Sevinc Fətəliyeva: Suverenliyin bərpasından sonra Azərbaycanın yeni gündəliyi formalaşıb

Bakı:

20 °C

83 %

3 m/s

Əlaqə

AZ RU EN

Ana səhifə / Siyasət / Sevinc Fətəliyeva: Suverenliyin bərpasından sonra Azərbaycanın yeni gündəliyi formalaşıb

Sevinc Fətəliyeva: Suverenliyin bərpasından sonra Azərbaycanın yeni gündəliyi formalaşıb

06.10.2026 [15:10]

“Prezident İlham Əliyevin Yeni Azərbaycan Partiyasının VIII Qurultayındakı çıxışı dərin və məzmunlu olmaqla yanaşı gələcək vəzifələri də müəyyənləşdirir. Dövlət başçısı xüsusi olaraq vurğuladı ki, hazırkı qurultay Azərbaycanın ərazi bütövlüyünün və suverenliyinin tam bərpasından sonra ilk dəfə keçirilir. Bu fikir yalnız tarixi nəticənin təsbiti kimi deyil, daha geniş kontekstdə də mühüm əhəmiyyət daşıyır. Beləliklə, onilliklər ərzində milli siyasətin əsas istiqamətlərindən birini müəyyən edən məqsədə nail olunduqdan sonra dövlət gündəliyinin necə formalaşdığı məsələsi ön plana çıxır”. Bu fikirləri Milli Məclisin deputatı Sevinc Fətəliyeva deyib.

Onun sözlərinə görə, 2020-ci ilə qədər dövlətin əsas vəzifələrindən biri ərazi bütövlüyünün bərpası idi. 44 günlük Vətən müharibəsində qazanılan Qələbə strateji vəziyyəti dəyişdirdi, 2023-cü ilin sentyabrında baş verən hadisələr isə ölkənin bütün ərazisində suverenliyin bərpası prosesini başa çatdırdı. Bununla da, Azərbaycan tarixi məqsədə nail olmaq mərhələsindən əldə edilmiş nəticələrin möhkəmləndirilməsi mərhələsinə keçdi. Bu reallıq inkişafın yeni məntiqini formalaşdırır. Qələbə özlüyündə dövlət strategiyasının son nöqtəsi ola bilməz. Onun siyasi əhəmiyyəti əldə edilmiş nəticənin nə dərəcədə dayanıqlı inkişafa, təhlükəsizliyə, iqtisadi fəallığa və insanların azad edilmiş ərazilərə qayıdışına çevrilə bilməsi ilə müəyyən olunur.

Deputat bildirib ki, Prezident çıxışında dəyişməz olaraq qalan siyasi kursun əsas prinsiplərini müəyyənləşdirdi: müstəqillik, dövlətçilik, iqtisadi müstəqillik, güclü hərbi potensial və öz imkanlarımızdan maksimum istifadə. Bununla yanaşı, qeyd olunduğu kimi, zamanın tələblərinə uyğun olaraq taktiki, hətta ayrı-ayrı strateji hədəflər dəyişə bilər. Əslində, bu tezisdə yeni mərhələnin formulu öz əksini tapır. Suverenliyin bərpasından sonra güclü dövlətə ehtiyac aradan qalxmır — sadəcə, həmin gücün xidmət etdiyi vəzifələrin məzmunu dəyişir.

Millət vəkilinin fikrincə, yeni şəraitdə hərbi potensial, ilk növbədə, uzunmüddətli təhlükəsizliyin təminatı kimi xüsusi əhəmiyyət kəsb edir. Son onilliklərin təcrübəsi göstərdi ki, dövlətin siyasi müstəqilliyi onun öz təhlükəsizliyini təmin etmək imkanları ilə birbaşa bağlıdır. Buna görə də münaqişənin aktiv mərhələsi başa çatdıqdan sonra güclü ordunun qorunub saxlanılması əvvəlki gündəliyin davamı kimi deyil, yeni təhdidlərin qarşısının alınmasına xidmət edən mühüm amil kimi qiymətləndirilməlidir. Eyni zamanda, ağırlıq mərkəzi tədricən quruculuğa keçir. Qarabağın və Şərqi Zəngəzurun bərpası, infrastrukturun qurulması, yeni yaşayış məntəqələrinin yaradılması və keçmiş məcburi köçkünlərin doğma yurdlarına qayıdışı suverenliyi siyasi-hüquqi anlayışdan praktiki reallığa çevirir. Ərazi məhz orada tam və normal həyat bərpa olunduğu zaman ölkənin vahid iqtisadi və sosial məkanına tam şəkildə inteqrasiya edilir. Bu baxımdan Böyük Qayıdışın əhəmiyyəti təkcə köçürülmə proqramının çərçivələri ilə məhdudlaşmır. Bu, ərazi bütövlüyünün bərpasından sonra dövlət quruculuğunun növbəti mərhələsidir.

“Beləliklə, ərazi bütövlüyünün və suverenliyin tam bərpasından sonra Azərbaycan qarşısında keyfiyyətcə yeni vəzifə dayanır: artıq yeni məqsədlərə nail olmaq deyil, əldə edilmiş suverenliyi uzunmüddətli və davamlı məzmunla zənginləşdirmək. Prezidentin çıxışında ifadə olunan prinsiplərin praktik həyata keçirilməsi Azərbaycanın postmünaqişə dövründə inkişaf modelinin əsas istiqamətlərini müəyyən edəcək” - deyə, Sevinc Fətəliyeva vurğulayıb.

Nardar Bayramlı

Paylaş:

Baxılıb: 83 dəfə