Avropa İttifaqı Şurasının üzvləri işğaldan azad olunmuş ərazilərə səfər ediblər

Bakı:

13 °C

88 %

7 m/s

Əlaqə

AZ RU EN

Ana səhifə / Siyasət / Avropa İttifaqı Şurasının üzvləri işğaldan azad olunmuş ərazilərə səfər ediblər

Avropa İttifaqı Şurasının üzvləri işğaldan azad olunmuş ərazilərə səfər ediblər

02.10.2026 [20:17]

Avropa İttifaqı (Aİ) Şurasının Şərqi Avropa və Mərkəzi Asiya üzrə İşçi Qrupunun (COEST) nümayəndə heyəti oktyabrın 2-də Azərbaycanın işğaldan azad olunmuş ərazilərinə səfər ediblər.

AZƏRTAC xəbər verir ki, qonaqlar əvvəlcə Şuşa şəhərində olublar.

Azərbaycan Prezidentinin Şuşa rayonunda xüsusi nümayəndəsi Aydın Kərimov qonaqlara şəhərin tarixi, işğal dövründəki vəziyyəti və şəhər işğaldan azad olunandan sonra burada aparılan bərpa-quruculuq işləri barədə məlumat verib.

Nümayəndə heyəti Aşağı Gövhər Ağa və Yuxarı Gövhər Ağa məscidləri ilə tanış olub, Şuşa şəhərinin mərkəzi meydanında Azərbaycanın tanınmış şəxsiyyətləri Natəvanın, Bülbülün və Üzeyir Hacıbəylinin güllələnmiş heykəllərinə baxıblar.

Aİ Şurasının nümayəndələri Şuşa şəhərində birinci yaşayış kompleksində yaradılan şəraitlə də tanış olublar. Bildirilib ki, keçmiş məcburi köçkünlər doğma şəhərlərinə qayıdaraq yaşayış kompleksində məskunlaşıblar.

Qonaqlar, həmçinin Şuşanın qala divarları ilə tanış olublar. Onlara Şuşa şəhərinin tarixi, qala divarlarının tikilməsi barədə məlumat verilib.

Nümayəndə heyətinə Şuşadakı Qazançı kilsəsi barədə də məlumat verilib.

Sonra Aİ nümayəndə heyəti Xankəndi şəhərinə gəliblər. Onlar Xankəndidə yerləşən Qarabağ Universitetini ziyarət edib. Xankəndi şəhərində, Ağdərə və Xocalı rayonlarında Azərbaycan Respublikası Prezidentinin Xüsusi nümayəndəsinin müavini Səbuhi Qəhrəmanov qonaqlara Xankəndidə aparılan tikinti-quruculuq işləri, məcburi köçkünlərin öz doğma yurdlarında yenidən məskunlaşması barədə məlumat verib.

Nümayəndə heyəti Zəfər parkına və Zəfər meydanına baş çəkib. Qonaqlar parkın ərazisi ilə tanış olub, burada Azərbaycanın Vətən müharibəsində əldə etdiyi Zəfəri əks etdirən məkanlar və layihələr barədə məlumatlandırılıblar.

Ardınca qonaqlar Xankəndidən Ağdam rayonunun Sarıcalı kəndinə baş çəkmək üçün yola düşüb.

Nümayəndə heyəti Sarıcalı kəndi ərazisində minatəmizləmə prosesi barədə məlumatlandırılıblar.

Azərbaycan Respublikasının Minatəmizləmə Agentliyinin (ANAMA) əməkdaşları xarici nümayəndələrə Ermənistan tərəfindən ərazilərin minalarla çirkləndirilməsi, bu istiqamətdə aparılan təmizləmə işləri barədə məlumat verib. O bildirib ki, Ağdam rayonu mina və partlamamış hərbi sursatlarla ən çox çirklənmiş ərazilərdən biri hesab edilir. Qonaqlar minatəmizləmə prosesini izləyiblər.

Aİ Şurasının nümayəndələri daha sonra Ağdam, Füzuli və Xocavənd rayonlarında Azərbaycan Prezidentinin xüsusi nümayəndəsi Emin Hüseynovla görüşüblər. Görüşdə Emin Hüseynov işğaldan azad edilmiş ərazilərdə həyata keçirilən genişmiqyaslı bərpa-quruculuq işlərindən bəhs edib.

Ardınca azad edilmiş ərazilərdə baş verən dəyişiklərə həsr olunmuş videoçarx nümayiş etdirilib.

Əsir və itkin düşmüş, girov götürülmüş vətəndaşlarla əlaqədar Dövlət Komissiyasının nümayəndəsi komissiyanın fəaliyyəti, o cümlədən azad edilmiş ərazilərdə kütləvi məzarlıqların aşkar edilməsi və əsir və itkin düşmüş soydaşlarımızın taleyinin araşdırılması istiqamətində görülən tədbirlər barədə məlumat verib.

Paylaş:

Baxılıb: 142 dəfə