İlk peşə ixtisaslı təhsil müəssisələrinin fəaliyyətinin dəstəklənməsi barədə ikitərəfli əməkdaşlıq memorandumları imzalanıb

Bakı:

25 °C

46 %

3 m/s

AZ RU EN

Ana səhifə / Siyasət / İlk peşə ixtisaslı təhsil müəssisələrinin fəaliyyətinin dəstəklənməsi barədə ikitərəfli əməkdaşlıq memorandumları imzalanıb

İlk peşə ixtisaslı təhsil müəssisələrinin fəaliyyətinin dəstəklənməsi barədə ikitərəfli əməkdaşlıq memorandumları imzalanıb

26.10.2013 [12:29]

Oktyabrın 25-də Təhsil Nazirliyi ilə Azərbaycan Respublikası Dövlət Neft Şirkəti (ARDNŞ) və “Azərsu” Açıq Səhmdar Cəmiyyəti arasında ilk peşə ixtisaslı təhsil müəssisələrinin fəaliyyətinin dəstəklənməsi barədə ikitərəfli əməkdaşlıq memorandumlarının imzalanması mərasimi keçirilib.
AzərTAc xəbər verir ki, tədbirdə təhsil naziri Mikayıl Cabbarov ilk peşə ixtisas təhsili müəssisələrinin fəaliyyətinin dəstəklənməsi barədə ikitərəfli əməkdaşlıq memorandumlarının imzalanmasının əhəmiyyətindən söhbət açıb. Memorandumların Azərbaycan iqtisadiyyatının yüksək templə davam edən inkişafına, regionların sosial-iqtisadi inkişafı Dövlət Proqramına müvafiq olaraq əmək bazarının tələblərinə uyğun ixtisaslı kadr hazırlığı sisteminin təkmilləşdirilməsinə və işəgötürən təşkilatlarla əlaqələrin uğurla davam etdirilməsinə töhfə verəcəyinə əminliyini bildirib.
M.Cabbarov milli təhsilimizin inkişafında Prezident İlham Əliyevin 2013-cü il 24 oktyabr tarixli “Azərbaycan Respublikasında təhsilin inkişafı üzrə Dövlət Strategiyası”nın təsdiq edilməsi haqqında Sərəncamının əhəmiyyətini xüsusilə vurğulayıb.
İlk peşə təhsilinin nüfuzunun yüksəldilməsi, yeniyetmələrin texniki peşələrə yiyələnməyə həvəsləndirilməsinin zəruriliyini bildirən nazir birgə proqramların hazırlanması, həyata keçirilməsi baxımından qarşıda duran vəzifələr barədə də məlumat verib.
Tədbirdə ARDNŞ-in prezidenti Rövnəq Abdullayev Prezident İlham Əliyevin məqsədyönlü siyasəti nəticəsində Azərbaycan iqtisadiyyatının sürətlə inkişaf etdiyini diqqətə çatdırıb və əsası Ümummilli liderimiz Heydər Əliyev tərəfindən qoyulmuş neft strategiyasının ölkəmizdə uğurla davam etdirildiyini bildirib. Dövlət başçımızın “neft kapitalını insan kapitalına çevirək” şüarını xatırladan R.Abdullayev bu sahədə respublikamızda həyata keçirilən layihələrdən danışıb, ilk peşə ixtisas təhsili müəssisələrinin fəaliyyətinin dəstəklənməsi və ehtiyac duyulan ixtisaslar üzrə kadrların hazırlanmasında Təhsil Nazirliyi ilə əməkdaşlığın uğurlu nəticələr verəcəyinə əminliyini söyləyib.
“Azərsu” Açıq Səhmdar Cəmiyyətinin sədri Qorxmaz Hüseynov ölkəmizdə əhalinin iyirmi dörd saat içməli su ilə təmin etmək üçün hazırlanmış layihələrin uğurla davam etdirildiyini nəzərə çarpdırıb, peşə ixtisası üzrə mütəxəssislərin yetişdirilməsində Təhsil Nazirliyi ilə qarşılıqlı əməkdaşlığın əhəmiyyətini vurğulayıb.
Sonra Təhsil Nazirliyi ilə Azərbaycan Respublikası Dövlət Neft Şirkəti və “Azərsu” Açıq Səhmdar Cəmiyyəti arasında ilk peşə ixtisaslı təhsil müəssisələrinin fəaliyyətinin dəstəklənməsi barədə ikitərəfli əməkdaşlıq memorandumları imzalanıb.
Memorandumlar Azərbaycan iqtisadiyyatının yüksək templə davam edən inkişafına töhfə vermək, işəgötürən təşkilatlarla əlaqələrin möhkəmləndirilməsini təmin etmək məqsədinə xidmət edir.

Paylaş:

Baxılıb: 1093 dəfə