Azərbaycan Avropa İttifaqı ilə tərəfdaşlıq dialoqunun bərabərhüquqlu və strateji tərəfdaşlıq əsasında inkişafında maraqlıdır

Bakı:

26 °C

43 %

4 m/s

AZ RU EN

Ana səhifə / Siyasət / Azərbaycan Avropa İttifaqı ilə tərəfdaşlıq dialoqunun bərabərhüquqlu və strateji tərəfdaşlıq əsasında inkişafında maraqlıdır

Azərbaycan Avropa İttifaqı ilə tərəfdaşlıq dialoqunun bərabərhüquqlu və strateji tərəfdaşlıq əsasında inkişafında maraqlıdır

24.07.2013 [09:48]

Brüsseldə Avropa İttifaqına (Aİ) üzv və “Şərq Tərəfdaşlığı” ölkələrinin xarici işlər nazirlərinin IV görüşü keçirilib.
Xarici İşlər Nazirliyindən AzərTAc-a bildiriblər ki, iclasda Azərbaycanı ölkəmizin xarici siyasət idarəsinin rəhbəri Elmar Məmmədyarov təmsil edib.
Toplantıya Avropa Komissiyasının vitse-prezidenti və Aİ-nin xarici əlaqələr və təhlükəsizlik siyasəti üzrə ali nümayəndəsi xanım Ketrin Eşton və qurumun Genişlənmə və Avropa Qonşuluq Siyasəti üzrə komissarı Ştefan Füle sədrlik ediblər.
Tədbirdə Aİ-yə üzv ölkələrin xarici işlər nazirləri, Avropa Xarici Fəaliyyət Xidməti, Avropa Sərmayə Bankı, eyni zamanda, Azərbaycan, Belarus, Ermənistan, Gürcüstan, Moldova və Ukraynanın xarici işlər nazirləri və “Şərq Tərəfdaşlığı” Vətəndaş Cəmiyyəti Forumunun nümayəndəsi iştirak ediblər.
Tədbir iştirakçıları “Şərq Tərəfdaşlığı”nın hazırkı vəziyyətini, onun Varşava Sammitindən bu günədək əldə etdiyi nailiyyətlərini, Vilnüs Sammitinə hazırlıq və ondan sonrakı tərəfdaşlıq perspektivlərini müzakirə ediblər.
Elmar Məmmədyarov ölkəmizin “Şərq Tərəfdaşlığı”ndakı fəaliyyəti və ümumiyyətlə, Aİ ilə əməkdaşlıq dialoqundan bəhs edib, 2006-cı ildə qəbul edilmiş Avropa Qonşuluq Siyasəti üzrə Fəaliyyət Proqramında əks olunmuş Azərbaycanın suverenliyi və ərazi bütövlüyü prinsiplərinə dəstəyin verilməsi ilə bağlı qurumun üzərinə götürdüyü öhdəliyə əməl etməsinin vacibliyini vurğulayıb. Qeyd edilib ki, Azərbaycan-Aİ dialoqunun gələcək perspektivləri və Assosiasiya Sazişi üzrə aparılan danışıqlarda tərəqqinin əldə olunması bu növ qarşılıqlı hörmət və tərəfdaşlıq prinsiplərinin öhdəlikləri əsasında reallaşması mümkündür.
Nazir Prezident İlham Əliyevin iyunun 21-də Brüsselə səfəri çərçivəsində Aİ Şurasının prezidenti Herman van Rompey və Avropa Komissiyasının prezidenti Joze Manuel Barrozu ilə keçirdiyi görüşləri xatırladıb. Diqqətə çatdırıb ki, görüşlərdə bir sıra vacib nəticələr əldə edilib. Azərbaycan Aİ ilə tərəfdaşlıq dialoqunun bərabərhüquqlu və strateji tərəfdaşlıq əsasında inkişafında maraqlıdır.
Elmar Məmmədyarov bildirib ki, “Cənub qaz dəhlizi” ilə bağlı qəbul edilmiş qərarlar Aİ-nin enerji təhlükəsizliyinin gücləndirilməsində və qurum ilə siyasi-iqtisadi münasibətlərdə bundan sonra daha da geniş imkanların yaradılmasında müstəsna rol oynayacaq.
Nazir Aİ ilə viza rejiminin asanlaşdırılması və readmissiya sazişləri ilə bağlı danışıqlarının demək olar ki, tamamlandığını və Vilnüs Sammitinədək həmin sənədlərin imzalanmasının əhəmiyyətini, qurum ilə təhsil sahəsində əməkdaşlığın təkmilləşdirilməsinin vacibliyini vurğulayıb. E.Məmmədyarov bu sahədə Azərbaycan-Aİ əməkdaşlığı çərçivəsində ciddi addımların atılmasını, “Şərq Tərəfdaşlığı” fəaliyyətində qender bərabərliyi və qadınların cəmiyyətlərdə rolunun artırılmasının fəaliyyət istiqamətinin inkişaf imkanlarının araşdırılmasını təklif edib.
Nazir tədbir çərçivəsində ukraynalı və yunanıstanlı həmkarları ilə təkbətək görüşlər keçirərək, ikitərəfli münasibətlərin genişləndirilməsinin perspektivlərini müzakirə edib.

Paylaş:

Baxılıb: 1158 dəfə