Azərbaycanda regionların sosial-iqtisadi inkişafı dövlət siyasətinin prioritet istiqamətlərindəndir

Bakı:

10 °C

93 %

2 m/s

AZ RU EN

Ana səhifə / Siyasət / Azərbaycanda regionların sosial-iqtisadi inkişafı dövlət siyasətinin prioritet istiqamətlərindəndir

Azərbaycanda regionların sosial-iqtisadi inkişafı dövlət siyasətinin prioritet istiqamətlərindəndir

11.12.2013 [09:38]

Prezident İlham Əliyevin imzaladığı Sərəncama əsasən Qəbələ rayonunun Mirzəbəyli-Çuxur Qəbələ-Dizaxlı-Çarxana avtomobil yolunun tikintisinə Azərbaycan Respublikası Prezidentinin ehtiyat fondundan 3 milyon manat ayrılıb
Məlum olduğu kimi, regionların tərəqqisinə xidmət edən və sistemli tədbirlər toplusu olan inkişaf proqramları ölkəmizin modernləşmə, yenilənmə prosesinə əhəmiyyətli töfhələr verir. Belə ki, regionlarda mövcud olan iqtisadi potensialdan səmərəli istifadə edilməsi nəticəsində ötən dövr ərzində infrastruktur sahələrinin bərpası və genişləndirilməsi, yeni istehsal və emal müəssisələrinin, təhsil, səhiyyə, idman-sağlamlıq, mədəniyyət obyektlərinin istifadəyə verilməsi regionların sosail-iqtisadi inkişafına təkan verib. Yerlərdə istehsalın genişlənməsi nəticəsində, Azərbaycanda qeyri-neft sektoru daha sürətlə inkişaf edib, özəl sektorun inkişafına möhkəm zəmin yaradılıb.
Azərbaycanın iqtisadi inkişafının əsas baza sütunlarından birinə çevrilən “Regionların sosial-iqtisadi inkişafı Dövlət Proqramı” (2004-2008-ci illərə və 2009-2013-cü illərə dair) respublikamızın sıçrayışlı inkişafını təmin etməklə yanaşı, insanların sosial həyatının, rayonların simasının əhəmiyyətli dərəcədə dəyişərək yeni proqressiv çalarlar almasında mühüm rol oynamaqdadır. Prezident İlham Əliyevin gərgin əməyinin və əzmkarlığının nəticəsi olaraq hazırlanan və dövlət başçısının birbaşa nəzarəti altında icra olunan bu proqramlar respublikanın hərtərəfli sosial-iqtisadi tərəqqisinə səbəb olub.
Yeri gəlmişkən, istehsal müəssisələrinin fəaliyyətinin bərpası, yeni sənaye obyektlərinin yaradılması, yerli resurslardan istifadənin səmərəsinin artırılması, regionların inkişafı üçün zəruri infrastrukturun yaradılması, aqrar sektorda islahatların ikinci mərhələsinin sürətləndirilməsi, fermerlərə və digər kənd təsərrüfatı işçilərinə kömək məqsədilə, müxtəlif servis mərkəzlərinin yaradılması, investorların regionlara cəlb olunması üçün əlverişli şəraitin yaradılması, yeni iş yerlərinin açılması, əhalinin kommunal xidmətlərlə təminatının yaxşılaşdırılması Qəbələ rayonunun sosial-iqtisadi inkişafında da həlledici dönüş yaradıb. Belə ki, Prezident İlham Əliyevin həyata keçirdiyi məqsədyönlü siyasət nəticəsində bu gün ölkəmizin bütün bölgələri kimi, Qəbələ də qədim və tarixi görkəmini saxlamaqla müasirləşir. Burada bir sıra yüksək səviyyəli mədəni-humanitar tədbirlər keçirilir. Son illər Qəbələdə dünya standartlarına cavab verən otellər, beynəlxalq hava limanı tikilib, yollar çəkilib. Qəbələ artıq beynəlxalq tədbirlərin təşkil olunduğu şəhərlərlə bir sırada yer alır. Təsadüfi deyil ki, MDB-nin üzv dövlətlərinin Humanitar Sahə