Cenevrədə Türk dünyasına dair akademik müzakirə aparılıb

Bakı:

10 °C

81 %

0 m/s

Əlaqə

AZ RU EN

Ana səhifə / Siyasət / Cenevrədə Türk dünyasına dair akademik müzakirə aparılıb

Cenevrədə Türk dünyasına dair akademik müzakirə aparılıb

10.04.2025 [17:21]

Cenevrə şəhərində Təhlükəsizlik Siyasəti üzrə Cenevrə Mərkəzində (GCSP) Azərbaycanın Cenevrədəki BMT bölməsi və digər beynəlxalq təşkilatlar yanında daimi nümayəndəliyi, Türk Dövlətləri Təşkilatının (TDT) Sədrliyi qismində Qırğız Respublikasının Cenevrədəki BMT bölməsi və digər beynəlxalq təşkilatlar yanında daimi nümayəndəliyi, Təhlükəsizlik Siyasəti üzrə Cenevrə Mərkəzi və BMT-nin Sülh Universitetinin birgə təşkilatçılığı ilə “Türk Dünyasına dair akademik müzakirə: əməkdaşlıq imkanlarının araşdırılması” mövzusunda tədbir keçirilib.

AZƏRTAC xəbər verir ki, Cenevrə Universitetinin Təhlükəsizlik məsələləri üzrə Mərkəzinin nümayəndəsi elmlər doktoru Ventseslav Sabevin moderatorluq etdiyi tədbirin açılışında Təhlükəsizlik Siyasəti üzrə Cenevrə Mərkəzinin icraçı direktoru səfir Tomas Qreminger, Azərbaycanın Cenevrədəki daimi nümayəndəsi səfir Qalib İsrafilov, Qırğızıstanın Cenevrədəki daimi nümayəndəsi səfir Omar Sultanov və BMT-nin Sülh Universitetinin Cenevrədəki daimi müşahidəçisi səfir David Fernandez Puyana çıxış ediblər.

T.Qreminger çıxışında Türk dünyasının Avrasiyada unikal yer tutduğunu vurğulayıb. O, Türk dövlətləri arasında əlaqələrin sürətlə inkişaf etdiyini qeyd edərək, bu prosesin nəticəsi olaraq 2021-ci ildə Türkdilli Dövlətlərin Əməkdaşlıq Şurasının Türk Dövlətləri Təşkilatına çevrildiyini bildirib. T.Qreminger əlavə edib ki, bu, təşkilatın qlobal çağırışlarla mübarizə sahəsində beynəlxalq ictimaiyyətlə daha geniş və səmərəli əməkdaşlıq imkanları yaradıb.

Səfir Qalib İsrafilov türk xalqlarının ortaq dəyərlərə əsaslanan sıx əlaqələrini tarixən qoruyub saxladıqlarını və dünya sivilizasiyasına verdiyi unikal töhfəni vurğulayıb. TDT ilə əməkdaşlıq imkanlarına toxunan səfir təşkilatın Avrasiyada sülh, təhlükəsizlik və dayanıqlı inkişafa töhfəsi baxımından əhəmiyyətini də qeyd edib.

Türk Dövlətləri Təşkilatının Sədrliyi qismində çıxış edən Qırğızıstanın Cenevrədəki daimi nümayəndəsi səfir Omar Sultanov təşkilatın məqsədləri, əməkdaşlıq imkanları və perspektivləri barədə məlumat verib.

David Fernandez Puyana BMT Baş katibinin “Yeni sülh gündəliyi” çərçivəsində regional təşkilatların sülhün və təhlükəsizliyin təmin edilməsi perspektivindən çıxış edərək, bu xüsusda Türk Dövlətləri Təşkilatının rolundan bəhs edib.

Tədbirin panel müzakirələr hissəsində əsas natiq qismində çıxış etmiş Azərbaycan Respublikasının sabiq Baş naziri və sabiq xarici işlər naziri, tarix elmləri doktoru, Türk Dövlətləri Təşkilatının Ağsaqqallar Şurasının üzvü Həsən Həsənov dünya elmində türk sivilizasiyası haqqında kifayət qədər araşdırmanın olmadığını vurğulayaraq, türk sivilizasiyasının tarixi təşəkkülü, türk dili və türk dövlətçiliyi tarixi, habelə mədəni təzahürləri barədə tədbir iştirakçılarını məlumatlandırıb.

Tədbirdə, həmçinin İsveçrənin Azərbaycanda səfiri olmuş Valter Giqer panelçi qismində çıxış edib. O, Qərbdə Türk dünyasına və ümumilikdə bu coğrafiyaya kifayət diqqət yetirilməməsi, regionun yeni müstəqil güc mərkəzi olaraq inkişafı, region ölkələrinin ərazilərindən keçən Şərq-Qərb və Şimal-Cənub dəhlizlərinin əhəmiyyətini vurğulayıb.

Əsas çıxışlardan sonra tədbir iştirakçılarının sualları cavablandırılıb.

Tədbirdə Cenevrədə fəaliyyət göstərən akademik dairələr və diplomatik korpusun nümayəndələri iştirak ediblər.

Paylaş:

Baxılıb: 419 dəfə