Azərbaycanda prezident seçkiləri beynəlxalq standartlara uyğun keçirilib

Bakı:

12 °C

82 %

7 m/s

Əlaqə

AZ RU EN

Ana səhifə / Siyasət / Azərbaycanda prezident seçkiləri beynəlxalq standartlara uyğun keçirilib

Azərbaycanda prezident seçkiləri beynəlxalq standartlara uyğun keçirilib

23.10.2013 [10:32]

Məlum olduğu kimi, oktyabrın 9-da ölkəmizdə prezident seçkiləri azad, şəffaf və demokratik qaydada keçirildi. Bu faktı seçki prosesini izləyən çoxsaylı beynəlxalq müşahidəçilər də təsdiq edib. Amma maraqlıdır ki, bütün digər beynəlxalq müşahidəçilərdən fərqli olaraq ATƏT-in Demokratik Təsisatlar və İnsan Haqları Bürosu Azərbaycandakı bu seçkilərə də qeyri-obyektiv münasibət bildirdi. Belə ki, təşkilatın müşahidə missiyasının seçki ilə bağlı ilkin rəyində qeyri-obyektiv, qərəzli və reallığı əks etdirməyən fikirlərə yer verilib. Amma buna baxmayaraq, adıçəkilən qurumun bu yanaşması seçkilərin şəffaflığına heç bir şübhə yaratmaq iqtidarında deyil. Çünki yüzlərlə beynəlxalq müşhidəçilər də seçkilərin beynəlxalq standartlara uyğun keçirildiyini vurğulayıblar. Beləliklə, bu seçkilər Azərbaycan xalqının iradəsini ifadə etdi.
Milli Məclisin dünən keçirilən iclasında da ölkəmizdə keçirilən prezident seçkilərinə münasibət bildirilib. Milli Məclisin sədri Oqtay Əsədov qələbə münasibətilə Prezident İlham Əliyevi təbrik edib: “9 oktyabr prezident seçkilərində xalqımız cənab İlham Əliyevə etimad göstərməklə özünün gələcəyinə, Azərbaycanın inkişafına səs verdi. Bu münasibətlə hamını təbrik edirəm”.
O.Əsədov bildirib ki, Azərbaycan Prezidentinin andiçmə mərasiminin Milli Məclisdə keçirilməsi dövlətin qanunverici orqana verdiyi önəmdir. Milli Məclisin sədri seçkilərdə qələbə münasibətilə Prezident İlham Əliyevi deputatların adından təbrik edib.
“Azərbaycanda prezident seçkilərinin azad, şəffaf, xalqın iradəsi əsasında keçirilməsinə bütün dünya şahid oldu”. Bu fikri isə Milli Məclisin deputatı, Azərbaycan Ağsaqqallar Şurasının sədri Fəttah Heydərov deyib. F.Heydərov bildirib ki, seçkiləri çoxlu sayda beynəlxalq müşahidəçilərin izləməsi də dünyanın Azərbaycana olan marağının göstəricisidir. Onun fikrincə, prezident seçkiləri Azərbaycan vətəndaşlarının öz rəhbərinə olan yüksək münasibətini və etimadını nümayiş etdirdi. “Belə bir şəraitdə Azərbaycanda, o cümlədən, dünyada sülhə və sabitliyə, inkişafa mane olan mənfi qüvvələrin rəyini şişirtməyə, onlara istinadən ayrı-ayrı hadisələri müzakirə mövzusu etməyə ehtiyac yoxdur. Biz bu gün fərəh və qürur hissi ilə deyə bilərik ki, Azərbaycan xalqı müdrik xalqdır, öz müstəqilliyini dünyanın digər xalqları ilə müqayisədə daha yüksək dəyərləndirir. Azərbaycan istənilən dövlətlə əlaqələrində öz müstəqil mövqeyini təsdiq edib. Qəbul etdiyimiz sənədlərdə onu nəzərdə tutmalıyıq ki, Azərbaycan inkişafdadır, dünyanın nəzər diqqətindədir. İnkişafımıza dünyada sevinənlər çox olsa da, amma gözü götürməyənlər də var. Bu halları şişirtmək lazım deyil. Biz öz yolumuzla getməliyik” - deyə, F.Heydərov vurğulayıb.
Qəzetimizə açıqlama verən YAP Nizami rayon təşkilatının sədri, millət vəkili Sədaqət Vəliyeva isə deyib ki, 9 oktyabr prezident seçkiləri bir daha Azərbaycandakı demokratik inkişafın təntənəsini ortaya qoydu: “Bütün dünya bir daha gördü ki, Azərbaycan xalqı müdrik, rasional düşüncəlidir və öz iradəsini sərbəst şəkildə ortaya qoymağı bacarır. Bu səbəbdən də, seçki prosesində də, ondan sonra da Azərbaycanın uğurlarına sevinə bilməyən qüvvələrin reaksiyalarını da müşahidə etdik. Lakin istənilən halda yenə də gələcəyi xoşbəxt görmək istəyən Azərbaycan xalqı qalib gəldi”.
S.Vəliyeva bildirib ki, bu il keçirilmiş prezident seçkilərində daha yüksək aktivlik müşahidə olunub: “Bu isə onunla əlaqədardır ki, artıq cəmiyyətimizdə siyasi şüur və siyasi mədəniyyət, ümumilikdə, seçki mədəniyyəti yüksələn xətlə inkişaf edir. Eyni zamanda, insanların sosial rifah halının yüksəlməsi və maddi gəlirlərinin artması, məişət problemlərinin azalması cəmiyyətə siyasi proseslərə olan marağı da artırır. Bu mənada cənab Prezident İlham Əliyevin ölkədə reallaşdırdığı demokratikləşmə prosesi öz bəhrəsini verməkdədir. Ümumən vətəndaş cəmiyyətinin inkişaf etməsi, vətəndaş-dövlət münasibətlərinin və ünsiyyətinin keyfiyyət baxımından yüksəlməsi, cəmiyyətdə dövlətə olan inamın artması konseptual olaraq, reallaşdırılan “konsolidasiyalı demokratiyanın” bərqərar olmasını isbatlayır”.
Deputat əlavə edib ki, 9 oktyabr seçkilərindən sonra bütün dünya gördü ki, Azərbaycanda xalq-iqtidar birliyi var, xalqın iradəsi hər şeydən üstündür: “Düşünürəm ki, bundan sonra Azərbaycana qarşı subyektiv hərəkətlər etməyə çalışan qüvvələr ilk olaraq, bu faktı nəzərə alacaqlar”.
Nardar BAYRAMLI

Paylaş:

Baxılıb: 1082 dəfə