üzrə Əməkdaşlıq Şurasının və təşkilata üzv ölkələrin Humanitar Əməkdaşlıq üzrə Dövlətlərarası Fondunun Aşqabadda keçirilən birgə iclasında qəbul edilən qərara əsasən 2013-cü ildə Qəbələ “MDB-nin mədəniyyət paytaxtı” elan olunub. Bu gün gözəl təbiəti və bənzərsizliyi ilə seçilən Qəbələ şəhərinin MDB-nin mədəniyyət paytaxtına çevrilməsində rayonun qədim tarixi də mühüm rol oynayır. Qəbələdə yeni inşa olunan Heydər Əliyev Konqres Mərkəzinin tikintisi isə bir məqamı təsdiqləyir ki, artıq burada istənilən beynəlxalq tədbiri keçirmək mümkündür. Konqres Mərkəzində beynəlxalq səviyyəli tədbirlərin keçirilməsi üçün geniş imkanlar yaradılıb.
200 yerlik Heydər Əliyev Konqres Mərkəzi Qəbələ şəhərində, Qaraçay çayının sahilində yerləşir və ərazisinin ümumi sahəsi 8,5 hektardır. Mərkəzin layihələndirmə və tikinti işlərinə 2012-ci ilin mayından başlanılıb və bu ilin iyulunda başa çatdırılıb. Bina üç mərtəbədən ibarətdir. Birinci mərtəbədə zallar, 350 yerlik restoran və inzibati otaqlar yerləşir. Mərkəzdə 6 qüllə və zalın üzərində diametri 20 metr, hündürlüyü isə zalın döşəmə səviyyəsindən 13 metr olan günbəz düzəldilib. İsveçrə istehsalı olan və səstənzimləmə xassələrinə malik materialdan istifadə olunaraq hazırlanan bu günbəz zalda akustikanın tənzimlənməsinə xidmət edir. Çoxfunksiyalı 1200 yerlik konfrans zalı isə ikinci mərtəbədədir.
Bu gün Qəbələnin Azərbaycanda təşkil edilən beynəlxalq tədbirlərin keçirildiyi məkanlarından biri olması burada turizmin inkişafını da zəruri edir. Qəbələdə istifadəyə verilən “Qafqaz Karvansaray” otel kompleksi də həmin istiqamətdə atılan əsaslı addımlardan biridir. 2013-cü ilin avqustunda Prezident İlham Əliyev Qəbələdə “Qafqaz Karvansaray” otel kompleksinin açılışında iştirak edib. Məhz təkcə Qəbələ rayonu deyil, ümumilikdə bölgə üçün də əhəmiyyətli turizm obyekti olan bu kompleks mükəmməl infrastruktura malikdir. Kompleksin təchizatı da ən müasir standartlara uyğundur. Otel 5 hektar sahədə inşa edilib. Tikinti işlərinə 2012-ci ilin mayında başlanıb, bu ilin avqustunda başa çatdırılıb. Bu kompleks, eyni zamanda, nadir memarlıq incilərindən biridir.
Dördmərtəbəli kompleks ən müasir standartlar səviyyəsində inşa olunub. Otelin zirzəmi hissəsində avtomobil qarajı, camaşırxana, hovuz və digər yardımçı otaqlar vardır. “Karvansaray” otel kompleksi 139 super otaq, 12 ailəvi otaq, 6 kral otağı və 2 əlillər üçün otaq olmaqla 159 otaqdan ibarətdir. Oteldə, həmçinin, qapalı üzgüçülük hovuzu, kişi və qadınlar üçün bərbərxana və gözəllik salonları, iki türk hamamı, iki buxar hamamı, iki SPA, iki trenajor zalı, bilyard və tennis zalları, iki sauna və massaj otaqları, 150 nəfərlik restoran, iclas və konfranslar keçirmək üçün zallar və uşaqların istirahət otaqları fəaliyyət göstərir. “Qafqaz Karvansaray” otelində 120 nəfərin daimi işlə təmin edilməsi nəzərdə tutulub.
