diplomatik münasibətlərdən danışıb. Bildirib ki, Azərbaycan müstəqilliyini bərpa etdikdən sonra iki ölkə arasında diplomatik əlaqələr qurulub və əməkdaşlıq münasibətləri yüksələn xətlə inkişaf etməkdədir.
Nazir diqqətə çatdırıb ki, Ümummilli lider Heydər Əliyev həmişə ABŞ-Azərbaycan münasibətlərinə önəm verib, siyasi, iqtisadi, humanitar və digər sahələrdə əlaqələrin hazırkı səviyyəyə çatmasında mühüm rol oynayıb. Azərbaycan Prezidenti İlham Əliyevin həyata keçirdiyi uğurlu xarici siyasət ölkələrimiz arasında münasibətlərin daha da genişlənməsinə, demokratiyanın inkişafına və terrorçuluğa qarşı mübarizədə birgə səylərin artırılmasına, o cümlədən təhlükəsizlik və enerji sahəsində əməkdaşlığın dərinləşməsinə mühüm töhfələr verir.
Azərbaycan ilə ABŞ arasında indiyədək müxtəlif sahələr üzrə 73 sənədin imzalandığını deyən S.Şərifov diqqətə çatdırıb ki, ikitərəfli əlaqələrin genişləndirilməsi üçün səmərəli hüquqi baza yaradılıb. Geosiyasi baxımdan mürəkkəb bir regionda yerləşən Azərbaycan ABŞ ilə qlobal və regional təhlükəsizlik, demokratik islahatlar, insan hüquqlarına hörmət, tolerantlıq kimi ümumi dəyərləri bölüşür.
Ermənistan-Azərbaycan, Dağlıq Qarabağ münaqişəsinə toxunan nazir qeyd edib ki, ABŞ ATƏT-in Minsk qrupunun həmsədr ölkəsi kimi problemin tənzimlənməsində mühüm rol oynayır. S.Şərifov ABŞ-ın ən yüksək rəhbərliyi səviyyəsində mövcud status-kvonun qəbuledilməzliyinə dair qəbul olunmuş bəyanatı yüksək qiymətləndirib.
Nazir çıxışının sonunda Prezident İlham Əliyevin Azərbaycanın ABŞ ilə tərəfdaşlığına dair fikirlərini xatırladıb: “Azərbaycan bu regionda etibarlı tərəfdaşdır. Biz bunu sadəcə bəyanatlarla deyil, real işlərimizlə sübut edirik”.

Paylaş:

Baxılıb: 1270 dəfə