Səfəri çərçivəsində, həmçinin, Prezident İlham Əliyev yenidən qurulan Qaraməryəm-İsmayıllı-Şəki avtomobil yolunun Qəbələ-Oğuz hissəsinin açılışında da iştirak edib. Sözügedən avtomobil yolu Böyük Qafqaz sıra dağlarının cənub ətəyində yerləşir və respublikanın ən böyük turizm marşrutlarından olan yolun bir hissəsidir. Avtomobil yolu respublikamızın Şimal-Qərb rayonları ilə nəqliyyat əlaqəsinin yaxşılaşdırılmasında, həmçinin, iqtisadiyyatın və turizmin inkişafında mühüm əhəmiyyət kəsb edir. Tikintisinə 2012-ci ilin may ayında başlanan Qaraməryəm-İsmayıllı-Şəki avtomobil yolunun Qəbələ-Oğuz sahəsinin 75-95 kilometrlik hissəsi əsaslı sürətdə yenidən qurulub. Yolda tikinti işləri zamanı 7 dəmir-beton körpü əsaslı təmir edilib. Bundan başqa, yol ərazisində 13 su keçidi və 7 avtobus dayanacağı, həmçinin, bir yol qovşağı da tikilib. Qaraməryəm-İsmayıllı-Şəki avtomobil yolunun Qəbələ-Oğuz hissəsi 5 yaşayış məntəqəsini - Zarağan, Kiçik Pirəli, Mirzəbəyli, Zərgərli kəndlərini və Nic qəsəbəsini əhatə edir.
Qeyd edək ki, dövlət başçısı baş çəkdiyi hər bir rayonun, qəsəbənin, kəndin mövcud problemləri, çatışmayan kommunal xidmət növlərinin vəziyyəti ilə tanış olduqdan sonra dərhal bu kimi məsələlərin operativ həllinə nail olmaq üçün müvafiq sərəncamlar imzalayır. Dekabrın 4-də imzalanmış Qəbələ rayonunun Mirzəbəyli-Çuxur Qəbələ-Dizaxlı-Çarxana avtomobil yolunun tikintisi ilə bağlı əlavə tədbirlər haqqında Azərbaycan Respublikası Prezidentinin Sərəncamı da bu qəbildəndir. Həmin Sərəncama əsasən, 8 min nəfər əhalinin yaşadığı 9 yaşayış məntəqəsini birləşdirən Mirzəbəyli-Çuxur Qəbələ-Dizaxlı-Çarxana avtomobil yolunun tikintisinin davam etdirilməsi məqsədi ilə Azərbaycan Respublikasının 2013-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Qəbələ rayon İcra Hakimiyyətinə 3 (üç) milyon manat ayrılıb.
Vurğulamaq yerinə düşər ki, dövlət başçısı ötən illərdə bütün rayonlara səfər edərək aparılan hər bir işlə yaxından tanış olub, müxtəlif infrastruktur və sosial obyektlərin açılışında iştirak edib. Prezident İlham Əliyevin sistemli və davamlı xarakter alan bu səfərləri regionların sosial-iqtisadi inkişafının sürətləndirilməsində müstəsna əhəmiyyət kəsb edir. Eyni zamanda, hər bir rayonun inkişafı ilə bağlı qarşıda duran spesifik vəzifələrin müəyyənləşdirilməsi və həyata keçirilməsini təmin edir. Məsələn, cari ilin fevralın 28-də Qəbələ rayonuna səfəri çərçivəsində Prezident İlham Əliyev burada tikilməkdə olan Konqres Mərkəzində inşaat işlərinin gedişi, “Tufan” Dağ-Xizək Yay-Qış İstirahət Kompleksinin, “Golf Resort” idman və istirahət mərkəzinin tikintisi ilə tanış olub, həmçinin, heyvandarlıq-südçülük kompleksinin, Qəbələ atıcılıq klubunun inşası başa çatdırılan birinci mərhələsinin, Qəbələ şəhər məscidinin yeni binasının, Mədəniyyət Mərkəzinin açılışında iştirak edib.
Göründüyü kimi, regionlarda mövcud olan iqtisadi potensialdan səmərəli istifadə olunması, sosial-iqtisadi vəziyyətin yaxşılaşdırılması və iqtisadiyyatın tarazlı inkişafının təmin edilməsi ötən dövr ərzində infrastruktur sahələrinin bərpası və genişləndirilməsinə, yeni istehsal və emal müəssisələrinin, idman-sağlamlıq, mədəniyyət obyektlərinin istifadəyə verilməsinə səbəb olub.
SEVİNC

Paylaş:

Baxılıb: 985 dəfə